Kiaⁿ Tē-ge̍k
1912.06 P.6-7

Chêng-nî ū chi̍t-ê Thoân-tō Sian-siⁿ pò͘-tō ê tiong-kan sī kóng chi̍t-kù-oē, chiū-sī kóng, "Goá nā bô kiaⁿ Tē-ge̍k ê kan-khó͘, goá iā beh khì kiâⁿ pháiⁿ." Hit-sî goán chiong chit kù oē mn̄g lâng khoàⁿ kóng-liáu tio̍h á m̄-tio̍h. Ū chi̍t-ê Ko Thian-sù chò chi̍t phiⁿ-lūn lâi phoe-phêng chit-kù oē. Taⁿ chiong i-ê lūn soà ìn tī ē-té hō͘ lín khoàⁿ.
Lūn hit-ê thoân-tō--ê teh gī-lūn thian-tông tē-ge̍k ê tō-lí, ài hō͘ lâng sìn, lâi kóng hit ê oē, goá siūⁿ sī m̄-tio̍h, cháiⁿ-iūⁿ ah? Lâng tī sè-kan lóng ū kiaⁿ tē-ge̍k ê kan-khó͘, chóng-sī iû-goân beh khì choè pháiⁿ; ná chhin-chhiūⁿ lâng chai poa̍h-kiáu ē hō͘ koaⁿ-hú hêng-hoa̍t, chóng-sī iû-goân ū hit hō poa̍h-kiáu ê lâng. Kiám-sī tē-ge̍k ê kan-khó͘ oē chó͘-tòng lâng kiâⁿ-pháiⁿ mah? M̄-sī; ná chhin-chhiūⁿ Sèng-keng só͘ kóng, "Lu̍t-hoat put-kò sī hō͘ lâng chai choē nā-tiāⁿ" (Lô-má 3:20).
Nā-sī án-ni lâng beh m̄ kiâⁿ-pháiⁿ, tek-khak sī tio̍h sìn Tsú oá-khò Tsú, chiah ū hoat-tit, m̄-sī kiaⁿ tē-ge̍k ê kan-khó͘, chiū oē án-ni-siⁿ; khoàⁿ Lô-má 7: 24, 25. Koh Siōng-tè in-uī lâng sìn Iâ-so͘ Ki-tok lâi chheng i chò gī, soà ēng têng-thâu siⁿ i ê sim, hō͘ i ū la̍t thang kiâⁿ-hó; nā bô, lâng lóng sī bô khuì-la̍t, thái-thó ū lâng in-uī kiaⁿ tē-ge̍k ê kan-khó͘ chiah bô khì kiâⁿ-pháiⁿ leh? Só͘-í boē-tit-thang án-ni kóng; che sī m̄-tio̍h, iā sī m̄-hó. Chiàu goá gōng-gōng teh kā siūⁿ, eng-kai tio̍h kóng, "Goá siūⁿ Siōng-tè ê thàiⁿ lán só͘-í m̄-káⁿ khì kiâⁿ-pháiⁿ" (Iok-hān 3:16).