A-tong kap Hā-oa tī Lo̍k-hn̂g
Chiong Ông-iû choè
1932.09, no. 570 (KCC, no. 80), pp. 24

(Tiāu ài ēng march)............
1. A-tong Hā-oa tī Lo̍k-hn̂g,
Ta̍k hāng hok-khì lóng chiâu-chn̂g;
Kui kûn khîm-siù in bô kiaⁿ,
Ta̍k chiah tōng-bu̍t lóng hō miâ;
Hn̂g-lāi ū mi̍h thang chia̍h,
Siōng-tè pī-pān chin kàu-gia̍h;
Tāi-ke lóng bô siong-hāi,
Chhut chāi A-tong teh an-pâi.
2. A-tong Hā-oa tī Lo̍k-hn̂g,
Ta̍k hāng hok-khì lóng chiâu-chn̂g;
Siōng-tè ū chhòng-chō ta̍k hāng,
Lóng-chóng siúⁿ-sù in nn̄g lâng;
Ké-chí chheng-chheng bān-bān,
In ū chū-iû thang lâi bán;
Siān-ok kó ū kìm-chí,
Nā chia̍h ê sî tek-khak sí.
3. A-tong Hā-oa tī Lo̍k-hn̂g,
Ta̍k hāng hok-khì lóng chiâu-chn̂g;
Mô͘-kuí oàn-hūn in nn̄g lâng,
ài in chhiⁿ-chhám kap i tâng;
Chioh choâ chhuì lâi koái-iú,
Hā-oa siū bê soà chhun-chhiú;
Chia̍h kìm kó siū chek-pī,
Liân-luī A-tong ū tāi-chì.
4. A-tong Hā-oa tī Lo̍k-hn̂g,
Ta̍k hāng hok-khì lóng chiâu-chn̂g;
Hoān-choē liáu-āu cháu khì bih,
Chin kiaⁿ siū hoa̍t ài siám-pī;
Nn̄g lâng kì-jiân hoán-poē,
Bô thiaⁿ Siōng-tè kóng ê oē;
Tuì sí-chó͘ siū bê-he̍k,
Tì-kàu lâng tio̍h lo̍h tē-te̍k.
5. A-tong Hā-oa tī Lo̍k-hn̂g,
Ta̍k hāng hok-khì lóng chiâu-chn̂g;
Mô͘-kuí pháiⁿ-sim ài hām-hāi,
Tuì chá thàu kàu bān-sè-tāi;
ài lán kū-choa̍t Siōng-tè,
ēng bān poaⁿ kan-kuí ok-kè;
Iâ-so͘ choè lán Kiù-chú,
Sìn I chiū bián lo̍h im-hú.