ǹg-bāng ê Goân-thâu
Tân Lêng-thong
1932.01, no. 562 (KCC, no. 72), pp. 11-12

"Ū ǹg-bāng lán ê Chú Iâ-so͘ Ki-tok, chiū thun-lún."
Lāu-lâng ê te̍k-sek sī hoê-kò͘ kè-khì ê sū; chheng-liân ê te̍k-sek chiū-sī khǹg ǹg-bāng tī chiong-lâi. Che sī lâng-lâng só͘ sêng-jīn ê chin-lí. Chóng-sī ū lâng koan-chhat hiān-tāi ê sî-sè kóng, "Hiān-tāi ê chheng-liân bô khǹg ǹg-bāng; bô lūn sī chhu-hiòng tī siā-hoē chú-gī--ê, á-sī tîm-le̍k tī hióng-lo̍k chú-gī--ê, goân-in lóng sī chāi tī-chia." Si̍t-chāi sī án-ni, chit ê pháiⁿ kéng-khì, oh tit-tio̍h chit-gia̍p, tī-hia ū seng-oa̍h ê khùn-lân. Chī-chuī beh chí-sī in oa̍h-miā ê lō͘, chī-chuī beh hō͘ in ū khuì-la̍t? Ū-sî chèng-tong ê giân-lūn iā siū kim-chîⁿ sè-le̍k ê ap-pek, tì-kàu soà m̄-chai sī uī-tio̍h sím-mi̍h in-toaⁿ lâi tit-tio̍h ha̍k-būn. Só͘-í ū khì-le̍k ê chiū siūⁿ kóng, tio̍h ēng kek-bēng-tek ê chhiú-toāⁿ lâi kái-chō chit hō siā-hoē chōng-thài; nā bô ê chiū ka-kī iàm-chiām khì-sak lâi tuī-lo̍h tī hióng-lo̍k chú-gī.
Chóng-sī koh chi̍t hong-bīn thang khoàⁿ chhut--ê, chiū-sī chá-ji̍t ê koân-sè-ka; kin-á-ji̍t bô lâng beh siàu-liām; chêng ê hù-ong, taⁿ siū kéng-khi ê éng-hióng iā khiā boē tiâu. Sui-bóng bu̍t-chit ê sè-le̍k teh chhiòng-hêng chin béng, iáu-kú hiān-tāi iā-sī teh lō͘-chhut bu̍t-chit ê bô la̍t; chit khoán lē sī boē chió. ta̍k lâng lóng chai, iā bat khoàⁿ-kìⁿ chit hō sū-si̍t. Sui-sī án-ni, lâng boē-oē thoat-lī oá-khò bu̍t-chit ê sim, che kiám m̄-sī thang siong-pi mah?
Chit hō kéng-hóng ê kiat-kio̍k, tû-khí sí ì-goā bô pa̍t-tiâu-lō͘. Nā ū hoat-tō͘ thang kiù i ê liông-sim thoat-lī kan-khó͘, koh ū kng thang kā i chiò, chhoā i lâi ji̍p tī ū ǹg-bāng ê seng-oa̍h, tī-hia m̄-chai beh ū loā-toā ê hoaⁿ-hí ah!
Taⁿ lâi khoàⁿ lán ê Chú Iâ-so͘ sím-mi̍h khoán? I uī-tio̍h ài chín-kiù tîm-le̍k tī o͘-àm choē-ok tiong ê jîn-luī, hoán-tńg hō͘ tuì-te̍k lâi hāi sí. Chióng-sī I ū khah iâⁿ sì ê koân, chit-tia̍p che tī Siōng-tè ê toā-pêng, iā-sī uī-tio̍h ū choē ê lâng lâi lâu ba̍k-sái. I chiū-sī Siōng-tè ê Sèng Kiâⁿ Ki-tok, oē kham-tit o-ló--ê. Nā bat I, sìn-khò I, hoaⁿ-hí kap I lâi pē si̍p-jī-kè ê lâng teh-beh ū oân-choân ê tit-kiù; koh tī choē-choē ê hoān-lān kan-khó͘ tiong hō͘ lán ū ǹg-bāng kàu hoaⁿ-hí moá-moá. Ū lâng kóng, "Tī choē-choē kà-sī ê tiong-kan, chí-ū Ki-tok-kau hō͘ lâng siⁿ-chhut ǹg-bāng." Koh ū lâng chú-tiuⁿ, tī Sin-iok tiong tē-it toā ê ǹg-bāng sī khǹg tī Í-hut-só͘ 1 chiuⁿ 20-23 chat. Chiū-sī tī Ki-tok kap tuì Ki-tok só͘ siúⁿ-sù ê ǹg-bāng. Chit hō ǹg-bāng m̄-nā sī lâi-sè--ê, iā sī kim-sè--ê.
Lán tio̍h bêng-pe̍k, tuì bu̍t-chit chhut--ê, iû-goân sī kui tī bu̍t-chit; tō-tek kàu-bé iā-sī oē pāi-hoāi. Nā kan-ta kóng ū chong-kàu á-sī ū sìn-gióng, siōng-hó iā-sī chhoā lán kàu tī mn̂g-kháu nā-tiāⁿ; nā bô si̍t-chāi chìn-ji̍p kàu tī lāi-bīn iā-sī boē choè sím-mi̍h. Só͘-í nā ài ji̍p tī ū ǹg-bāng ê seng-oa̍h, ài tit-tio̍h hong-sēng ê oa̍h-miā, tek-khak tio̍h ka-kī khiam-pi lâi kuī-lo̍h tī Siōng-tè ê Sèng Kiáⁿ Ki-tok ê kha-ē.
Taⁿ lán saⁿ-kap ngiâ-chih 1932 ê Sin-nî, koh sī kì-liām Pak-pō͘ siat-kàu 60 chiu-nî ê nî. Lán ê kàu-hoē tī chit ê ū ǹg-bāng ê Ki-tok tiong, kiám m̄-sī siông-siông chhin-chhiūⁿ bô ū ǹg-bāng ê khoán mah? Lán kiám m̄-tio̍h koh chi̍t pái lâi khoàⁿ lán pún-sin í-ki̍p kàu-hoē ê hiān-chōng mah? Lán tuì kè-khì tio̍h kám-siā; tuì chiong-lâi tio̍h ū ǹg-bāng.