Tio̍h chù-ì! Tio̍h kín-sīn!! Bo̍h-tit siū-bê!!!
Ông Siú-ióng
1931.09, no. 558, pp. 3-4

Hiān-kim ê bûn-bêng sè-kài, tē-it hāi ê, m̄-sī ke-si ê lāi, chiū-sī pháiⁿ su-siúⁿ ê lī-hāi. Nā-sī tī sìn-gióng seng-oa̍h lâi kóng, īⁿ-toan, chhò-gō͘ ê sìn-gióng sī tē-it lī-hāi, in-uī sī teh bê-he̍k làng lī-khui Thian-kok, iā ti̍t-ti̍t chhoā in kàu Tē-ge̍k ê só͘-chāi.
Kīn-lâi uī-tio̍h bûn-hoà ê tì-ìm, kau-thong ê li-piān, sî-kan ê siok-siáu, ìn-chheh ê khì-khū ê cheng-kong, tì-kàu su-siúⁿ ê kau-oāⁿ, sū-sū ê phó͘-ki̍p chin khoài khóng-khoah. Lâng ê ba̍k-chiu khah ài khoàⁿ, ài chù-ì tī bān-kok--ê ê sū. Chóng-sī lán Ki-tok-tô͘ ê sìn-gióng, m̄-sjī beh sio̍k tī bān-kok--ê, chiū-sī ài hiòng tī Thian-kok--ê, chiah ē ēng-tit.
Chit bô loā kú, ū Loē-tē lâng koè-lâi lán Tâi-oân teh bē Bān-kok Sèng-chheh Gián-kiù-hoē só͘ hoat-hêng ê su-luī. Chit khoán ê chheh sui-jiân sī chong-kàu chheh, chóng-sī sī īⁿ-toan ê chheh. In ê Gán-kiù-hō͘ ê miâ chin hó-thiaⁿ, kóng sī bān-kok--ê, chóng-sī in ê làu-khuì, in ê pháiⁿ miâ-siaⁿ ia̍h sī bān-kok ê. Taⁿ goá tī chia chiū-sī beh làu in ê khuì, lâi siāu-kài in chit phài ê sū hō͘ lán chai, thang tî-hông in ê bê-he̍k.
Chit ê Bān-kok Sèng-chheh Gián-kiù-hoē ê khí-in, chiū-sī tuì tī Niú-iok siâⁿ, chi̍t ê thoân-kàu-ka Loā Se-luh (C. T. Russell) lâi--ê. Lâng chheng-ho͘ i Loā Se-luh Bo̍k-su (Pastor Russell). I pún-sin ia̍h sī ū án-ni chū chheng. Chóng-sī lán chai bô lâng kā i jīm-bēng, in-uī bô ū keng-koè sím-mi̍h chhì-giām, á-sī tit-tio̍h lâng kā i siat-li̍p chò bo̍k-su. Tû-khì i tóng-luī í-goā, Ki-tok-kàu ê thoân-thé, í-ki̍p pa̍t kàu-phài bô lâng sêng-jīn i sī bo̍k-su. Lán thang kóng i sī kan-ta chit ê thoân-kàu-á Loā Se-luh nā-tiāⁿ.
Tī chit 50 nî lâi ê tiong-kan, Bí-kok ū chhut chē-chē ké ê sian-ti. Lán chai Bí-kok só͘ ài khoa-kháu--ê, chiū-sī ta̍k hāng ài chò sè-kài tē-it--ê. Lūn chhut ké sian-ti ê só͘-chāi phah-sǹg ia̍h sī sè-kài tē-it. In-uī ké sian-ti ê tiong-kan, bô chi̍t ê kap i ē tuì-chhiú tit. Tang-iûⁿ ê Tiuⁿ pa-ná-pa iáu sī i ê tô͘-tē sap-á, chiū An-hioh-ji̍t hoē ia̍h sī khioh bô i ê kha-chhiu. I si̍t-chāi sī chong-kàu kài chi̍t ki toā lī-hāi ê chhì. Tī Se-iûⁿ, īⁿ-chhian ê sìn-tô͘ chē-chē ū hō͘ i chha̍k-tio̍h, tì-kàu tîm-lûn. Si̍t-chāi chin khó-lîn lah! Taⁿ chit ki chhì í-keng teh chhǹg-ji̍p tī lán ê Bí-lē-tó (Tâi-oân), só͘-í chit-tia̍p láu tio̍h chù-ì, tio̍h kín-sīn lâi tî-hông, chiah bián-tit siū-bê.
Chit ê thoân-kàu-á Loā Se-luh chhut-thâu tī sè-kan, oán-jiân sī chhin-chhiūⁿ teh hiat-lo̍h chi̍t lia̍p ê pho̍k-lia̍t-tân tī chong-kàu-kài ê khoán, in-uī i sī beh phah-phoà chāi-lâi ê chong-kàu, chāi-lâi ê sìn-gióng. M̄-kú si̍t-chāi gia̍h kha that chhì, kiat-kio̍k i ê só͘ chò beh kui tī o͘-iú. In-uī Siōng-tè teh kéng-taiù lâng, sui-jiâng bat kéng-taiù bô ha̍k-būn ê lâng, chhin-chhiūⁿ Bú-tì Sian-siⁿ (Moody), chit khoán ê lâng lâi chò I ê chhe-ēng. Chóng-sī chit khoán bô ha̍k-būn ê chong-kàu-ka, khah-siông sī chò hùn-heng, chò kéng-kò, chò tō-tek chiūⁿ ê kàu-sū, í-ki̍p chò thoân tō-lí ê khì-khū, khiok m̄-sī beh chò sin chong-kàu, à-sī sin kàu-phài ê chhòng-li̍p-chiá. Nā-sī chit ê Loā Se-luh, m̄-hān-tiāⁿ khiàm kàu-iong, chiū liân cheng-sîn chiūⁿ ê siu-ióng kap Sèng Sîn ê la̍t, ia̍h sī bô.
Chiàu i teh siūⁿ, Siōng-tè ê chin-lí to̍k-to̍k tuì i ū khé-sī nā-tiāⁿ. Sui-jiân ū Khap-lîm, Lō͘-tek Má-teng í-ki̍p oē-su-lí téng, toā chong-kàu-ka ê chhut-hiān, chóng-sī Siōng-tè sī iông-ún in kà-sī ké ê tō-lí nā-tiāⁿ. Nā-sī si̍t-chāi ê tō-lí sī tuì i chi̍t lâng, Siōng-tè chiah ū khé-sī. Chiàu i ê só͘ sìn kóng, "Siōng-tè sī chi̍t-ê, Siōng-tè kap lâng ê tiong-kan tiong-pó iā sī chi̍t-ê, chiū-sī chò lâng ê Ki-tok Iâ-so͘; I uī-tio̍h chèng-lâng hiàn pún-sin, choè thoè-sio̍k ê kè-chîⁿ, ū ki̍p-sî chèng-bêng" (1 Thê-mô͘-thài 2:5, 6). án-ni i chū jīn i sī siū siat-li̍p chò soan-thoân ê, chò ki̍p-sî ê chèng-bêng jîn. Koh tī Má-thài 24:45, 46 chat ū teh kóng-khí, chīn-tiong ê lô͘-po̍k ê sū.
Taⁿ Loā Se-luh ka-kī phah-sǹg i si̍t-chāi tú-tú sī hit ê chīn-tiong ê lô͘-po̍k, si̍t-chāi lâi kóng, i ū sìn chit kù tú-tú sī teh chí-khí i ê sū. Che kiám m̄-sī lām-sám kàu ke̍k.
Lán nā khoàⁿ i ê seng-oa̍h, chiū thang chai chit ê Loā Se-luh tuì i ka-kī ê bó͘ to bē chīn-tiong, hó hóng tuì Iâ-so͘ Ki-tok. In-uī i pháiⁿ khoán-thāi i ê bó͘, tī i ê ke-lāi lóng bô ū chi̍t-sut-á ê tō-lí tī-teh, tì-kàu i ê bó͘ ū kap i lī-iân. An-ni thang chai, i kó-jiân sī hit ê chīn-tiong ê lô͘-po̍k á m̄-sī, che tuì i kap i ê bó͘ ê sū, ku-kha lóng sô-chhut-lâi lah! Chóng-sī lán chai, àu bah àu lâng chia̍h, sui-jiân sī án-ni, i iā ū i ê tióng-luī tī-teh. Tuì i sí liáu-āu i ê phài-hā ê lâng bô chiong i ê miâ lâi chhòng-li̍p sin ê kàu-phài. Tuì hit-tia̍p liáu-āu, in chiū ka-kī chheng-ho͘ in ê thoân-thé kiò-chò Bān-kok Sèng-chheh Gián-kiù-hoē (International Bible Students Association). Taⁿ koáⁿ-kín siá án-ni pò só͘ kèng-thiàⁿ ê hiaⁿ-ché chai, hō͘ lán thang tî-hông, iā tī āu-hō beh soà-chiap lâi siāu-kài in ê kà-sī kap sìn-gióng.