Sió-toān
Lú Tiúⁿ-ló seng-thian
Lîm Chiàu kì
1933.06, no. 579, pp. 18-19
Lîm--sī Kuì-moē sī Hong-goân Kàu-hoē ê lú Tiúⁿ-ló, iā-sī Hong-goân lú-kài ê bêng-seng. Tī 3 goe̍h 18 hō, ū thoân-ta̍t kóng, "Chú ê thiⁿ-sài chin chē beh lâi chih goá, nā lâi ê sî, m̄-thang ti̍t-ti̍t kā goá kiò, lâi hō͘ goá kan-khó͘ lī-khui". Kèng-jiân kàu 22 hō pài-saⁿ àm, siū Chú chiap-la̍p chiūⁿ-thiⁿ, hióng-siú 63 hoè.
I ê lī-khui, oán-jiân sit-lo̍h chi̍t-lia̍p ê kng-chheⁿ, hō͘ kàu-hoē, siā-hoē m̄-kam, ke-thâu hāng-boé, toā-toā sè-sè liām i ê miâ kap i ê chò lâng.
Ah! I ê sí, chin-chiàⁿ sī sèng-lī ê sí, bo̍k-koài Chú ài i tńg-khì lâi hióng-siū thiⁿ ê seng-oa̍h. Nā-sī i koè-khì ê só͘-chò, si̍t-chāi chiâⁿ-chò hiān-chāi kap chiong-lâi ê siàu-liām. Siá tām-po̍h siāu-kài i ê seng-pêng, chò lâng chhin-chhiat, jîn-ài, thiàⁿ Chú, thiàⁿ kàu-hoē, gâu chiap-thāi lâng, chiâⁿ-chò chit-ê.
1. Chhim-sìn kî-tó ê lâng. Tuì kî-tó tit-tio̍h lâm-chú kái-koat ka-têng ê lân-tê, tháu-khui i ê kan-khó͘. Tuì án-ni, ēng kî-tó chò i ê sèⁿ-miā kap i ê khuì-la̍t, bô sî làng-soah.
2. ài tha̍k Sèng-keng bô ià-siān.
3. ài lé-pài. Tû-khí bē khí-chhn̂g í-goā, ta̍k-pái ê chi̍p-hoē, ū i tī-hia.
4. ài sûn hoē-iú. Ū chīn tiúⁿ-ló ê chit, kàu ta̍k ke an-uì, bián-lē kó͘-bú.
5. ài chhut-chîⁿ. Hoān-nā kàu-hoē só͘ khiàm, pa̍t kàu-hoē só͘ tê, kap lī-ek lâng ê sū, i kóng, "Bô chhut, sim kan-khó͘ bē pêng-an."
6. ài chò hó sū. Khoàⁿ-tio̍h kan-khó͘, sòng-hiong ê lâng, àm-chīⁿ pang-chān i, khiàm-khoeh ê lâng, chîⁿ chioh i bô lāi, oán-jiân To-ka chi̍t-iūⁿ.
7. ài thoân tō-lí kiù-lâng. Sì-kè ín-chhoā lâng thiaⁿ tō-lí, khah hn̄g ê lâng kap chhia-thâu, uí-thok 傳道社 ta̍k lé-pài ēng 神國新聞 kià hō͘ in.
Ah! Chit ê lâng ê lī-khui, chin-chiàⁿ sī kàu-hoē só͘ m̄-kam, sit-lo̍h tiong-si̍t ê lâng.
Tuì i kap Chú kiat-liân, oá-khò Chú lâi oa̍h, Chú ū in-huī hō͘ i heng-ōng.
Tiōng-hu sī i-seng, Chú-ji̍t khîn-siú. Cha-bó͘-kiáⁿ 4 ê o̍h lāu-bó ê khoán-sit, gâu ín-chhoā ka-têng kui Chú. Kiáⁿ-sài lóng chhut-tioh. Ta-po͘-kiáⁿ nn̄g-ê, tī Khí-kho, Tiong-ha̍k. ǹg-bāng in liām Chú ê thiàⁿ kap kì-tit lāu-bó kî-tó, lâi toè i ê kha-pō͘, sī só͘ siàu-liām.
