Tiuⁿ Hái-chuí ê Sió-toān
Keh Chuí lêng
1931.08, no. 557 (KCC, no. 67), pp. 20

Ba̍k-sa kàu-hoē ê Tiúⁿ-ló Tiuⁿ Hái-chuí, sī pîn-hân ê ka-têng chhut-sin, soè-hàn ê sî pē-bú chiū kè-sin, i hō͘ lâng chhiàⁿ choè khoàⁿ gû gín-á, khah toā-hàn chiū kā Tiuⁿ Hông choè tn̂g-kang, i khoàⁿ Tiuⁿ Hông Tiúⁿ-ló ê jia̍t-sim siū kám, āu-lâi chhoā bó͘ kiàn-li̍p sin ka-têng, kó-jiân jia̍t-sim tī kàu-hoē, khûn-bián tī ka-têng, tām-po̍h kóng khah siông-sè.
1. I tuì kàu-hoē, jia̍t-sim siú lé-pài, toê-iân lòng sī ài choè bô͘-iūⁿ, só͘ kiâⁿ siù tō-lí, kàu-hoē chiū kéng i choè Tiúⁿ-ló, i koh-khah chīn chit, hoē-iú nā ū phoà-pīⁿ ta̍k ji̍t khì khoàⁿ i, pang-chān i, tiàm hia tàu chiàu-kò͘, koh-khah bô-êng ia̍h poah-kang khì, kiâⁿ kàu i ê pīⁿ hó chiah soah. Hoē-iú nā ū put-hô i chīn-la̍t khoàn hô, ū siàu-liân lâng khì hòng-tōng, i khì khoàn-bián i kàu ka-kī lâu ba̍k-sái; uī-tio̍h kàu-hoē ê sū koh-khah bô-êng ia̍h pàng kang khì choè, nā hoē-iú léng-sim, i siông-siông khì ín-chhoā, nā hoē-iú choè m̄-tio̍h kiàⁿ phaiⁿ, i chin hó-táⁿ chek-pī hiâm i, nā jia̍t-sim ê hiaⁿ-tī i chin thiàⁿ i, só͘-í choân kàu-hoē chun-kèng chhin-chhiūⁿ lāu-pē. I sui-jiân bô ha̍k-būn, chêng-lí chin bat, kàu-hoē nā ū tāi-chì lóng khì mn̄g i, i nā kóng tio̍h cháiⁿ-iūⁿ kiâⁿ, lóng sūn-thàn i, tuì án-ni kàu-hoē chin hia̍p-hô, put-lūn hó-sū, pháiⁿ-sū lóng chiâu kàu, chhin-chhiūⁿ chi̍t ê ke-têng. Kàu-hoē 20 goā nî bô ke-thiⁿ, chit 5, 6 nî tuì i ū ín-chhoā 3 ke lâi sìn; Ba̍k-sa bô phài thoân-tō khì, i khàu 3 pái kóng, (goá bô hoân-ló chia̍h, bô hoân-ló chhēng, chí hoân-ló kàu-hoē bô sian-siⁿ).
I chin gâu thiàⁿ thoân-kàu-su, put-lūn sím-mi̍h thoân-tō m̄-bat hiâm i ê sī-hui. I khì hù Tiong-hoē, Tāi-hoē m̄-sī gōng-gōng thiaⁿ, ta̍k hāng chin bêng; tò-tńg pò-kò kàu-hoē chin chheng-chhó. I tuì kàu hoē-goā chin hó sìn-iōng, i sī phah-chio̍h sai-hū, nā i choè chi̍t kang, chiū ū pa̍t-lâng, kang-poàⁿ ê gia̍h, bô kek-hēng, bô chia̍h hun, bô hioh-khùn, chá choè oàⁿ soah, ta̍k lâng ài chhiàⁿ I, tio̍h liōng-chá ka-tiāⁿ, nā bô, chhiàⁿ bô; pa̍t lâng bô sit-choh, i teh choh boē liáu.
2. I ê tī-ke khûn-khiām, pe̍k siú sêng ka, ji̍t-sî choh pa̍t lâng ê sit, mî-sî choh ka-kī ê sit, i ê kut-la̍t sī hui-siông, lé-pài-ji̍t í-goā bô chi̍t sî hioh-khùn. Keng-êng kàu taⁿ khiok ū sêng-kong, i, si̍t, chū, bô hoân-ló. I ê ka-têng gâu tī-ke, kà kiáⁿ, lóng ū jia̍t-sim sūn-thàn tō-lí. I 3 nî í-lâi tì hì-pīⁿ chiām-chiām siong-tiōng, nn̄g nî kú boē kiâⁿ kàu pài-tn̂g, iáu-kú i ê jia̍t-sim bô chha, i ê sim chin boán-chiok, kóng Siōng-tè hō͘ i chin kàu-gia̍h, i ê sim chin pêng-an kè ji̍t. Chhit ge̍h 3 ji̍t, kiò lâng lâi kiò goá khì, goá khì khoàⁿ i chin siong-tiōng, tio̍h liû-hêng kám-mō͘ piàn hì-iām, khuì chhoán boē lī, chí-ū kā goá kóng i boē hó lah, ài goá tio̍h kā i sàng-chòng, chai goá kūn ji̍t beh khì Hoe-liân-káng, kóng nā tiān-pò khì, tio̍h kín tńg-lâi. āu-lâi koh nn̄g ji̍t ē-poi 4 tiám hō͘ Chú tiàu i tńg-khì, 7 ji̍t chòng-sek, hoē-iú ta̍k ê siong-sim lâu ba̍k-sái, koaⁿ-chhâ lo̍h-khòng ê sî, ū chi̍t ê hoē-iú miâ Nái-biāu 60 goā hè, chhuì-chhiu tn̂g-tn̂g, siang-chhiu hoāⁿ tī lō͘-piⁿ ê chhiū-á khui siaⁿ toā khàu, i ê siaⁿ oē chǹg lâng ê sim, thiaⁿ ê lâng sim sng lâu ba̍k-sai. Ai ah! Ba̍k-sa kàu-hoē sit-lo̍h chi̍t ê tòng-liông, siong-sim ah! I ê uî-cho̍k chi̍t ê bó͘, chi̍t ê kiáⁿ 14 hè, chi̍t ê sim-pū-á 10 hè. Goān ti-kí chu-iú siông thoè in kî-tó.