八罩
(許Sin-teng，王oá tông記--ê)
1910.09 306卷 p.73
澎湖另外有chi̍t个海嶼叫做八罩；算是無偌大。長差不多5里路，闊chiàⁿ有2里；有分做3社，計共倚 700 戶。
佇遮ê百姓真信佛，in ê佛服侍真濟，每戶至少也有十外身。Thài有hiah濟？因為in內面若有大人抑是囡仔死，也內面湊巧有人破病，in就講是hiah ê死ê beh討雕金身，in就裝一身佛。娶某ê號做客官，囡仔號做五才；婦jîn人號做夫人，查某囡仔號做娘囝。佇遮ê尪姨真濟，差不多倚20人。In遮ê人若病疼罕得請醫生，食藥，攏是問佛，燒銀紙hē豬羊。總算in ê童 法官尪姨足足有百外人，想了實在通可憐。
論到佇遐傳道ê機會無夠偌好，因為遐ê人真無閒。查甫人較坐無佇厝，攏是行船，討海，出外趁食。婦jîn人攏teh作穡，in所收ê攏是蕃薯蘆黍土豆nā-tiāⁿ。
論到遐拜上帝ê人無偌濟，較濟無全家。In拜上帝都也可取。禮拜日念主日神糧，除細漢囡仔以外，通講攏有念。拜三祈禱會有來ê人攏照輪流去來祈禱。照按呢看這个教會若有人出力來鼓舞設法予in大家較同心信主，也得著聖神ê力，穩當教會ē振興。
|
