埔里社ê消息
(曾牧師記--ê.)
1910.07 304 卷 p.57-58
近來佇遮無甚麼好消息通講。現時佇遮久久無落雨，米粟大起價；金chi̍t箍糴米chi̍t斗；蕃薯chi̍t箍銀150斤nā-tiāⁿ。
閣現時佇埔社ê官府佮百姓真大無閒，teh出力設法兩項大要緊ê工。
(1)盡力設法beh予生番降服歸順，所以著用隘勇佮百姓ê工真濟。
(2)對舊年年尾行工teh開chi̍t條ê輕便鐵路，對埔里社街南門起點，beh開透二八水。這頭鐵路是對五城，水社Ô͘-ē，蓮花池，水里坑，集集chiah-ê所在經過；到二八水接火車ê大路。這條鐵路ê工是對埔社支廳所管ê百姓，照家甲逐戶著出一人輪流做工：著做15日為chi̍t期chiah閣換班，工錢10分工4角，有ê較出力ê有6角銀，較貧惰ê 3角外，á是4角銀。這條鐵路現時有開三舖外lah；按呢算是一半較加lah。這條路限到本年9月就ē開通透二八水；予埔里社路利便出入。
近內生番也是真平順；雖然進山移路也毋免交戰，官府真gâu用好ê法度。論交換ê事官府有設交換局，攏總歸官交換，百姓袂用得。設使百姓偷換就真嚴辦罪。
佇新曆5月間官府有派250名隘勇去北路宜蘭助戰，beh拍生番；teh向望無偌久beh對埔社ê東北直直拍到宜蘭相接ê隘路。若按呢，生番就快歸順降服。
|
