清國戰事
1900.11 188 卷 p.85-86
現時北京清國ê權柄無一定甚乜人teh掌，親像鬆鬆散散ê款式。論西國in決意beh將皇太后，端親王，佮義和團匪黨首hiah-ê來辦罪。又閣in要緊beh扶助光緒君猶原予伊登極。論到光緒君咱無的確知現今ê蹤跡怎樣。卻有日報teh講西國兵若出北京就光緒君連鞭ē倒去。現時李鴻章佮外國ê欽差teh議和，日報也講中國願賠出銀4,0000,0000。論到土匪刣死教會中外國ê人氏，咱已經知差不多有八十个大人，三十个囡仔ê人命。在地信主ê人也失幾nā千條ê人命。有幾省ê總督究實是做義和團匪ê主。親像山西ê總督用計去引誘幾nā十外國教士佮先生娘，騙in講beh保護到海墘。一下入衙門就下毒手害死幾nā个，其餘是等義和團匪來刣。Taⁿ hit个總督著驚有家己去自盡。
現時佇廣東省百姓teh反。In ê意思卻毋是愛害外國人，其實是愛sak倒清朝，紲扶新君。In大teh向望西國beh幫助這層事。
|
