Gâu-lang4 ê Kà-sī
Tân Khêng-ku
1932.12, no. 573 (KCC, no. 83), pp. 25

(Chiap 11 goe̍h 22 bīn)
(5) Martin Luther kóng, "Ū chi̍t pái, Mô͘-kuí kūn-oá lâi kóng, "Lí sī toā choē-jîn, só͘-í lí tek-kak oē bia̍t-bô." Chóng-sī i kóng, "Chiàu lí só͘ kóng, goá si̍t-chāi sī toā choē-jîn, m̄-kú Iâ-so͘ tú-tú　sī lo̍h-lâi sè-kan, beh chín-kiù ū choē ê lâng, só͘-í goá oá-khò I m̄-bián tú-tio̍h tîm lûn." Mô͘-kuí kàu-bé bô hoat-tō͘, chiū lī-khui i. Kin-á-ji̍t ia̍h ū chi̍t khoán teh choè Mô͘-kuí ê kha-chhiú ê lâng, chin ài phoe-phêng lâng ê pháiⁿ, khiok gâu thun-lún, lâi siū phoe-phêng ê lâng ū hok-khì, in-uī lán ê Chú nā bô hiâm lán chiū hó, hō͘ Mô͘-kuí hiâm bô koan-hē, kàu-bé tian-tò hit-khoán lâng ka-kī tio̍h siū chek-hoa̍t.
(6) Kó͘-chá lâng ū chi̍t kù kà-sī ê oē kóng, "Ta-po͘-kiáⁿ nā chhut kàu mn̂g-kháu, chiū tio̍h siūⁿ kóng ū chhit ê tuì-te̍k teh-beh hāi i." Che sī choē-ok sè-kài ê chōng-thāi, chhì-khoàn chá lán ê Chú cháiⁿ-iūⁿ? Nā khah choē lâng teh tè I, lâi sêng-siū I ê kà-sī, ia̍h o-ló I ê gâu, liâm-piⁿ ū hiah ê chè-si, tha̍k-chheh lâng téng-téng, lâi kiau-so chèng-lâng beh hām-hāi Iâ-so͘. Kó͘-chá ū chi̍t ê tiat-ha̍k-chiá ê lāu-bú, kà-sī i ê kiáⁿ kóng, "Kiáⁿ, lí nā kiâⁿ hó, m̄-kú pháiⁿ-lâng beh oan-hūn lí, chóng-sī nā kiâⁿ pháiⁿ, mī hó-lâng beh oàn-hūn lí, só͘-í kiám m̄-sī lí bô chhut-sì khah hó mah.?" Hit ê tiat-ha̍k-chiá chiah ìn i kóng, "M̄-kú goá nā kiâⁿ hó, chiū oē hō͘ hó-lâng hoaⁿ-hí; sui-bóng nā kiâⁿ pháiⁿ, mā-sī oē hō͘ pháiⁿ-lâng hoaⁿ-hí; só͘-í goá iû-goân ài chhut-sì tī sè-kan." Taⁿ chhin-chhiūⁿ téng-bīn só͘ kóng, bô lūn chhut-chāi lán cháiⁿ-iūⁿ choè, ia̍h sī oē hō͘ lâng oàn-hūn, só͘-í m̄ ta̍t-tio̍h hó-táⁿ uī chèng-gī lâi chhut-la̍t, m̄-bián kiaⁿ pháiⁿ-lâng ê oàn-hūn sī khah tio̍h. Lán nā si̍t-chāi ài siū chheng choè Siōng-tè ê kiáⁿ-luī, bô lūn kàu sím-mi̍h só͘-chāi, tio̍h kap Mô͘-kuí choè tuì-te̍k kap kiat oan-siû, che sī chū-jiân ê lí, koh ia̍h sī choè Ki-tok peng-teng ê gī-bū.
(7) Hit ê kái-liông kaⁿ-ga̍k ê sian-hong-chiá, John Word, i ū chi̍t pái uī-tio̍h beh sī-chhat sòng-hiong lâng kap tī kaⁿ-ga̍k-lāi teh koaiⁿ ê hoān-lâng ê in-toaⁿ, ū khì Lō͘-se-a, ia̍h Lō͘-kok ê hông-tè ài beh khoàⁿ i, só͘-í beh chhiáⁿ i ji̍p hông-kiong, chóng-sī i sî kóng, "Goá lâi ê bo̍k-tek, sī beh sī-chhat sòng-hiong kap hoān-choē ê lâng ê chōng-hóng, khiok m̄-sī beh lâi pài-iat chit kok ê chun-kuì ê lâng." Taⁿ kin-á-ji̍t teh uī Chú chīn-tion choè kang ê chèng sian-siⁿ ah! Chhiáⁿ tāi-ke o̍h chit ê kái-liông kaⁿ-ga̍k ê gâu-lâng ê khoán, tio̍h tuì lán só͘ sio̍k ê sìn-chiá tiong hiah ê sòng-hiong, kap kan-khó͘ pīⁿ-thiàⁿ ê hoē iú ê ke, pí pîⁿ-pîⁿ sio̍k lán hiah ê hó-gia̍h kap pêng-an ê hoē-iú ê ke, khah chia̍p khì sûn, khì khoàⁿ-kò͘, chiah ū ha̍p Chú só͘ kau-thok lán ê chit-bū. Goá khah-siông nā chhut-goā kàu ta̍k uī, chiū ū só͘-chāi ê hoē-iú thó͘-khuì kóng, "Goán ê sian-siⁿ khiok kóng tō-lí put-chí oē, khó-sioh lóng hán-tit chhut-khì thàm hoē-iú, ū sî liân sím-mi̍h hoē-iú léng-sim sit-chì soà lóng-m̄ bat lâi, sian-siⁿ to m̄-chai." Goá nā thiaⁿ-tio̍h hoē iú kóng án-ni, sim-koaⁿ chiū kan-khó͘, chiàu goá siūⁿ kàu-hoē ê bo̍k-hoē-chiá, tek-khak m̄ sī kan-ta gâu soat-kàu chiū hó, koh-khah iàu-kín ê, sī tio̍h gâu chio-ho͘, gâu poê-iúⁿ kap gâu chiàu-kò͘. Gâu ê bo̍k-chiá m̄-sī kan-ta oē hiáu chhoā iûⁿ kàu chhiⁿ-chhuì ê chháu-po͘ hō͘ in chia̍h nā-tiāⁿ, tio̍h put-sî tī sin-piⁿ chiàu-kò͘, nā ū tio̍h-lo͘ ê, tio̍h kín kā i i; nā ū phoà-siùⁿ ê, tio̍h hû-chhî i; nā ū m̄ chia̍h chháu ê, tio̍h kín gián-kiù hit ê goân-in lâi i-tī i; chhin-chhiūⁿ án-ni, chiah thang kóng sī chin ê bo̍k-chiá. Bo̍k-chiá nā bô put-sî sûn iûⁿ-kûn, ū sî chha̍t oē lâi thau lia̍h, á-sī iá-siù oē lâi thau kā, sī chin guî-hiám.