Bú-hāu Só͘-kám
K. I. S.
1933.08, no. 581 (KCC, no. 91), pp. 23-24

1. Hoê-kò͘ chá-nî cha̍p sêng-gō͘,
Thâu pái lâi kàu Phàu-tâi-po͘ ;
Lō͘-piⁿ chin choē ê hûn-bō͘,
iá-chháu chhì-phè moá soaⁿ-po͘.
2. Nā ài kiâⁿ-iû ia̍h bô lō͘,
Hē-thiⁿ báng-thâng ê kan-khó͘;
Tang-kuì chhit-chiu ê siān-hō͘,
Siap-poeh thiⁿ-it ê ji̍t o͘.
3. Seng-tô͘ chhut mn̂g ê kan-khó͘,
Goā-bīn lóng sī thô͘-bê lō͘;
Ha̍k-seng kaôⁿ-jia̍t ê kan-khó͘,
Hāu-tiúⁿ i-su̍t gâu chiàu-kò͘.
4. Goá ài siāu-kài pè-hāu só͘,
Chiū-sī khí tī Phàu-tâi-po͘ ;
Sūn-soà pò lín seng-tô͘ sò͘,
Thâu hoê ji̍p-o̍h sì sêng gō͘.
5. Soà kóng hit-sî ê thêng-tō͘,
Chho͘-hoê seng-tô͘ kiōng it-cho͘;
Hāu-tiúⁿ pún-sin kà tē-tô͘,
Hàn-bûn sian-siⁿ kà jī-pō͘.
6. Muí-ji̍t ha̍k-khò chāi o̍h-tn̂g,
ia̍h bat kiàn-ha̍k kàu Ē-mn̂g;
Ū-sî siu-ha̍k chāi hiun-chng,
Ū-sî si̍t-giām tī chhân-hn̂g.
7. Un-su ū sî kà thian-bûn,
Hō lán chai Chú sī chì-chun;
Ū-sî káng keng chin un-khûn,
Hō͘ lán chai Chú kiù lêng-hûn.
8. Seng-tô͘ ū-ê chia̍h-chhài ong,
Siong-jîn chuí-hu kap bo̍k-tông;
Chiau-hu iû-chhat kap bo̍k-kong,
Sū-chú I-su kap keng-lông.
9. Un-su thiàⁿ goán chèng seng-tô͘,
Goán ê sin-thé I chiàu-kò͘;
Muí-ji̍t thé-chhau lâi pó-hō͘,
Chhong-iú chin chió khiau-ku tô͘.
10. Un-su kà chheh chin châi-chêng,
Soat-bêng ha̍k-khò gâu chhián-bêng;
Pang-chān ha̍k-seng thang oa̍h ēng,
Hō͘ in chhut-khì thang kiù lêng.
11. Ta̍k uī kiàn-siat lé-pài-tn̂g,
Sûn-sī kàu-hoē bô hiâm hn̄g;
Chīn-la̍t hián-bêng Chú êng-kng,
Toē-ki hē-liáu chin chiâu-chn̂g.
12. Un-su thiàⁿ-thàng chèng ha̍k seng,
Su-tē ê chêng saⁿ ài kèng;
Ji̍t-ji̍t siu-ióng saⁿ kéng-séng,
Si̍t-chāi chá-sî chin hô-pêng.
13. Siūⁿ-tio̍h chá-sî gō͘-cha̍p nî,
Lâi chia chiū-kūn goán sian-siⁿ ;
Pí-phēng hit-sî ê jîn-khì,
Un-sûn tiong-ti̍t î iù-tī.
14. Si̍t-chāi Bú-hāu suí bô pí,
Tâi-oân chiūⁿ sǹg hó kéng-tì ;
Chió-chió hāu-só͘ thang saⁿ-pí,
Khó-kiàn un-su gâu kiàn-tì.
15. Chá-sî chheng-choè Phàu-tâi-po͘,
Kim-ji̍t piàn-sêng la̍k hāu-só͘ ;
Chá-sî chhì-phè thô͘-bê lō͘,
Kim-ji̍t chū-tōng toā chhia-lō͘.
16. ǹg-bāng tāi-ke kò͘ Bú-hāu,
uī-tio̍h Thian-kok gâu pháu-cháu;
Chīn-la̍t chí-tō chèng tông-pau,
Lī sè í-āu tiàm Pē tau.