論請牧師
1896.03 132 卷 P20-21
(大會ê 紀錄猶未通印佇遮，著後張ê 教會報chiàⁿ beh 印。 Taⁿ 將一項要緊ê 代志先通知恁。 大會有議論請牧師ê 條款，後來託仗幾nā人將所議論定著ê 來記，通回覆Hō͘大會准。 Taⁿ將大會所定著ê條款印佇遮予恁大家知。請逐所在教會ê兄弟姐妹去想，saⁿ-kap求上帝saⁿ-kap鼓舞勉勵；向望無偌久幾nā位ê教會請牧師去toà tī in中間。)
若會得thang 一所在請一个牧師是較好；若無氣力就幾nā位附近ê教會 通合做伙請。總是毋通傷濟位。論所費是定著牧師ê薪金攏著本地教會擔當。薪金自然著較濟傳道先生ê。 在唐山上少一年著差不多$150，有人拍算這爿著較濟。也著備辦牧師ê房間較闊。 若有幾nā位合做伙請牧師，牧師所蹛彼所在毋免另外請傳道--ê。 總是in hiah-ê所在毋通kan-ta將in往年所題傳道ê薪金拾作伙來做牧師ê薪金；是向望in舊底所題ê猶原著提，做牧師新ê所費著加題。
所費若攏設法好勢，著寫一個稟寄來予大會ê記書，看甚乜所在beh請，也年年beh出偌濟。 後來大會beh派人去查。 In來ê時著將一年ê薪金交清楚通交大會ê 總執事做頭年ê 路用。 Hia-ê受派ê人查了回覆大會，大會若准，著閣寫一個帖請某人來做牧師。彼个人若歡喜，大會beh佇彼个請牧師ê所在聚集設立伊做牧師。
後來年年ê薪金著交大會ê總執事通照時發予牧師。
|
