Chō͘-hoà Koa
Koa Î-su
1933.06, no. 579 (KCC, no. 89), pp. 28

1. Khí-thâu Siōng-tè chō jîn-luī,
Sin-thé choè hó chiū pûn khuì ;
Hit-sî hō͘ in tiàm tó-uī?
Tiàm tī Lo̍k-hn̂g ke̍k hù-kuì.
2. Lán lâng sí-chó͘ sī A-tong,
Hā-oa kap I tiàm chio̍h-tōng;
Kiâⁿ-iû siúⁿ-hoe ke̍k chheng-sóng,
àm-sî an-bîn tī chio̍h-tōng.
3. Nā-sī chheng-thian bô lo̍h-hō͘,
Ū-sî an-bîn tī chháu-po͘;
Lo̍k-hn̂g ū sai ia̍h ū hó͘,
iáu-kú Thiⁿ-pē teh pó͘-hō͘.
4. Thiⁿ sī bô hān ê só͘-chāi,
Toē tuì o͘-hûn pìⁿ chhut-lâi;
Pah hāng goân-sò͘ lóng chāi-lāi,
Chiū ū lâm-pak kap tang-sai.
5. Kó͘-chá toē-kiû ná ji̍t-thâu,
Chiu-uî ū chuí piàn toē lâu;
Toē tāng phòng-chhut toā soaⁿ-thâu,
Chiah ū chhim-hái kap khiⁿ-kau.
6. Soaⁿ-téng bān-hāng ê hoe-chháu,
Pîⁿ-iûⁿ moá-moá chhek, be̍h, tāu;
Soaⁿ-khiⁿ chio̍h-piah chhiⁿ-thî kāu,
Khoe-kîⁿ chuí-piⁿ liân-hoe thâu.
7. Thiⁿ-téng an-pâi ji̍t, ge̍h, chhiⁿ,
Khong-tiong phoè-tì gān, eng, chhi;
Soaⁿ-lāi ū chhut hó͘, lông, lî,
Chuí-lāi siat-pī hê, hî, pih.
8. ia̍h ū kià-siⁿ, hoē, chîm, chhi̍h,
ia̍h ū chhì-kui kap keng-hî ;
Soāⁿ-téng chin-choē hîm, soaⁿ-ti,
Khó-sioh m̄-chai boē chiâu-kì.