Ki-tok-tô͘ Hiaⁿ-chí koa
Anonymo͘s
1934.05, no. 590 (KCC, no. 100), pp. 29

1. Siōng-tè só͘ thiàⁿ peh-sìⁿ moá thiⁿ-ē.
Chia̍h pá kiân-iû ūn-tōng chhē hiaⁿ-ché,
Sim-sim liām liām ài kàu i ê ke,
Chhuì kóng bē ha̍p só͘-chāi chiū kàu tè.
2. Thiⁿ Pē suî-sî chhe i kàu lâu ē,
Hoan-gêng tāi-ke chiūⁿ khì lâu-téng chē,
Koh2-sioh boē oē lâu in tán chia̍h tê,
In-uī tāi-ke ài khì siâⁿ-lāi se̍h.
3. Tāi-ke ìn goá āu-ji̍t koh lâi chē,
Hit-sî tek-khak ū êng thang hōng tê,
Kàu-hoē hiaⁿ-ché kán-tan lóng bián lé,
Tiā-ke sio̍k Chú liân-ha̍p sī chi̍t ke.
4. Ú-tiū bān-mi̍h sī Chú choè koán-ke,
Lí goá suî lâng só͘ khiàm sī siáⁿ-hè ?
Bān-mi̍h tī lán ba̍k-chêng lán thang chhē,
Toā soè mi̍h-kiāⁿ kah-ì jīm lí the̍h.
Chit-tiâu hiaⁿ-ché-koa sī Koa Sian-siⁿ choè-ê. In-uī ū chi̍t-ji̍t Suī-hong ê chí-bē khì Tâi-pak thit-thô, teh siàu-liām i ê sî-chún tú-tú kiâⁿ kàu tī i ê lâu-kha soà tú-tio̍h i. án-ni put-chí sim-sek, só͘-í i chiū siá chi̍t-tiâu koa lâi sàng goá. Taⁿ goá soà siá tām-po̍h tī ē-bīn lâi sim-sek: －
Suī-hong Kàu-hoē ê chí-bē,
Chit-ji̍t khì kàu Tâi-pak koe,
Tú-tú kiâⁿ kàu ÎN-khoân piⁿ,
Hut-jiân siàu-liām Koa Sian-siⁿ,
In-uī kó͘-chá bat choè tui,
Chiū mn̄g m̄-chai tiàm tó-uī,
Chhuì kóng boē ha̍p chiū kàu tè,
Tú-tú kiâⁿ kàu in lâu-ē.
Sian-siⁿ tú-tú lo̍h lâu-kha,
Thiaⁿ lâng teh kiò chin kî-khá,
Sian-siⁿ chiū kiò chèng chí-bē,
Chhiáⁿ in lâu-téng khì chē-chē.
Chí-bē thiaⁿ-kìⁿ chhiò hi-hi,
Tāi-ke saⁿ-chhoā chiū peh-khì,
Lí goá hoaⁿ-hí lâi kóng-oē,
Iok ū 10 hun ê kau-poê.
Sian-siⁿ chióng-chióng piàn pá-hì,
Hō͘ in khoàⁿ kàu chhiò gī-gī,
In-uī tāi-ke bô sî-kan,
Saⁿ-sî kiâⁿ lé kiò pêng-an.