Tiong-kok iû-le̍k
1913.10 P.5

Kīn-lâi ū chi̍t uī pêng-iú khì Tiong-kok kuí-nā só͘-chāi kiâⁿ-iû. Taⁿ ài chiong i só͘ khoàⁿ-kìⁿ só͘ keng-koè pò kuí-nā hāng hō͘ lia̍t-uī chai.
Ē-mn̂g.
1. Hêng-chèng. Tuì kong-ho̍k í-lâi, sui-jiân chē-chē hāng ū ké-oāⁿ, iáu-kú lūn tī-an ê sū boē thang kóng sī an-chēng; in-uī chha̍t-á chin chē, mê-ji̍t siông-siông ū thau-the̍h kap chhiúⁿ lâng ê sū, sīm-chì liân lâng soà thâi-sí ia̍h káⁿ. M̄-nā án-ni nā-tiāⁿ, liân chûn-chiah chhut ji̍p ê sū ia̍h sī bô siat-hoat, kap Chheng-kok koán-hat ê sî bô koh-iūⁿ. Chhin-chhiūⁿ goán hit ji̍t chûn tú-á ji̍p káng boē pha tiàⁿ kàu hó-sè, hiah ê sái sam-pán-á ê lâng chhin-chhiūⁿ hîm chhin-chhiūⁿ hó͘ ti̍t-ti̍t chiūⁿ chûn, hêng-lí loān poaⁿ loān koāⁿ. Siat-sú lâng nā bô chin chim-chiok, hêng-lí chiū hō͘ in koāⁿ bô--khì. Bat thiaⁿ-kìⁿ ū lâng m̄ nā hêng-lí bô--khì, liân lō͘-chiò ia̍h chò-hoé bô--khì, āu-lâi chin huì-khì. Nā ū beh khì hia ê lâng, chiūⁿ lo̍h ài cha̍p-hun chú-sè chiū-sī.
2. oē-seng. oē-seng pí goá gō͘ la̍k nî chêng khì ê sî bô sím-mi̍h cheng-chha, ke-lō͘ iû-goân chin kiaⁿ lâng chin chhàu-bī; ū só͘-chāi put-sî tâm-lo̍k-lo̍k. Thang kóng káⁿ sī tē it kiaⁿ-lâng ê só͘-chāi. Chiàu goá só͘ ū khì ê só͘-chāi, chhin-chhiūⁿ Kńg-tang, Soàⁿ-thâu, Tiô-chiu, Hok-chiu, Siōng-hái, Ji̍t-pún lóng boē bat khoàⁿ chi̍t só͘-chāi kàu hiah lâ-sâm. Goá phah-sǹg hit tah nî-nî un-e̍k lóng bē soah, ia̍h káⁿ sī in-uī án-ni? Hiān-sî nā ū ē-lâm ê lâng tah chûn tuì hia keng-koè kàu Lâm-iûⁿ, chiū m̄-chún in chiūⁿ lio̍k, sī kiaⁿ hiah ê lâng ē toà un-e̍k khì hia thoân-jiám. Che sī tuì oē-seng put-liông ê liân-luī.
Sui sī án-ni, iáu-kú ū chi̍t hāng ê hó goá m̄ káⁿ bâi-bu̍t, chiū-sī goán chhin-ba̍k ū khoàⁿ-kìⁿ koaⁿ-peng khì chhò peh-sìⁿ ê a-phiàn châng. Tuì án-ni thang chai koaⁿ-hú ū tì-ì teh tû a-phian. Hiān-sî ia̍h khah bô khoàⁿ a-phiàn-hun keng.
3. o̍h-tn̂g. Ē-mn̂g ia̍h bô sím-mi̍h toā keng ê o̍h-tn̂g, khah chiâⁿ mi̍h ê o̍h-tn̂g lóng sī tī Kó͘-lōng-sū; iū-koh sī kàu-hoē só͘ siat--ê. Kok téng ê o̍h-tn̂g lóng ū, chiông-tiong khah chhut-miâ--ê, chiū-sī Eng-Hoa chu-īⁿ.
4. Pài-tn̂g. Chāi Ē-mn̂g ia̍h ū kuí-nā keng pài-tn̂g, chi̍t keng tī Sin-ke-á, koh chi̍t keng tī Tek-chhiū-kha. Tī Kó͘-lōng-sū ia̍h ū. Chiàu goá khoàⁿ in chin gâu chéng-tùn.
5. Sin-bûn. Tī hia ū sè-sio̍k lâng só͘ siat Hàn-bûn ji̍t-ji̍t ê sin-bûn-choá. Tī Kó͘-lōng-sū ū kàu-hoē só͘ siat Lô-má-jī ê Sèng-hoē-pò, kīn-lâi ū koh siat Hàn-bûn ê Tō-lâm-pò. Sèng-hoē-pò muí-goe̍h chhut nn̄g pái, Tō-lâm-pò muí lé-pài chi̍t pái.