Kè-chhoā ê hong-sio̍k
Tân Thiam-ōng
1931.10, no. 559 (KCC, no. 69), pp. 16-17

Tuì ū jîn-luī ì-lâi chiū ū kè ū chhoā, goân-chó͘ sī chō-bu̍t ê Chú kā in phit-phoè, ná chún lāu-pē kā kiáⁿ-jî chú-hun chi̍t-iūⁿ.
Chiàu-khoàⁿ goân-chá kè-chhoā sī chin tan-sûn ê khoán, bô sím-mi̍h īⁿ-toan khiàn-sńg, chhin-chhiūⁿ A-pek-lia̍p-hán chhe i ê lāu lô͘-po̍k tńg pún-hiuⁿ kā kiáⁿ I-sat chhoā-chhin, ta̍k-siaⁿ sī kóng nā oē chiâⁿ sī tuì Siōng-tè.
án-ni in bān-sū sī kau-tài Siōng-tè, chin ū khoàⁿ-oa̍h ê khoán-sit.
Lāu lô͘-po̍k kàu pún-hiuⁿ ê toē, ū bo̍k-tiûⁿ ê só͘-chāi, chiū tī hia ū cha-bó͘ gín-ná hó-ì ēng chuí hō͘ in lim, iā hō͘ cheng-siⁿ lim, án-ni chiū ū tiāⁿ-chhin ê su-liām.
āu-lâi chiū ēng khoân hō͘ i koà, tńg kap pē-bú hiaⁿ-tī ê ke an-sin chiū soà chham-siông phoè-chhin ê sū, m̄-chai kiáⁿ-sài sī îⁿ á-sī píⁿ chiū phoè-chhin, iā sī kóng, bān-sū chhut tī Iâ-hô-hoa, bô táⁿ-kín chiū án-ni kap lāu lô͘-po̍k soà choè-tīn khì, sin kiáⁿ-sài lâi lō͘-thâu ngiâ-chih ji̍p pâng choè ang-bó͘, chin -chiàⁿ ū kán-tan ê khoán.
āu-sè-tāi lâng ná choē, chiū ná hun ná khoah, iā chin-choē ê kok-tō͘, kok kì-jiân choē, chiū ū bûn-hoà kàu-io̍k chìn-pō͘ ê kong-kéng.
Bûn-hoà ná chìn-pō͘ chiū chong-kàu su-siúⁿ ná hok-cha̍p, soà siⁿ-chhut īⁿ-toan ta̍k hāng, án-ni chiū ū hun tang sai iûⁿ bô saⁿ-tâng, bûn-bêng iá-bân ê koh-iūⁿ, só͘-í ū kok chéng-cho̍k ê hun-piat, kai-kip ê cheng-chha.
Chiàu tī Tâi-oân ê sió hái-tó iā ū chin choē khoán ê cheng-chha, ū chin-choē bô saⁿ-tâng.
ēng Sai-pō͘ kap Tang-pō͘ to ū chin-choē bô saⁿ-tâng chhin-chhiūⁿ koân-soaⁿ ê chhiⁿ-hoan ū thiaⁿ-kìⁿ kóng, nā khoàⁿ tèng-ì sī ēng kiông-lia̍h lâi choè bó͘, nā san-ji̍t m̄ lim-chia̍h chiū hō͘ i tńg, (án-ni mā káⁿ ū kiông-lia̍h khì choè ang).
"Khoàⁿ kó͘-chheh kap choè hì ê hêng-iông mā put-sî ū hoan-cho̍k lia̍h-khì choè ang choè bó͘," Aní-ni Tiong-kok ê bûn-hoà hiah-chá khui, chiū ū hit hō ê hong-sio̍k, khoàⁿ hiān-kim mā sī ū.
A-mi-cho̍k sī ēng khan-tiân choè in-iû, nā hit nn̄g ê siàu-liân saⁿ tèng-ì, tī hit pái ê choè tiân kuí-nā-ji̍t, in chiū put-sî saⁿ khan-chhiú teh thaiù-bú choè tiân, kàu-soah oē saⁿ-chhoā tńg choè ang-bó͘, jiân-āu pān chiú chhiáⁿ hoan-cho̍k chhin-lâng, che mā-sī saⁿ-tèng-ì chin se̍k-sāi ū saⁿ-thiàⁿ chin chhim ê kám-chêng, āu-lâi kam-goān saⁿ choè-tui lâi chiâⁿ ke.
Koh chi̍t khoán Po͘-ni̍h lâng (khah-kú ê āu-soaⁿ lâng) che ū kè-tiāⁿ, chiú-lé, phèng-kim ta̍k-hāng ê lé-sò͘ iā chin-choē, in chhoā-kè sī ēng kiâⁿ, in-uī kiō bô lī-piān ū, iā-ū ēng kau-í-kiō, kūn-lâi iā-ū pún-tó ê kiō, in-uī ū tàng sè lah.
Chóng-sī in chi̍t hāngput-chí bô saⁿ-tâng, nā choè sin-niû ê sî, ài phâng-tê tī toh-iân tiong chhiáⁿ lâng chia̍h, ta̍k tè-toh, ta̍k lâng lóng-ū. Nā chio kiáⁿ-sài, hit ê sin kiáⁿ-sài mā chhin-chhiūⁿ sin-niû chi̍t-iūⁿ, án-ni phâng-tê chhiáⁿ hù hun-iân ê lâng-kheh. Koh ài chhiàⁿ ke, koaⁿ, chek, peh, hiaⁿ, tī, chím, ḿ téng-téng ê lé-sò͘.
Che it-tēng ū kā in teh tê-cheng ài ū ēng gûn, nā tī iân-toh-tiong chiū suî-chāi lâng, ēng gûn iā ū, ēng gûn-kak tâng-sián mā-sī ū, ū-ē saⁿ chhòng-tī kóng, ēng han-chû, ēng âng-choá pau-teh lâi teh.
Thiaⁿ kóng, iā ū sin-niû khah sek-kut ài chîⁿ, tī chhiáⁿ tê ê sî, khoàⁿ chîⁿ choē chiū the̍h tī ka-kī ê tē-á kín ji̍p, che iā-si hi-hán.
iā ū chhoā ê lâng pau goā-ke ê lâng-kheh lâi chit-pêng chhiáⁿ, ài engg7 chhái-kî-kó͘ khì ngiâ, beh kàu mn̂g ài ēng chuí hō͘ in lim, iā chhoā sin-niû ēng toā-lián ê gû-chhia choè kiō, ēng gû thoa sin-niû, muî-lâng, ēng âng-lîn, âng-pò͘ lâi chng-thāⁿ hit chiah gû-chhia, thoa tio̍h i-oaiⁿ háu, put-chí ū sim-sek ê khoán.
Kàu keh-ji̍t, á-si8 saⁿ-ji̍t, sin-niû nā tńg kheh ê sî, chit-pêng iā chio chin-choē lâng-kheh khì hō͘ hit-pêng chhiáⁿ, ū-sî chia̍h kàu bô mi̍h ēng oáⁿ-poâⁿ sàu-sàu phoà, tì-kàu oan-ke, iā ū-sî chiú-chuì khí oan-ke, in nā bó bái sū, bô chiú toā put-lêng, pa̍t-hāng khah oē choè-tit, che iā-sī toā sún-sit in ê seng-oa̍h.
iáu ū chin-choē siá boē-liáu, bāng chiong-lâi bûn-hoà ná hoat-ta̍t, soaⁿ-chêng ê lâng nā choē, in ê kū-sio̍k oē ná bô khì, tio̍h toā-toā koé-kū oāⁿ-sin, sim-sèng hong-sio̍k lóng ài koé, nā bô oh-tit chiâⁿ-mi̍h. Kiû Thiⁿ-pē chí-ì tit-chiâⁿ.