Ké Ki-tok
Tang O͘-goân kì--ê.
1912.02 P.14

Ū chi̍t lâng ká-mō͘ Iâ-so͘ ê miâ kiû châi-lī, kóng i oá-khò Iâ-so͘ sì-kè kiâⁿ koh-iūⁿ ê koân-lêng, bô lūn i-pīⁿ koáⁿ-kuí lóng ē. Kuí-nā pái lâi Sin-chhī táⁿ-tia̍p chèng-thâu, lóng sī ēng pin-nn̂g-hio̍h chò tê-thâu; bô lūn pîn hù, chì-chió tio̍h chi̍t-kho͘ teh tī pin-nn̂g-poâⁿ chò sian-siⁿ ê lé. Tī boē kiàn chèng ê sî, tāi-seng gîm-si kî-tó. Kàu soah chiū the̍h pin-nn̂g-hio̍h khí-lâi ut; teh ut ê tiong-kan chiū liām kóng, Láu-hio̍h ut láu-hio̍h, toàn lí chèng-thâu toàn tio̍h-tio̍h, kā jī uī siâ-sîn saⁿ tú-tio̍h, sian-sian m̄-thang chia̍h i-seng ê io̍h.
Nā gū-tio̍h chhiok-loān ê chèng, bô lūn phòng-hong pá-tiùⁿ, á-sī tāi-chhiâng pì-kiat, siáu-chhiâng té-chhiah, ia̍h sī tuì-tiōng hun-ian. Chiàu-khoàⁿ ēng hit-ê hoat-tō͘ put-chí thong, thiaⁿ i-ê kháu-thâu-gú ia̍h put-chí sim-sek; kâm chi̍t-chhuì ê kāu-bun-ian tuì gín-á ê phīⁿ-ba̍k-chhuì toh kā i phuh-lo̍h-khì, gín-ná bē-bián-tit ka-cha̍k ka-chhiù lóng-chóng ū; chiū koh liām kóng, Hun-ian bū-lo̍h--khì, hong-siâ thè lī-lī.
Nā tú-tio̍h chi̍t poàⁿ-ê-á khah oh-tit i-tī ê pēⁿ, lóng-sī toàn in ê hong-suí bâi-chòng m̄-tio̍h só͘-chāi, tī im-kan pháiⁿ khiā-khí, liân-luī kàu in ê kong-á-má lâi teh chok-lōng; tì-kàu ke-lāi ê lâng thiaⁿ-liáu bē-bián-tit ū tám-khiok ê khoán-sit.
Lūn i tī chêng-nî khiok ū chio 12 lâng beh chò ha̍k-seng, tú-tú sī beh chiàu Iâ-so͘ ê khoán, tiāⁿ-tio̍h chi̍t ji̍t tī chhù-lāi hoē-gī, bô gî-gō͘ khì hō͘ in pún-chng ê thoân-tiúⁿ chòng-teng bú-lōng soàⁿ--khì, tì-kàu tāi-chì bē-ē chiâⁿ. án-ni èng-giām Sèng-chheh só͘ kóng ê oē, chiong-lâi teh beh ū ké ê Ki-tok chhut-thâu (Lō͘-ka 21 chiuⁿ 8 chat). Hāi! Lán thiaⁿ-kìⁿ chit-hō ê uí-khiok si̍t-chāi kiám m̄-sī thang hoân-ló, kàu-hoē-tiong ê hiaⁿ-tī chí-moē chē-chē siū-tio̍h i ê ín-iú, soà ná-chhin-chhiūⁿ giâ-sin khì-kū ê pîn-kù lah.