Suî Pit
Tân Kim-jiân
1932.10, no.571, pp.12-13

1. Chī-chuī ê Chhò?
"Sèng-keng sī Siōng-tè ê oē", chit kù oē ún-tàng bô lâng káⁿ hó͘-jīn! M̄-kú tuì chit kù oē ê thài-tō͘ ū koh-iūⁿ, tì-kàu ē seⁿ-khí chē-chē būn-tê! Chhin-chhiūⁿ Jit-pún chū-iû Bí-í-bí Káu-hoē tuì Má-tiûⁿ Sian-siⁿ ê būn-tê, phah-sǹg chē-chē lâng lóng chai! Hit ê būn-tê ū hiah toā. Chóng-sī kî-si̍t sī téng-bīn só͘ kóng hit kù oē ê thài-tō͘ bô tang 5 nā-tiāⁿ! goân-lâi Má-tiûⁿ Sian-seⁿ sī sio̍k chū-iû Bí-í-bí Kàu-hoē, chóng-sī i ê thài-tō͘ bô ha̍p tī hit ê kàu-hoē ê sìn-tiâu. Chiū-sī chū-iû Bí-í-bí Kàu-hoē sī sìn "Sèng-keng sī Siōng-tè ê oē," só͘-í Sèng-keng ê chi̍t-tiám chi̍t-oe̍h lóng bô chhò-gō͘. Nā-sī Má-tiûⁿ Sian-seⁿ sī iû-goân sìn "Sèng-keng sī Siōng-tè ê oē," m̄-kú bô tek-khak chi̍t-tiám chi̍t-oe̍h lóng bô chhò! Tī hiān-kim iû-goân ū chē-chē kàu-phài kap chū-iû Bí-í-bí-hoē saⁿ-tâng--ê, chiū-sī hiah ê kiò-chò Sèng-kiat ūn-tōng--ê lóng-sī, in ê sìn-tiâu sī Sèng-keng ta̍k-kù sī Siōng-tè ê oē, ta̍k-kù sī tuì Siōng-tè ê lêng-kám lâi siá--ê, chiah ê lán lóng ū sìn. Chóng-sī in sī kóng Sèng-keng chi̍t-tiám chi̍t-oe̍h lóng bô chhò! nā án-ni, lán tio̍h sió-khoá lâi gián-kiù chiah hó. Goá lâi kí Kū-iok chit nn̄g ê lē chò lán ê chham-khó.
a) Ⅰ Ông 15:14 "Só͘ ū soaⁿ-thâu sui-jiân iáu-kú boē-hoè......" Chóng-sī Ⅱ Tāi 14:5 sī kì "Tī Iû-tāi chiah ê siâⁿ, hoè-bô soaⁿ-thâu ê toâⁿ, huí-hoāi ji̍t ê siōng......." Koh Ⅱ Tāi 15:17 sī kì "Í-sek-lia̍t tē soaⁿ-thâu ê toâⁿ, sui-jiân boē hoè...." lán chai chit 3 uī pêⁿ-pêⁿ sī kì A-sat ông ê chong-kàu kái-kek, m̄-kú nn̄g-uī kì "Soaⁿ-thâu ê toâⁿ boē-hoè" chí-ū Ⅱ Tāi 14:5 kì "Hoè-bô soaⁿ-thâu ê toâⁿ." án-ni kiám m̄-sī siāng chi̍t-ê kì-sū ū mâu-tún ê sū-sit7 mah?
b) Só͘-lô-bûn khí ê Sèng-tiān: Ⅰ Ông 6:2 kì "Koân 3 tn̄g" nā-sī Ⅱ Tāi 3:4 sī kì "Koân 13 tn̄g." án-ni kiám-bô mâu-tún? Á-sī beh kóng, "Sī Siōng-tè ê oē" só͘-í "3 tn̄g" "13 tn̄g" á-sī "12 tn̄g" lóng bô chhò; nā án-ni chiū Sèng-tiān táu-tí loā koân ah? chhin-chhiūⁿ chit hō ê mâu-tún, á-sī ū hoan-e̍k ê chhò-gō͘ kap oa̍h-pán ê chhò-gō͘, beh kui-tī chī-chuī ah? Chiàu goá ê só͘ sìn, goá m̄-káⁿ chiong chiah ê chhò lâi kui tī Siōng-tè, In-uī Siōng-tè sī choân-lêng, choân-tì, koat-toàn bô chhò, bô m̄-tio̍h. Nā án-ni, chū-jiâu bô thang kóng "Chi̍t-tiám chi̍t-oe̍h lóng bô chhò lah!" Chóng-sī "Sèng-keng sī Siōng-tè ê oē" lah, lóng bô thang piān-pok lah!
2. Ko-téng phoe-phêng kiám-sī choē-ok?
Tī kin-á-ji̍t iáu-kú nā kóng-khí "Ko-téng phoe-phêng" chi̍t-bīn ê lâng chin chù-ì; nā ū hit khoán su-siúⁿ ê lâng, soà hō͘ lâng khoàⁿ chò chù-ì jîn-bu̍t. Hiah ê Sèng-kiat ūn-tōng ê tāi-jîn sī khoàⁿ ko-téng phoe-phêng chò Mô͘-kuí, choē-ok! chhin-chiūⁿ Má-tiûⁿ Sian-seⁿ soà hō͘ in ê kàu-hoē tû-miâ. Taⁿ ko-téng phoe-phêng sī sím-mi̍h? chóng-kóng sī le̍k-sú-tek, bûn-ha̍k-tek ê phoe-phêng lah! iā "Pún-bûn phoe-phêng" hō-chò hā-téng phoe-phêng. Chit nn̄g khoán lâng lóng kiaⁿ. M̄-kú Sèng-keng ū le̍k-sú ê poè-kéng, ū bûn-ha̍k ê te̍k-sèng, iā-ū Sèng-keng ê pún-bûn; in-uī kin-á-ji̍t ê Sèng-keng sī e̍k-bûn nā-tiāⁿ. Koh chit-hō ê e̍k-bûn, tuì chá kàu-taⁿ, ū keng-koè loā-chē pái ê kái-e̍k koê-khì--lah! nā ū le̍k-sú ê poè-kéng, boē bián-tit tio̍h ū le̍k-sū-tek ê gián-kiù. Ū bûn-ha̍k ê te̍k-sèng, chū-jiân ē seⁿ-khí bûn-ha̍k-tek ê phoe-phêng. án-ni kiám m̄-sī tuì chiah ê kok hong-bīn ê gián-kiù, hō͘ lán khah bat Sèng-keng ê kè-ta̍t mah? Chóng-sī nā bē siau-hoà, lâi tiòng-tio̍h ko-téng phoe-phêng ê to̍k, chiū m̄-sī án-ni. Só͘-í ko-téng phoe-phêng, m̄-thang kan-ta thun, iā m̄-sī tio̍h khoàⁿ i chò Mô͘-kuí, choē-ok--ê! nā ēng sìn-gióng ê sim, kèng-khiân ê thài-tō͘ lâi tha̍k, lâi phoe-phoàⁿ, sī put-chí ū gián-kiù ê kè-ta̍t tī-teh.