首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 科學佮信仰
科學佮信仰
卷期：第558期 本次： 日期：1931/9 刊名：台灣教會報/芥菜子 頁數：15
篇名：科學佮信仰 [ Kho-ha̍k kap Sìn-gióng ]
作者：陳能通 Tân Lêng-thong
  顯示 : 漢羅 全羅 並列  

科學佮信仰
陳能通
1931.09, no. 558 (KCC, no. 68), pp. 15-18

（看見濟濟的青年輩，為著現代的科學，致到信仰搖動；所以夯筆來譯寫淡薄）。
Tuì 19世紀以來，科學實在有非常的大進步。 已經發見，佇物質內有囥蒸汽，電氣的大氣力；遮的力，今仔日有做了真大的工程。 火車，電車會走；電話，電信會通；電火會光；其他也有無聲電話（ラヂオ）發聲的寫真（トーキー）佮電視（テレヴ井ジヨン）；遮的攏是科學所賞賜的。 閣有天文鏡，會看到幾若億年的遠，也有顯微鏡；會看至微細的細菌。 科學者的手一下摸著物質，宇宙內神秘的真相攏顯出；將來boē明的事件攏tuì in的手來闡明。 實在科學者的工程是真貴去！
科學的進步已經有夠按呢，世間人對遮的新的智識，毋知有比以前較親近上帝也無？ 無啦；反轉若離開上帝，愛用進步的科學來家己創一個別天地。 科學上的智識是上帝對人類所賞賜的一項；總是人類得著這號賞賜ná濟，soà ná離開上帝，boē記得賞賜的源頭，愛看輕伊，愛否定伊的存在。 撒旦也隨時真gâu利用；就是將科學進步的武器予人類中第一gâu的科學者，予in好膽來否定上帝，反對伊的聖冊，也破壞對神的信仰佮看輕聖者。
所以近代文明的世界有建立一間真媠的宮廟，佇遐用科學做偶像，科學者做祭司，來聚集萬人的敬拜，這號宮廟的祭司，soà包辦日常百般的事，以及神佛的事。 所以tuì 19世紀以來，基督教會不止掛慮這項事，續想，著怎樣來佮這號宮廟的祭司相迎合。 上帝的道成做肉體來踮佇咱的中間，伊tuì在室女馬利亞來出世，閣活的事，再臨的事，其他主所行濟濟的神跡；遮的攏是科學者所無承認的所在。 所以近代的基督教會較常發將遮的事胡塗來隱瞞。 致到上帝所做遮的事業若失力，soà予現代的人攏愛好否定遮的事，予聖冊大部分親像做廢物的款。
咱踮佇這个時代；有真媠的宮廟佇咱的目前。 濟濟的信徒也去teh參拜。 In去，若問宮廟的祭司看有上帝也無？ 遐的祭師應講，"也有上帝；阮攏毋知。用這个宮廟內的神器，就是試驗管、顯微鏡、天文鏡攏boē看見彼款物。所以無上帝的存在。" 已經無上帝，就別項攏無問題。 這个宮廟的信徒攏起來看輕咱，戲弄咱，掠咱做迷信的人。 所以有時soà家己想講："咱寧可soà來去服事佇這間媠的宮廟內較贏。
佇這時後面有聲teh講："我以外毋通有別的上帝。""智識的人佇佗落？經學士佇佗落？" 閣講："我欲滅無智慧的人的智慧。" 聽見這號聲予咱閣想倒轉。所以咱猶未敬拜佇這號宮廟的時，著事先想這幾若項。 (1) 科學的智識是親像將來世界的態勢，會破壞咱的信仰，抑是會幫贊咱的信仰？ (2) 科學者敢攏著做這號宮廟的祭司麼？ (3) 科學敢果然有根本tek的鎖匙夠額通審判上帝的話 ─ 聖經佮否定上帝的存在麼？ 請對這三項來想科學是甚麼？
1. 科學佇過去一百外年的中間，明明是信仰的破壞者。 今仔日人類一般的態度，毋是事先有敬畏上帝的心，是事先求科學tek證明的心。 所以oh得證明的事大概就按呢共伊否定；這是現時的人普通的態度。 這號態度是對科學的進步來養成--的。 所以科學的進步事實上是信仰的破壞者，這是明明。
總是科學的本質的確毋是按呢，科學是人所捌關係佇上帝的本事的智識。所以宇宙若是上帝的本事，聖冊若是上帝的話，自然這兩項無矛盾的所在；一爿的智識是做另一爿的證明，大家相幫贊，就是關係上帝的本事 ─ 宇宙 ─ 的智識若ná進步，就會益發確明上帝的話真理。又閣信上帝的話的真理來看宇宙的時，關係宇宙的科學tek智識會加添ná深。 原來人的智識是上帝所賞賜有限的物。 將有限的物欲一盡推量上帝的無限，這是真大的褻瀆，只有這號有限的智識，對上帝的恩惠，若會得ná加添的時（就是科學ná進步的時），遮的科學者著將所加添的智識來感謝上帝，益發著利用來顯明上帝的本事，這chiah是應該。 按呢就科學毌是信仰的對敵，反轉是做信仰有力的女婢。 女婢若盡職是尊貴，若攀過伊的職權能力以外，來侵犯主人的權，這是大的僭權。 信仰的若將女婢來做偶像跪拜的時，就變做第一歹的偶像崇拜。
2. 毋旦普通人，連科學者也有人想，智識若愈進步，不可知、不可改的事話若減少，照普通的所學來想，也是有真理的所在，總是我想，"人類的科學tek智識ná加添，不可知、不可改的事也是益發加添。" 這親像不合理的款，其實的確毋是，試想，佇無限闊的平面上共伊畫一個圓箍仔。 圓箍仔直徑或是一寸抑是一尺，佇圓箍仔外的平面嘛是無限闊。 科學的進步也是按呢。 佇無限的宇宙，無限的事實的面前，科學小可進步，這是無關礙的事。 科學永久teh進步，若是佇伊的面前猶有永遠的所在，毌若按呢，智識親像直徑一寸圓箍仔彼時代，看不可知的事親像佇圓箍仔外的三寸外遠的事；也直直研究，總是智識加添到親像直徑一尺的圓箍仔的時代不可知的事無ná減少，反轉親像加添到佇圓箍仔外的三尺外遠hiah闊。 現時世界的學者盡心所研究的事若合倚來是真濟；予幾若世紀前的學者所想boē到hiah濟。 按呢通知，現時不可知的事，比幾若百年前的有加添較濟。
真正的科學者是知ná濟，soà ná知家己智識的無夠的人。 智識ná加添soà ná生起敬畏上帝的心。 這號人"無看科學做偶像，是掠科學做上帝所賞賜的來呵咾伊"現時是要求這號學者。 著有這號學者出現來破壞科學的宮廟，刣遐的祭司，也將這世間變換做上帝的殿。
3. 科學到底知有偌濟，這是重大的問題。 佇宇宙內有物質，有性命，有力tī-teh。 論物質的起源，科學者攏毋知甚麼；真奇怪！近來有學者講：物質的起源是力。 也這个力的起源是上帝；總是科學tek猶毋知欲怎樣證明。 性命的起源全然猶毌知。 力的本質也是bē解決。 通知，宇宙現象界的根本，是做現時的科學者的差。 In踮佇迷宮內，找無路通出來，只有teh研究一部分若定。 看約伯記38章到41章的內中，耶和華所質問的，今仔日的科學者會應答得偌濟，就予咱知，現時的學者比遮早的人，智識無差到偌濟。
毋旦按呢，上帝是神靈的。 所以若用神用誠實來敬拜伊，就無論科學者非科學者，上帝攏欲用伊本身明明來指示咱，總是上帝無欲顯明伊本身佇試驗管，天文鏡佮顯微鏡的內面。 科學者研究的目的，永遠是屬佇上帝的本事 ─ 宇宙 ─ 的現象，的確毋是關係佇上帝本身。 欲敬奉上帝本身的路，只有是tuì信仰來仰望耶穌，猶無法度。 所以科學若踮佇伊的範圍內，守伊的本份，tuì現象界來知上帝的存在，按呢科學就值伊最高的使命。 總是這佮用信仰來看上帝本身是全然無像。 科學閣較進步，永遠boē會代理信仰。 欲知上帝本身，定著是著對信仰chiah會，總是現時有人用科學欲來否定信仰，這毋旦tuì科學來看有大錯誤的所在，實在對上帝是大的褻瀆。 這是陷落佇撒旦的詭計的歹囝所做的。 所以咱著就近來破壞這號偶像。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461