小傳陳思聰1933.08, no. 581, pp. 7
故蕭--氏Kam，劉茂清先生娘。 伊是崗仔林的人，20歲的時入劉先生的家庭；24歲的時，就tuì陳 Soan-lēng牧師領洗禮。 少年的時，有toè茂清先生去toà幾若位的教會。 就是崗仔林，台南，杜君英，溪州，加吶埔，後來就倒來toà里港。 無拍算佇昭和6年，頷頸生癌，到今年4月30日午後6點半，予主召伊轉去天堂。 享壽76歲。 佇5月4號午前10點，佇伊家己的本所在舉行葬式。 會葬者300外人。 伊一生做人真勤儉，gâu粒積。 堅心信主，有始有終。 佇病床中常常祈禱。 臨終的時，面顯出快樂，歡喜的榮光。
Sió-toānTân su-chhong1933.08, no. 581, pp. 7
Kò͘ Siau--sī Kam, Lâu Bō͘-chheng Sian-seⁿ-niû. I sī Kong-á-nâ ê lâng, 20 hoè ê sî ji̍p Lâu Sian-seⁿ ê ka-têng; 24 hoè ê sî, chiū tuì Tân Soan-lēng bo̍k-su niá sé-lé. Siàu-liân ê sî, ū toè Bō͘-chheng Sian-seⁿ khì toà kuí-nā uī ê kàu-hoē. Chiū-sī Kong-á-nâ, Tâi-lâm, Tō͘-kun-eng, Khe-chiu, Ka-la̍h-po͘, āu-lâi chiū tò-lâi toà Lí-káng. Bô phah-sǹg tī Chiau-hô 6 nî, ām-kún seⁿ gâm, kàu kin-nî 4 goe̍h 30 ji̍t ngó͘-hō͘ 6 tiám poàⁿ, hō͘ Chú tiàu i tńg-khì Thian-tông. Hióng-siū 76 hoè.Tī 5 goe̍h 4 hō ngó͘-chêng 10 tiám, tī i ka-tī ê pún só͘-chāi kú-hêng chòng-sek. Hoē-chòng-chiá 300 goā lâng. I it-seng chò lâng chin khîn-khiām, gâu lia̍p-chek. Kian-sim sìn Chú, iú-sí iú-chiong. Tī pīⁿ-chhn̂g tiong siông-siông kî-tó. Lîm-chiong ê sî, bīn hián-chhut khoài-lo̍k, hoaⁿ-hí ê êng-kng.
