小傳
1913.10 P.8-9
蔡三喜屬艋舺ê教會，tī 1900年12月31日有領洗禮。論服事上帝不止熱心，對社會亦和睦，所以會內kap 會外 ê人不止o-ló 伊。 Tī 1905年1月8日有先做執事。伊當執事ê 職 m̄-nā料理數項，亦有鬥幫贊傳道理。到今年3月執事有滿任， hit-霎眾兄弟姊妹有揀伊著做長老。督會亦歡喜，總是iáu未設立無拍算伊 tī 7月29日就過往，破病頭到尾11日久nā-tiāⁿ.
陳Siah亦是屬艋舺ê教會。伊 tī 20 外年前就信道理，亦bat去Tamsui神學校讀冊，亦有傳道理10 外年久。後來有歇睏tī艋舺做醫生。論服事上帝亦真熱心。Tī 1908年5月24日有先做長老，伊m̄若鬥料理教會ê事務亦常常鬥幫贊傳道理。無拍算tī今年6月17日有染著 tiông-chek hû-su ê病，入tī台北醫院治療。可惜攏無應效， 到 8月2日有過往tī-hia， 4日有kng來禮拜堂葬式。 Hit日來會葬 ê人會外 kap 會內總共有450人，坐車有oá 200人，來送葬 ê牧師有4人，傳道師有5人。艋舺 ê教會失落這兩人實在有欠力。 |
