Kè chhoā tio̍h hó kui-kí.
1891.8 Tē Chhit-cha̍p-la̍k Tiuⁿ p.58-59
Hoān-nā chò Iâ-so͘1 ê ha̍k-seng tio̍h khah koh-iūⁿ chèng-lâng,tioh thàn chin-si̍t,m̄-thang thàn sè-sio̍k,in-uī lán kap sè-sio̍k lâng bô saⁿ-tân.Sè-sio̍k ū saⁿ-chiⁿ saⁿ-oàn,m̄-sī oàn-hīn lâng,kî-si̍t sī oàn-hīn lán bô thàn sè-sio̍k,bô ha̍h in ê sim nā-tiāⁿ.Iâ-so͘1 kóng"Lín sìn goá bô sio̍k tī sè-kan,só͘-í sè-kan lâng oàn-hīn lín."án-ni chò Iâ-so͘1 ê ha̍k-seng khiā-khí chit sè-kan bô hō͘ pháiⁿ hong-sio̍k phah-loān,bô hō͘ su-io̍k bê--khì,che chiah sī ha̍p tō-lí;khoàⁿ I Iok-hān 5:5,ū kóng,"Chī-chuī-á ē khah-iâⁿ sè-sio̍k?to̍k-to̍k sìn Iâ-so͘ chò Siōng-tè ê kiáⁿ ê lâng ē."
Chhin-chhiūⁿ chhoā-bó͘ nāu sin-niû pâng,pún sī bô ha̍p tō-lí ê sū,só͘-í sio̍k Chú ê lâng iáu-kú bē-hiáu thoat-lī chit-hō pháiⁿ-iūⁿ,sī m̄-tio̍h.Lâm-lí phoè-ha̍p sī lâng ê toā jîn-lûn,hō-hí ê lâng m̄-sī chhin-chhek chiū-sī pêng-iû,lóng hoaⁿ-hí in teh kè-chhoā,saⁿ-chhin saⁿ-thiàⁿ.Tng hit-sî lâng kheh moá-thiaⁿ,sin niû chiàu-lé phâng tê,tāi-ke tio̍h kèng-ì.Nā-sī bû-ti ê sio̍k-poè hoán-tńg saⁿ hì-hiauh,ū-ê ēng-îm-loān ê oē kah i tio̍h kóng,ū-ê ēng kan-lân ê sū kah i tio̍h kiâⁿ;sīm-chì ū-ê pàng-phàu sio-bīn,iū-koh chia̍h-chiú koè saⁿ-keⁿ,m̄-chai thang soàⁿ, kóng-chhut bô lí ê oē,m̄-chai kiàn-siàu,thong-mî kiáu-jiáu bô soah,sè-sio̍k koàn-sì lia̍h-chò bô iàu-kín,kóng bô lâng káⁿ thiaⁿ ê oē chò hoaⁿ-hí;chú-lâng siū-khì m̄-káⁿ chhut-siaⁿ,chhin-chhek pêng-iú,ū-ê saⁿ-khǹg ū-ê tàu-chān;chit-kù-oē bô ha̍h-ì,chiū kóng sī bú-bān,poàⁿ kù oē m̄ saⁿ-thàn chiū kóng,beh choa̍t-kau;éng-éng in-uī hoaⁿ-hí kiat-chiâⁿ oan-siû.Hit-hō ê pháiⁿ-khì-si̍p eng-kai tio̍h siám-pī;só͘-í khó͘-khǹg sio̍k Chú ê lâng tú-tio̍h chhoā-bó͘ ê hí-sū,koat-toàn m̄-thang o̍h sè-sio̍k ê khoán khì-nāu sin-niû-pâng:kiaⁿ-liáu chiông-tiong ū khah chhián-kiàn ê siàu-liân-lâng chi̍t-sî in-uī che khì hoān-choē,tì-kàu lán kap sè-sio̍k bô sím-mi̍h thang hun-piat.Nā-sī án-ni,kiám bē hō͘ lâng thí-chhiò mah?
Lūn kè-chhoā ê sū, phah-sǹg tio̍h sūn ki-hoē tī-chia lâi ke kóng kuí-kù-oē.Chi̍t-hāng chiū-sī sìn Chú ê lâng phit-phoè sè-sio̍k lâng sī bô hó-sè,sī hoān-tio̍h sèng-chheh ê kà-sī－"Bo̍h-tit kap m̄-sìn ê lâng phit-phoè,in-uī hó kap pháiⁿ cháiⁿ-iūⁿ chò-phoāⁿ?kng kap àm cháiⁿ-iūⁿ saⁿ kau-poê."Koh chi̍t-hāng iàu-kín chiū-sī lâng lâi kiat ang-bó͘ ê iok koat-toàn tio̍h kàu chi̍t-sì lâng chiah ha̍p lí.Kiaⁿ-liáu lán tī kàu-hoē-lāi ū hiaⁿ-tī bô sím-mi̍h chheng-chhó chit-chân tāi-chì.Lán ê Chú bêng-bêng ū kóng,"Lâng tio̍h lī-khui pē-bó,saⁿ-liân i-ê bó͘,chiâⁿ-chò chi̍t-thé.Tuì án-ni khoàⁿ,kàu boé bô chò nn̄g-ê,sī chi̍t-thé nā-tiāⁿ. Koh Siōng-tè só͘ phoè-ha̍p--ê, lâng m̄-thang pun-khui.
