Cheh-khì
1908.05 278 koàn p.45-46

Thian-tiong Cheh.
Tiong-le̍k muí nî gō͘ goe̍h chhe ū khoàⁿ-kìⁿ lâng teh pa̍k kiⁿ-chàng, pê liông-chûn, iā gín-á kat ngó͘-sek-soàⁿ. Taⁿ lâi chhâ khoàⁿ sī uī-tio̍h sím-mi̍h in-toaⁿ chiah ū che hong-sio̍k.
Chiàu chheh-ni̍h só͘ kóng chāi-chá Chhó͘-kok ū chi̍t ê tāi-hu-koaⁿ miâ hō-chò Khut-goân, iā miâ kiò Khut-pêng. I ho̍k-sāi Chhó͘ Hoâi-ông in-uī hō͘ kan-sîn chàu pháiⁿ-oē tì-kàu pián khì Kang-lâm. Khut-goân hit-sî sim chin loé-chì iu-būn, ū chò chi̍t phiⁿ lî-so ê hù. Tī kang-piⁿ teh gîm, gîm-liáu chiū tâu Pu̍t-lô kang (sic.汨羅江應該讀Be̍k-lô kang) im sí.
Hit-sî chhó͘-kok ê lâng ēng sè chiah chûn-á saⁿ-cheⁿ beh khì kiù i, chóng-sī kiù bē tit-tio̍h. āu-lâi muí nî nā kàu hit sî-cheh lâng ēng tek kóng-á té bí, hiat tī chuí-ni̍h hō͘ i lâu, ì-sù sī beh chè-hiàn i. Kàu Hàn-tiâu Kong-bú-tè, hit-sî ū chi̍t ê Tiông-sa ê koaⁿ, miâ Au Hoê khoàⁿ-kìⁿ chi̍t ê lâng kā i kóng, Goá sī Sam-lû ê tāi-hu, lín só͘ chè-hiàn ê bí khó-sioh hō͘ kau-lêng chia̍h-khì. āu-lâi lín tio̍h ēng kek-chhiū hio̍h that ba̍t tek-kóng ê chhuì-kháu, ēng ngó͘-chhái ê si-soàⁿ lâi pa̍k-teh, in-uī chit nn̄g hāng mi̍h sī kau-lêng só͘ uì-khī--ê.
āu-lâi lâng ēng hit hō chhiū-hio̍h lâi pau chàng, iā ēng ngó͘-sek soàⁿ lâi pa̍k. Hiān-sî lâng khiok ēng tek-hio̍h lâi pau, iā ēng kiâm-chháu lâi pa̍k. Kàu gō͘ goe̍h chhe gō͘ toà khì pê-liông-chûn, ài beh chè-hiàn Khut-goân. M̄-kú āu-lâi lâng soà ēng hit hō chàng khì chè-hiàn in ê chó͘-kong.
Chheh-ni̍h ū nn̄g kù teh kóng-khí gō͘ ji̍t cheh pê liông-chûn tàu gâu cháu sī pi-ai Khut-goân ê poa̍hlo̍h-chuí, ài kín-kín khì chin-kiù i ê ì-sù. Chóng-sī ná-thoân ná sit-chin soà lia̍h-chò chhit-thô iû-hì ê kò͘-sū.
Chhit-se̍k Cheh.
Kò͘-sū Kûn-hong teh kóng thiⁿ-téng ū nn̄g hō ê chheⁿ-sîn. Chi̍t hō kiò chò Khian-giû tī thian-hô ê sai-pêng; koh chi̍t hō miâ chò Chit-lú tī thian-hô ê tang-pêng. Chit-lú sī Thian-tè ê cha-bó͘-kiáⁿ. In-uī i gâu chò lú-kang nî-nî khîn-lô teh chit, Thian-tè lîn-bín i ka-tī toà bô tâng-phoāⁿ chiū kā i phoè-chhin kè hō͘ Khian-giû. Chit ê Khian-giû ū lâng chheng i chò Gû-nn̂g. Bô phah-sǹg kè liáu-āu Chit-lú chiām-chiām lán-tō hong-hoè chit kang, tì-kàu Thian-tè siū-khì chiū bēng-lēng i iû-goân tio̍h tò-khì thian-hô ê tang-pêng, tī-hia ka-tī toà. Muí nî chún i chi̍t pái tō͘ koè thian-hô lâi kap Khian-giû siong-hoē. Chiàu chheh-ni̍h ū kóng, Giû-Lú, nn̄g hō chheⁿ, to̍k-to̍k chhit-se̍k chi̍t pái saⁿ tú-gū. Só͘ í nā kàu chhit goe̍h chhe hit nn̄g hō chheⁿ chiū ná kiâⁿ ná saⁿ kīn-oá; nā koè chhit-se̍k chiū chiām-chiām lī-khui.
Chheh-ni̍h iā kì-chài kóng, Tông-tiâu Hiân-chong hông-tè tú-gū chhit-se̍k bēng-lēng lâng ēng ngó͘-chhái ê tiû-toān lâi tah koân lâu kap keng-tiān, chha-put-to chiâⁿ pah tn̄g koân. Lāi-bīn pâi-lia̍t hiong-hoa, tê, kó í-ki̍p chiú-se̍k lâi chè-hiàn hit nn̄g hō chheⁿ.
Hit mê Hiân-chong hông-tè ê kiong-hui, kiong-ngô͘ tāi-ke the̍h káu khang chiam khì goe̍h-ē ēng soàⁿ ǹg goe̍h lâi chhng. Nā chhng chiam khang ē-tit-koè, hō-chò tit-tio̍h khiáu. Peh-sèⁿ-kan nā kàu hit sî-cheh, iā ū pī-pān koé-chí kap piáⁿ-liāu sio-hiuⁿ tiám-chek pâi hiuⁿ-oàⁿ-toh tī tiâⁿ-ni̍h, kóng sī teh hàu chhit-niû-má.
Chheh-ni̍h ū teh kóng, Chhit-se̍k Khian-giû, Chit-lú tō͘ koè thian-hô, ke-ke chhù-chhù teh chhng khit kháu ê chiam. Hiān-kim ê lâng put-kò kan-ta pī-pān lé-mi̍h lâi hàu-kèng, khiok bô kia̍h chiam ǹg goe̍h khì chhng.