楊Tong-jū的小傳
黃仁壽
1933.12, no. 585, pp. 17
楊Tong-jū是李Goân-hui君的婦人人，是二水教會主日學的教員。 是熱心好女德的女子，伊本是屬鹿港的教會；過來遮chiah倚兩年若定。
Tuì來到今，予家內的人歡喜，也予厝邊以及佮伊相識的人歡喜。
伊的大官是無拜上帝的人，以前雖然有濟濟人苦勸伊，總是攏bē會引chhoā伊來禮拜。 到Tong-jū來，伊的大官有受著伊的感激，就歡喜逐禮拜來禮拜。 今通講是全家拜上帝。 也通知德行感激人的力hiah大。
又閣真致意佇主日學，可惜身體軟弱，bē通逐禮拜出席，總是伊有鼓舞庄裡 的囡仔佮婦人人，彼暝時來伊的厝學白話字。 禮拜日就鼓舞人著來禮拜。 可惜啊！ 佇這pang伊的舊病閣發，醫治兩月外日無功效，佇9月21號予主召，安然過世，脫離世間的苦痛，轉去父兜，得著永遠的福氣，享壽23歲。
聽見伊死，逐人毋甘。 佇22日做葬式，彼一日真濟人出席，伊的大官看了受感激。 教會外個人也呵咾咱的整齊。
今向望列位兄姊替in祈禱，予in無餒志，會toè伊的腳步，熱心服事主。 阿門。
|
