潘牧師
1899.10 175 卷 p.73-74
舊年三月ê教會報有記講：「Taⁿ咱台南ê教會已經有兩个本地牧師，」就是潘牧師佮劉牧師。 Taⁿ可惜潘牧師已經過往。在八月十一ē晡阮接著電報講伊初10就是拜四ê昏，佇林後過身。 Hit時三禮拜前阮接著消息知伊破病傷重。 宋牧師就落去林後看伊。看了chiah teh想潘先生kiám-chhái ē堪得拖兩三月日久，無辦phoe伊hiah緊就離開世間。
論伊ê來歷佮過身ê情形向望別日會得通較詳細記佇教會報。總是佇遮愛講幾句就好。
潘Bêng-chu出世佇1865年，本底屬佇Giâm-chêng ê教會。差不多十歲 hit時伊頭一擺聽道理。到十六歲就入大學，讀幾那月日久就佇府城領洗禮。伊二十歲就出學去做傳道--ê，所經過是照下底記hiah-ê所在，就是岡仔林，Ka-poà-soá，Ka-la̍h-po͘，東港，佮澎湖。後來教師會請伊來蹛府城鬥教中學。
三四年前咱台南列位ê長老做伙聚集佇府城紲設大會。 潘牧師kài一知設大會ê理氣，有大出力鬥做成這號大利益教會ê方法，所以hit-tia̍p大會同心請伊做記事。咱大會ê事情無人比伊khah知影。到舊年3月12日大會聚集佇林後禮拜堂設立伊做牧師。伊當牧師ê職較無一年半nā-tiāⁿ。伊實在是主盡忠ê奴僕；是大大利益教會ê差用；是咱真好交陪ê朋友；也是真學問ê先生。 Taⁿ伊過身lah！咱ê心袂免得憂悶到袂顧得，因為南路hit五个同會是親像無牧者ê羊群，也閣通教會無通閣得著伊ê指示。總是家眷ê憂悶比咱ê是嶄然khah深。願天父安慰in。今年潘牧師只有35歲nā-tiāⁿ。咱教會有真大欠工。論上帝召這个大利益教會ê中年人去，咱猶袂知是為著甚乜因端，猶袂知上帝有甚乜好意思佇teh。佇教會內有甚麼人歡喜來補伊ê缺mah？
在希伯來11:4節ê意思是「亞伯雖然死猶過ná親像猶原teh講話。」這兩月日前潘牧師寄一篇論予阮。 Taⁿ將hit篇論記佇下底，就是伊雖然死猶過猶原若親像佮咱講話。
|
