Lîm Âng-hiaⁿ
(Kam Bo̍k-su kì--ê.)
1900.11 188 koàn p.87-88

Kīn-lâi goán thiaⁿ-kìⁿ chāi Sin-káng-ke tī 9 goe̍h 22 ji̍t, Thoân-tō sian-siⁿ Lîm Âng (chiū-sī Lîm Tiâu-khoe) lī-khui sè-kan. Kai-chài, in-uī Siōng-tè ê toā in, hit-ê lâng chin-chàiⁿ thang khó-chhú.
Cha̍p-só͘ nî chêng, i tuì Pó-táu-á lo̍h-lâi I-koán hō͘ I-seng táⁿ-tia̍p ba̍k-chiu, chóng-sī bē thang chiàu goân, só͘-í i sūn hit-tia̍p lâi o̍h tha̍k phòng-jī ê chheh; koh, in-uī i bô loā-kú put-chí koàn-se̍k, iā in-uī lâng ū hó bô͘-iūⁿ, goán chhiáⁿ i chò Chheⁿ-mê-o̍h ê kang. I khiok put-chí chìn-pō͘ lâi liāu-lí, chiū ū lī-ek hiah ê ba̍k-hoe ê ha̍k-seng.
Chāi 1891 nî, Lé Ko͘-niû chhiáⁿ i koè-khì Choân-chiu lâi siat Chheⁿ-mê-o̍h. I tī-hia toà káu goe̍h ji̍t kú, hit-sî kà kuí-nā lâng ē-hiáu tha̍k, iā ē-hiáu chò in teh ēng ê phòng-jī chheh.
Tò-tńg-lâi, i iû-goân tī Hú-siâⁿ chò chit-hō ê kang. Gō͘ nî chêng Tâi-oân toā jiáu-loān hit-tia̍p, Âng-hiaⁿ siông-siông chhut-khì goā chng kóng tō-lí. Kàu i kuí-nā ê ha̍k-seng khì Tang-kiaⁿ, iā Chheⁿ-mê-o̍h chiām-thêng ê sî-chūn, Kàu-sū-hoē ū chhiáⁿ i toà Oan-á-lāi chò thoân-tō sian-siⁿ, m̄-kú in-uī hit ê só͘-chāi sī phian-phiah ê sió chng-siā, Âng-hiaⁿ tī Sin-káng-ke chiū chhoē-tio̍h chi̍t keng toā chhù thang chò Lé-pài-tn̂g; só͘-í tuì hiaⁿ-tī poaⁿ-khì hia chū-chi̍p, i it-hoat jia̍t-sim sì-kè thoân-tō ín-chhoā lâng lâi sìn Chú.
Kū-nî Kam Bo̍k-su kap Bo̍k-su niû khì sûn Sin-káng toà hia cha̍p ji̍t kú, ū khoàⁿ-kìⁿ 15 lâng niá sé-lé, chin-chiàⁿ thang kóng sī Âng-hiaⁿ ê kang-tiâⁿ só͘ kiat ê koé-chí.
Hit-tia̍p m̄-nā Kàu-hoē-lāi ê hiaⁿ-tī, chí-moē o-ló i, iā ū sè-sio̍k lâng o-ló i hó bô͘-iūⁿ, kóng i sī hó sèng-tē ê lâng, sī put-chí khiam-sùn, iā hoaⁿ-hí khek ka-tī ēng tú-ha̍p ê tō-lí lâi bián-lē chèng-lâng. Che kó-jiân ū iáⁿ, in-uī Âng-hiaⁿ chin jia̍t sim chīn-le̍k ta̍k lé-pài n̄g saⁿ ji̍t chhut-goā pò͘-tō.
Goán m̄-bat khoàⁿ-kìⁿ i kiau-ngō͘, á-sī hián-chhut toā siū-khì. I éng sī khoài-khoài khó͘-khǹg ê lâng, bô chip-áu, bô kò͘ ka-kī; koh m̄-bián hō͘ goán siông-siông lâi an-uì, á-sī in-uī i ū sím-mi̍h thang hiâm thang hāi Kàu-hoē Ńg-chiáⁿ loán-jio̍k ê sū.
Koh chi̍t hāng chiū-sī Âng-hiaⁿ chīn kín-sīn i só͘ kóng ê oē, iā bô iàu-kín lâng chhut-thâu o-ló i á-sī hiâm i. Khah iàu-kín, i ài tiām-tiām chò ta̍k-ji̍t pêng-siông ê pún-hūn, tuì án-ni lâi kui êng-kng Siōng-tè, iā hō͘ pa̍t lâng kap i pîⁿ-pîⁿ hióng-siū Chú ê toā-un. Só͘-í hoē-iú tio̍h kám-siā Thiⁿ-pē, in-uī lán só͘ thiàⁿ ê hó pêng-iú í-keng ū thiaⁿ-kìⁿ Chú ê siaⁿ, kóng, "Hó ah, lô͘-po̍k tiong-hō͘ ah, lí tī chió-ê í-keng ū chīn-tiong, Goá beh ēng chē-chē-ê thok-tiōng lí, thang ji̍p lí ê Chú ê khoài-lo̍k."