Kì-liām Siat-kàu
Siau An-ku choè
1932.06, no. 567 (KCC, no. 77), pp. 26

1. Chá-chêng lán kiâⁿ bê-lō͘ ê sî,
Chin-oa̍h Siōng-tè to m̄-bat I;
Chiah ê ngó͘-siōng khoàⁿ choè tuì-tiōng,
Nā m̄ ho̍k-sāi chiū ū chai-iong.
2. Chá-chêng lán kiâⁿ bê-lō͘ ê sî,
Kiù-chú Iâ-so͘ to m̄-bat I;
Choē-ok hêng-hoa̍t sim choân bô bêng,
Lia̍h choè kiâⁿ gī thang tit soé chheng.
3. Chá-chêng lán kiâⁿ bê-lō͘ ê sî,
Pó-huī Sian-siⁿ to m̄-bat I;
Bē ê pìⁿ ē, gōng ê pìⁿ cheng,
Siūⁿ sī khûn tha̍k ha̍k chì sim bêng.
4. Chá-chêng lán kiâⁿ bê-lō͘ ê sî,
Sam-uī ê Sîn hoat-chhut chû-pi;
Khui-khé Bú-hoē thoân-tō īⁿ-pang,
Choan chhe sù-chiá chīn-la̍t kiù lâng.
5. Taⁿ lán bat Pē hoaⁿ-hí chhē I,
iā bat Sèng-kiáⁿ sī lán hiaⁿ-tī;
Koh bat Sèng Sîn kám-hoā bān-bîn,
Chheng-siā bān-siā hō͘ lán oāⁿ sin.