首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 科學雜略(空氣)
科學雜略(空氣) 影像(5)
卷期：第 2 號 本次： 日期：1925/10 刊名：芥菜子 頁數：46-50
篇名：科學雜略(空氣) [ KHO-HA̍K CHA̍P-LIO̍K (KHONG-KHÌ) ]
作者：陳能通 Tân Lêng-thong
  顯示 : 漢羅 全羅 並列  

科學雜略

空氣

　　看見草木ê枝葉teh搖來搖去，咱就知有風teh吹。靜靜無風ê時，咱若用手á是扇佇空中趕緊來拽，也thang知有啥物觸著咱ê皮膚。Koh這項就是人用鼻孔teh呼出吸入空中ê物無一秒間有歇睏。Taⁿ空中彼項物，咱kā伊號做空氣。這是逐人所識ê常識。

　　空氣是包圍佇地球水陸兩界ê表面上，無論叼位一孔、一隙to是伊所佔領ê王國。雖然是按呢，伊ê存在ê範圍毋是無限ê。

　　空氣包圍佇地球ê表面上chiah有20外英哩（mile）ê遠若定。Koh起氣是別款ê元素包圍teh。離地面懸ê所在空氣就ná稀薄；會容允得ê人ê呼吸袂拄著啥物大阻礙ê所在，極懸不過也是成十英哩以內若定。若捌爬高山ê人就知影爬上愈懸ê所在會予呼吸ná困難。

　　咱知空氣時真輕ê物；毋過雖bóng koh-khah輕ê物，若是積濟起--來嘛是真重，不過因為伊ê分子kap分子ê中間相離真遠，所以伊ê體積著鎮真闊。Taⁿ空氣對遐懸ê所在teh-teh ê力有偌大？若是佇海面每一爿方尺有受空氣ê壓力170 外斤，這个力若離海面ná懸ê所在ná減少。所以若量這个力，就thang知彼所在有偌懸。空氣這款ê壓力號做氣壓。氣壓ê力是用氣壓計量。

　　予氣壓計ê水銀柱，chhèng 76 sian-bí-bu̍t，就是25寸懸ê壓力號做一氣壓。（水銀比水khah重136倍，所以一氣壓ê力會予水chhèng到34尺懸）

　　Taⁿ越倒轉來看空氣是啥物？空氣是無色、無味，平常ê溫度（以後kán-lio̍k講常溫）是氣體，（萬項物thang分做三個狀態：－

　　(1)固體，－親像石、鐵、柴： (2)液體，親像水、臭油------；(3)氣體，親像水蒸氣、瓦斯、空氣------）空氣一百分ê內中，約五份一是酸素（按：氧），倚五份四是窒素（按：氮），其餘有淡薄ê元素。（argon；按：氬），碳酸瓦斯kap水蒸氣。

　　Khah倚地球表面上ê空氣，有遮个物質用拄好ê分量來相混合，到拄拄合萬項物ê路用。

　　若干但酸素這項元素佇teh ê時，雖bóng是常溫也是真快kap別項物相化合。這號做酸化，是酸素ê得勝。譬喻拄á歕失ê火柴枝若kā伊下佇酸素ê內面連鞭就koh焯。

　　窒素拄拄kap酸素倒反，伊ê性真鈍，常溫ê時真oh kap別項元素相化合。因為空氣是這兩項性質相對反要緊ê元素來相摻--ê，所以佇常溫ê時會拄好供給眾項物ê欠缺。Taⁿ空氣thang做啥物路用？簡單來講幾若項：

　　(Ⅰ)  化學的ê變化kap路用。第一要緊咱攏知，就是空氣會幫贊人類，雞禽走獸以及草木thang活佇地面。人吸空氣佇肺裡，酸素就吸收逐等號ê lâ-sâm，洗清咱ê血，後來變做碳酸瓦斯á是lâ-sâm ê空氣，chiah chhóan出來。所以人所踮ê厝內毋thang關siuⁿ密，著予空氣khah有流通，chiah有合佇衛生。

　　植物對伊ê葉下細ê孔吸入空氣，後來chiah提彼內中ê窒素kap碳酸瓦斯中ê碳素做伊ê營養分，也吐出所賰ê酸素。所以佇海邊樹林ê所在，遐个空氣khah清，khah會幫贊人ê健康。

　　佇空中若無空氣就咱所點ē火也袂焯。因為火teh焯是空氣中ê酸素teh幫贊伊。就是酸素kap碳素相結合變做碳酸瓦斯，予咱thang看見火舌、火燄紅紅。咱teh拽烘爐就是ài予火炭內碳素thang完全kap酸素相結合來發生khah濟ê熱。火炭teh焯ê時咱常常有看見淡薄á青色ê火舌。這是極毒ê物，號做一酸火碳素（按：一氧化碳），若吸入suiⁿ濟會傷害身軀，有時會致到死。所以若起火爐ê時著予火炭khah gâu焯就khah袂發生這款毒素。

　　寒天掩火籠著用pû真紅ê碳khah好。鐵器會生銑也是因為空氣中ê酸素kap鐵勻勻仔相結合ê所致。就是鐵予酸素kā伊酸化--去。因為ài持防這號酸素ê作用咱chiah用別項物來kā擦。

　　一項予咱thang注意--ê，就是前年歐洲大戰ê時德國ê學者夏肉（Harvard）有發見對空中吸收窒素ê方法。這項是科學上ê大發明；因為真早就有人苦心teh研究這項；總是無成功。製造火藥、肥料以及別項ê物所欠用ê窒素著對別項原料來khêng起來。對經濟上看起來是真傷重。若是空氣是自然ê本源，毋免用錢來買，也免驚遐快就提了。所以用夏肉ê方法來吸收空中ê窒素，經濟上真有長。歐戰中德國會擋遐久，也是因為有這項ê大發見thang予伊倚靠。

　　(Ⅱ)  物理ê變化kap用途。第一要緊空氣是做傳達聲音ê路用。設使若無空氣，雖bóng發聲體ê聲音koh-khah大，in是袂得到佇咱ê耳膜。咱若用真勇ê玻璃鐘來tàu佇這个teh哮ê電能，雖bóng接喙糊予伊真密，咱猶久會聽見伊ê聲。若用抽風ê器具，kā伊抽出彼內面ê空氣，就ná細聲，到尾會攏無聽見；因為無空氣thang傳佈彼个聲音到佇外面。

　　空氣teh傳佈聲音是受著對發音體所發出真重ê勢力。空氣受著這號勢力就成做音波（á是講空氣湧）傳達佇四圍。發音體所發出ê勢力是連續的--ê，毋是做一擺一擺發出。毋過空氣中有摩擦kap抵抗ê力佇teh，所以振動ê勢力ná衰滅，空氣所受ê勢力ná減少，聲音就ná細。

　　頂面有講起空氣ê壓力有chiah大，所以咱若teh抽出玻璃管內ê空氣，著用真勇ê玻璃管chiah袂piak破。玻璃管內無空氣是號做真空。近代物理學真重要ê根本問題攏是佇真空管ê內面研究出來--ê。卻無欲講起遐个，干但予咱知佇空氣ê世界ê內面，猶有真微妙ê現象。

　　空氣ê壓力hiah大，咱攏無感覺著是因為咱ê身軀內毋是真空，有拄好ê空氣佇內面teh抵抗外面ê壓力。

　　咱佇空中所感覺ê空氣攏是氣體。毋過佇48年前有人發見會予空氣變做液體，親像水。這項是經過成百年久ê研究，chiah發見著--ê。論伊製法kap性質佇遮無欲詳細講起，干但予咱知欲製造液體空氣著用150氣壓ê壓力，koh著予空氣冷卻到比冰點khah低140度以下chiah會用得。液體空氣若比冰點khah低193度半，佇空中裡1氣壓ê時thang做逐等號ê路用。伊ê性質真濟真心適。1氣壓若ná減少，koh溫度若比冰點khah低218度ê時，液體空氣就凝結變做固體空氣。親像按呢溫度kap氣壓兩爿ê變換若配到拄好ê時，真濟ê物質會換伊ê狀態，或是變做固體、液體ê變化。

　　(Ⅲ)  地理的ê變化。空氣ê壓力若平平ê時，就對氣壓khah懸ê所在流落khah低ê所在ài予伊ê壓力平。空氣這款ê運動是號做風。風teh吹ê力kap雙爿ê氣壓ê中心，若離愈遠就愈慢。Koh風teh吹ê方向，受著地球teh運動ê影響，毋是直直，是親像捲螺仔款。

　　踮倚海邊ê人就知風khah濟日時是對陸地吹向彼爿，也暝時對海面吹向陸地來。這兩款ê風佇早暗ê時teh換方向，所以彼時陣就靜靜無風。這項ê原因是因為陸地比海水khah快吸收太陽ê熱氣，koh也khah快放散伊所吸收ê燒氣。陸地吸收熱會koh幅射起來，所以予空氣連鞭燒，也漲大起--來。對按呢排出頂面ê空氣，予氣壓減少。按呢號做短氣壓。海水khah oh吸收日頭ê熱，所以四圍ê空氣khah oh燒，頂面空氣袂走去，所以伊ê氣壓khah大。按呢號做高氣壓。因為按呢風就對海面吹向陸地起來。到欲暗ê時，乾地就ná放散伊所吸收ê熱，予空氣ná冷。到伊ê氣壓ná kap海面ê氣壓平ê時就靜風。後來伊ê氣壓若盤過海面ê氣壓，就起風吹對海面去。

　　佇台灣7, 8月ê時常常ài 拄著風颱是怎樣？是因為亞西亞大略佇這个節季ê時常常ài忽然發生短氣壓ê中心。這是做風颱原因。短氣壓ê中心毋是恬恬，是會進行--ê。伊teh進行ê方向大概定著，若是北半球ê短氣壓ê中心，起頭是向西北，後來就越對東北去。有時短氣壓ê中心會停踮一所在真久，親像人入佇迷路ê時，踮siâng一位teh狂踅。短氣壓teh欲進行去ê前面，遐个水蒸氣會凝結續落雨，也發出伊ê暫熱（就是落雨ê時水會放出伊內面本源有ê熱）因為按呢予遐个氣壓khah低，就短氣壓ê中心thang進行去。所以做風颱ê時khah濟是大雨大風。若是干但風颱就khah免拄著啥物損害。短氣壓ê中心過了ê時，四圍ê空氣會走來thap ài予遐个氣壓平。後來就好天。

　　遮个是大略講起若定，其餘猶有幾若等號ê風。

　　以上是大略講起空氣ê款式、變化kap路用若定。猶有寫無齊著ê，ǹg望後擺有機會chiah koh寫。
 
 
 
 
 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461