利益囡仔
1893年 1--月，第 94 卷，p.9
有一個查某囡仔名叫惜á。伊ê心有欠缺，就愛得著活物通疼痛。因為安呢，伊求伊ê老父予伊一隻貓仔，老父甘願就予伊真媠--ê。囡仔大大歡喜。日過日有寶惜彼个金貓仔，常常揀好物予伊食，亦定定愛抱--伊。可惜！經過幾nā日久彼隻貓仔死--去。囡仔就大大憂悶。
惜á ê老父看見伊ê囝煩惱到按呢生就買一隻羊仔來予伊。囡仔得著連鞭受安慰，對伊ê老父說多謝。羊仔緊緊認伊做主人，就不止愛綴伊四界去。囡仔佮cheng-seⁿ ná親像相疼做好朋友。無佳哉！閣無偌久羊仔患著病。惜á勞心勞力看ē醫得á無，毋久袂用得，就深深苦痛紲目屎nih-nih-流。
好佳哉！隔幾nā日伊ê老母有福氣得著一個囝。惜á ê心即時平平安安，gâu疼痛伊新ê小弟，逐日無嫌著磨來抱伊。人講拍算嬰仔勇健，ē緊緊大漢。惜á掠伊ê福氣是真大到極。害ah！歷過幾nā月日久伊所寵幸ê小弟忽然間染著病，竟然離開世間，查某囡仔ê心十分慘悽，以後不時嚨喉管tīⁿ ná親像心beh piak破一樣。
有一日惜á佮伊ê老父出去行遊。In teh談論事先煩惱ê情境。到講起嬰仔ê死失了就查某囡仔恬恬ná親像心內teh詳細想。停tiap仔久有開嘴問伊ê老父有甚乜物通予伊到永遠未死。老父是真實服事上帝ê人，所以連鞭舉起耶穌ê名，共囡仔講獨獨是伊永遠活，紲有引聖冊所記載ê話，就是默示錄 1:18，講：「我已經永活，雖罔死擱活，到代代無煞」。老父閣有勸惜á著接納耶穌就通佮伊一樣。
咱大家攏著信耶穌來得著永遠活。
|
