奇異 (Kiwi)
周惠霖
1931.11, no. 560, pp. 4-5
佇澳大利亞國有一款的鳥仔名叫做奇異 (Kiwi)。 這號鳥仔，一年的中間干單生一粒卵；毋過兩是真大粒。鳥仔囝tuì出卵殼彼日，就會曉家己照顧，毋免倚靠伊的父母的力。
今年的中間有濟濟的患者來入台南新樓醫館，其中有700外人以前攏毋捌聽著道理。 In佇醫館內攏有聽著 - 有的有接納，有的轉去in 兜猶teh想所聽的道理，有的明明拒絕，總是通講已經有掖種子佇in逐人的心內。 可惜，遐的聽道理，接納道理的人毋是親像彼款奇異鳥 - in猶著欠人的照顧。 In欠同伴，in欠好心的人去找 in，佮in相合講話談論上帝的疼佮伊的恩典。講按呢，意思毋是指傳道先生若定 - 佇台灣逐个拜上帝的人會通有份佇這款的工。
保羅講無論甚物猶太國外的人伊攏有欠in的債（羅馬1:14）。 咱通講：咱拜上帝的人攏有欠遮的人的債 - 或者佇醫館，抑是佇甚物佈道會，in聽道理只有一兩擺若定。
佇美國有真大的自動車的會社，逐日有製造真濟新的車。 Teh備辦的時，in將車下佇長長的被單的頂面，就勻勻予伊行佇彼个大間的工場內。 車過的時有濟濟做工人徛teh聽候，逐人攏有定著的工。 車行到逐人的所在的時， 抵抵彼陣in攏著愛加下一項器具落去。 親像按呢到尾車攏完全。 若有一人貧惰，抑是無細膩看，車會過伊的所在猶是欠缺伊的工。
讀1哥林多12章，咱會通看教會是略仔親像佇彼个會社內。 咱大家佇教會內一人一人有伊的工著做。
佇咱的醫館，抑是佇佈道會，抑是濟濟別的法度，福音的道理有傳報佇台灣人的中間。 這个是干單頭一步的工 - 其他猶有別的部分留teh予咱。 毋知咱大家有盡家己的本分也無？
|
