首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 論Thái-ko
論Thái-ko
卷期：第134卷 本次： 日期：1896/5 刊名：台南府城教會報 頁數：38
篇名：論Thái-ko [ Lūn Thái-ko ]
作者：
  顯示 : 漢羅 全羅 並列  

論Thái-ko(看利未記 13, 14 章).
1896.05 134卷 p.38-39

佇以色列ê百姓ê中間有時有人染著thái-ko ê病；彼號人ê艱苦真正大，比這爿thái-ko ê人敢有較傷重。人拄著這號病身軀就一直爛--去，ûn-ûn仔落手落跤，到身軀攏害，人就死。 這个病也袂醫--得，較gâu ê醫生攏無法得。卻人有時好，總毋是對食藥ê緣故，算是上帝恩典伊，予伊會家己好。
又閣一項ê艱苦是thái-ko ê人予上帝看in做無清氣，毋准伊蹛佇別人ê中間，也毋准伊入殿堂祈禱；的確著蹛佇曠野外無人到ê所在。看利未記13:45, 46，見若患著thái-ko--ê著拆裂衫，露現伊ê頭殼，掩嘴，ka-tī叫講：我lâ-sâm--ah，我lâ-sâm--ah！當患著thái-ko ê時真正沐著無清氣；著別間厝ka-tī徛起，踮佇營外。
設使thái-ko ê病若好，彼个人袂得通連鞭入營內佮人交陪。伊著叫祭司來kā伊驗；祭司看了著kā伊行禮數hiù血chhoā伊入營內。 猶過著另外徛起一禮拜久；到第八日予祭司chhoā伊到會幕，閣再獻祭抹血抹油，chiàⁿ ē清氣，通佮別人做，安然出入。
上帝到hiah嚴款待hit號thái-ko ê人是因為啥事？有人講是因為這號ê病會過人；若容允in toà tī別人ê中間，無hō͘伊另外khiā起，驚了眾人攏hō͘伊tò͘--tio̍h。
總是有別人講這個病bē過人，thái-ko毋免的確另外蹛；親像乃縵是thái-ko猶過是將軍(II王5:1)， Ki-khap-se是thái-ko猶過佮王講話(II 王 5:27, 8:5)。 Thái-ko另外蹛不過是因為上帝教in著按呢。
世間人拄著chhìn-chhái病攏是為著罪惡ê緣故。咱卻毋通拍算病人ê罪比好人ê罪的確較重。總是通講：世間人若攏無罪世間人就攏無病。 佇舊約ê時陣上帝若beh看眾病人做無清氣卻有理氣。 毋過伊無按呢設法。伊佇萬項病ê中間揀一項，就是這號thái-ko ê病，通顯明這個意思，予人看thái-ko ê人著連鞭想罪惡偌歹偌厲害。 Taⁿ若將thái-ko ê病來比並人ê罪惡有7項通講。

1. Thái-ko ê病真m̄好看，身軀白白，腳手teh爛， hō͘人看了會gāi-gio̍h厭惡。人ê pháiⁿ tī上帝ê面前也是án-ni。人做pháiⁿ有時做了歡喜誇口，別人也o-ló伊ê本事。 M̄-kú ta̍k項pháiⁿ其實是m̄好看，眾人所應該tio̍h厭賤。
2. Thái-ko ê病原本是小可，毋知影ê人看做無要緊。人做歹也是按呢，原本teh做ê時就掠做小可，無要緊ê事。
3. Thái-ko ê病的確ná久ná傷重，致到通身軀攏予伊害。人做歹也是按呢；起頭是歡喜做，後來變做罪惡ê奴僕，予伊較贏，把縛，路尾拖到地獄。我捌聽見講某所在有一個查某囡仔，伊ê身軀一位有略略仔麻，著去予醫生看。醫生一下看；看了講是thái-ko ê病。 彼个查某囡仔一下聽見就煩惱到beh死，暝日流目屎，攏無受安慰，是因為伊知影，毋是煩惱這tia̍p ê艱苦，是驚後日ê事。 Kiám-chhái伊ê伴愛安慰伊，勸伊毋免哭，因為是小可ê事，較無親像生粒仔ê疼；chiah-ê不過是戇話，出對 in 毋知影nā-tiāⁿ。有時人行歹，予伊ê朋友安慰伊講是小可無要緊ê代誌。總是人毋通按呢拍算，的確著真煩惱，求上帝赦罪chiàⁿ會安心(羅馬6:21，23)。

4. Thái-ko ê身軀會ná久ná麻。照咱看in hit號ê人ê常常大疼。有人講無的確，因為病ná重身軀較毋知疼。人做歹也是按呢；起頭teh做ê時陣，伊ê良心醒，予伊驚。後來ná行ná慣勢，失落伊ê良心親像予火燒ù (提摩太前書4:2)，行歹攏無驚，攏毋知罪ê款。
5. 這號ê病人袂曉得醫好；咱人有罪也袂曉得救家己，也無人會救咱。 Thái-ko若得著好是對上帝恩典伊:咱得著救也是按呢。
6. Thái-ko ê人毋通入會幕場，也毋通入營內踮佇百姓ê中間。 這個通譬喻行歹污穢ê人袂堪得交陪上帝；也袂堪得入教會佮上帝聖ê百姓相交陪(詩篇1:4，5，默示錄 21:27，22:15)。
7. 人有thái-ko ê病á是無thái-ko ê病是予祭司定著，伊袂堪得kan-ta 家己拍算。看利未記 13:1-44。人ê皮膚若生過，á是癬，á是斑點，á是白斑，伊著就近祭司。 祭司照上帝所設ê法度著 kā伊驗。設使祭司擬定是thái-ko ê病，彼个人就定著是thái-ko ê人，著去踮佇外面ê所在。雖然人諍無影是thái-ko ê病，猶過是無路用； 這號事人袂注得意。猶原按呢人kiám-chhái講伊是無罪ê人，毋過伊無的確是無罪。 著予上帝審判chiàⁿ知；上帝若講咱有罪，咱chiàⁿ定著是有罪ê人。
咱chiah-ê污穢，咱ê義親像驚人ê破衫；咱親像已經ta ê葉，因為有罪拄著趕逐，予風吹來吹去。莫得家己騙；淫亂，拜偶像，行姦淫，做亂黨，愛男色，做賊，貪心，食酒醉，詈罵，酷毒，袂得著上帝ê國。咱chiah-ê有人早是按呢； taⁿ倚靠咱ê主耶穌ê名，佮咱ê上帝ê神，有洗清，成聖，稱做義。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461