GOÁ Ê HOE-HN̂G (pe̍h-oē-si)

1. Goá ê Hoe-hn̂g chin-chiàⁿ suí,
   Chhó-bo̍k chhiⁿ-chhuì hoe toā luí,
   ia̍h ū soaⁿ-á kap liâng-têng,
   Chheng ê pi-á kap pûn-chuí.

2. Chhiū-bî ē hoe chin-chāi phang,
    Bó͘-tan, tê-hoe chin-chiàⁿ âng,
    Pek-ha̍p, ba̍k-nī sek chin pe̍h,
    Hâm-siàu, gio̍k-lân chin toā châng.

3. Chhun-thiⁿ goá lâi chia kiâⁿ-iû,
    O-ia̍h oē koé sim iu-chhiû,
    Hē-thiⁿ goá lâi chia hiu-khè,
    Kui-tīn ê siân kiò lè-lè.

4. Chhiu-thiⁿ goá lâi chia sàn-pō͘,
   Hé-kim-ko͘ tiám-teng chhoā lō͘,
   Tang-thiⁿ goá lâi chia koan-kéng,
   Sui-jiân sng-hong iā boē léng.

5. Goá nā seng-khu ū ià-siān,
    Bi̍t-phang sàng bi̍t chin lī-piān,
    Goá nā sim-sîn ū hoân-ló,
    Suí-hoe an-uì chin tú-hó.

6. Kam-kiat, thô lí, kap phêng-kó,
    Hoe-hn̂g ké-chí chin tin-pó,
    Keng-chio, ông-lâi, kap âng-khī,
    Sì-kuì lóng thang chia̍h tin-bī.

7. Pi-á, âng pe̍h ê kim-hî,
   Soaⁿ-ni̍h, koe-chiáu chin gâu thî,
   Kui-tīn káu-hiā kap bi̍t-phang,
   Tāi-ke chin-khûn gâu choè kang.

8. Goá ê hoe-hn̂g chin cha̍p-chn̂g,
    Âng, pe̍h, chí, chhiⁿ, le̍k kap n̂g,
    Kéng-sek chin-hó koh kú-tn̂g,
    Pêng-iú chhiáⁿ lâi goá hoe-hn̂g.

9. Sui-jiân goá bô choè lông-hu,
    iáu-kú chin ài o̍h "Ban-su"!
    Sui-jiân goá sī choè ha̍k-seng.
    iáu-kú chin ài sêng "Ie-chu"!

Chù: "Ban-su" kap "Ie-chu" sī Eng-kok iú-bêng ê chhân-hn̂g si-ong.

10. THIAN-KOK tú-tú chhin-chhiūⁿ che,
     Sìn-chiá ta̍k-lâng sī chi̍t-le,
     Lán tio̍h bō͘-sēng koh khui-hoe,
     Chiah sī chng-suí lán SÈNG-HOĒ.