朱朝來長老的小傳
郭朝成 記
1932.12, no. 573, pp. 21
朱朝來長老，早前toà佇霧峰庄的萬斗六耕農。 佇29年前來草屯教會，受梅甘霧牧師洗禮。 因為湖溪阻擋，較常去大里教會禮拜。 佇26年前做大里教會的執事。 後來搬徙toà佇北山坑耕農。 無偌久，北山坑設教會，伊也接續做執事，續升做長老。
伊的做人是中直，溫柔，熱心敬拜上帝，gâu做教會的工。 伊toà北山坑幾十年久，家庭la̍p-kha̍p，物質方面通講是失敗，家庭散赤，婦人人失明，囝一個做勞工，一個細漢，本身代積水的病幾若年久。 實在是通可憐的家庭。 若是朱長老，是安貧樂道，不時笑容，無僥疑上帝，無嫌人。
這幾年北山坑教會無傳教者通栽培。 朱長老是拖病做主理，chhoā人禮拜敬上帝，無厭倦，感心啊！ 佇8月9號，安然轉去父兜，脫離世間一切的苦難，福氣啊！ 留失明的長老娘佮兩個囝。 願主祝福伊的遺族。
|
