Ông--sī Khûn Sió-toān
Chiu--sī Thô
1931.05, no. 554 (KCC, no. 64), pp. 20

Ông--sī Khûn sī tiàm tī Tāi-kah ke, Téng-tiàm chng ê lâng. Tuì kàu-hoē lâi kóng, i sī sio̍k tī Tāi-kah kàu-hoē ê lú sìn-tô͘. I sī kap kó͘ Tân Kî-siông Sian-siⁿ ū chhin-chhek koan-hē, koh i pùn-sin oē sìn tō-lí kap i ê ta-ke-koaⁿ, tāi-ke oē ji̍p-kàu lóng sī tuì tī Kî-siông Sian-siⁿ kap Sian-siⁿ-niû ê jia̍t-sim ín-chhoā ê kiat-kó. Só͘-í lán nā siàu-liām i, chiū chū-jiân ia̍h tio̍h siàu-liām Kî-siông Sian-siⁿ kap Sian-siⁿ-niû. I tuì 21 nî chêng chiū sìn tō-lí, ia̍h Kî-siông Sian-siⁿ soà kó͘-bú siat-hoat hō͘ i lâi tha̍k Hū-o̍h. Lūn i e8 thian-chu put-chí hó, boē su tng-sî ê chhong-iú, i tha̍k la̍k kò ge̍h chiū tio̍h tńg-khì chhù-nih liāu-lí ke-sū.
Lūn i ê sèng sī thiâm-chēng, hán-tit chhìn-chhái kóng-oē, ia̍h kap lâng put-hēng, chin-chiàⁿ sī thang choè chi̍t ê bô͘-hoān-tek ê lú sìn-tô͘. I thâu-bé 14 nî kú tī Hū-o̍h kà Pe̍h-oē-jī kiam kam-tok ha̍k-seng chú-chia̍h téng-téng ê sū. I kó-jiân sī chhin-chhiūⁿ chi̍t ê chīn-tiong kap tì-sek ê koán-ke, chiàu-sî pun bí-niûⁿ hō͘ ke-lāi ê lâng. Só͘ ū ê Se-iûⁿ, Tang-iûⁿ ê Sian-siⁿ kap ha̍k-seng ta̍k ê chin chun-kèng i.
Kàu 3 nî chêng uī-tio̍h ke-sū ê in-toaⁿ, ko͘-put-chiong sî ha̍k-hāu ê kang tò-tńg khì chiàu-kò͘ kiáⁿ-sun, chóng-sī i ê sim iáu teh ǹg-bāng ū ki-hoē beh koh lâi choè Chú ê kang. Bô phah-sǹg tī kin-nî Sin-le̍k 2 ge̍h 12 ji̍t ngò͘-chiân 10 tiàm hut-jiân khí pīⁿ, ia̍h tī hit àm 8 tiám goā siū Chú chih-chiap tńg-khì. I hióng-siū 57 hè. Chóng-sī taⁿ lán boē-tit thang koh tī sè-kan lâi kìⁿ-tio̍h i ê bīn, só͘-í boē bián-tit hō͘ lán ê sim-koaⁿ kap i ê chhin-lâng pîⁿ-pîⁿ siong-pi, m̄-kú lán tio̍h ǹg-bāng "tī āu-lâi ū an-lo̍k oē saⁿ-kìⁿ tī êng-kng ê thian-kok."
Pó-lô Sian-siⁿ kā Hui-lip-pí lâng kóng, "Taⁿ hiaⁿ-tī ah, kiat-bé lâi kóng, kìⁿ-nā chin-si̍t ê, kìⁿ-nā khó-kèng ê, kìⁿ-nā kong-gī ê, kìⁿ-nā chheng-kiat ê, kìⁿ-nā thang thiàⁿ ê, kìⁿ-nā hó miâ-siaⁿ ê, nā ū sím-mi̍h tek-hēng, sím-mi̍h thang o-ló, chiah ê lín tio̍h siàu-liām" (Hui 4:8). Goá siá i ê lí-le̍k tām-po̍h lâi lo̍h pò-choá ê ì-sù, chiū-sī ài thàn Pó-lô Sian-siⁿ ê kà-sī, só͘-í ǹg-bāng lán sìn Chú ê hiaⁿ-tī chí-bē, tāi-ke hoaⁿ-hí lâi o̍h i ê hó tek-hēng kap jia̍t-sim pài Siōng-tè, sī sim só͘ goān. I pêng-siông, lâng sī kiò i Iông-á só.