信條是sím-mi̍h？
Tuì闊ê意思來講：信條，抑是信仰告白kap信經是siāng款。就是用確定ê文字來表明信仰ê實質,表現基督教 ê基本信仰。總是若tuì khah oe̍h ê意思來講：就親像thang分別信經kap信條，抑是信仰告白.就是英語所叫做Creed kap Confession of faith ê分別。現時咱總會有信條部會, teh準備咱台灣長老教會ê信條，為著án-ni,有人soà講：咱to已經有信條(chí-khí使徒信經)，ná-nih tio̍h koh立信條，kiám是beh改換咱ê 信仰 mah?為著這款因端，kiám-chhái咱thang照oe̍h ê意思，來分別信經kap信條，意思是咱所beh立ê, m̄是信經,是信仰告白nā-tiāⁿ.有人也有混做基本信經kap特殊信經.將使徒信經, Nî-se-a信經, A-tha-loē-se-o͘信經,稱做基本信經,也將其他ê時代性ê告白做特殊信經. 這個特殊信經,就是咱所beh講ê信條。
希臘Chèng-thóng教會，除去使徒信經以外，khah無用別款ê文字來表現in ê信仰。羅馬天主教會就有以外濟濟ê信仰告白.宗教改革了後，更正教會就有用濟濟款ê方式kap文字來表明in ê信仰。In m̄是否認信經, Nî-se-a信經, A tha loē-se-o͘信經,總是有另外將in ê信仰koh用無siâng ê文字來表明。因為天主教有接納chiah ê信經, 更正教也有接納，所以為著beh表明只有用信經做信仰ê 規範, m̄是有chham 教權, 抑是傳統ê關係就有種種ê信條，抑是信仰告白ê出現。因為ài tuì時代來表現咱所信ê, kan-ta用古代 ê表現是無夠額，因為各時代有無相像ê觀念kap 用語.
更正教會ê信仰告白khah 主要 ê就是(1) 路德會ê 俄書部信條是1530年所立--ê. (2) Ka-ní-bûn派-ê信條是1530年所立--ê. (3)聖公會ê 39條信條是1571年所立--ê. (4) Se-bîn-su-tek信條是1647年英國ê Hui-kok教會派所立--ê, 這個成做濟濟長老會系統ê教會ê信條。
án-ni信條是甚麼？信條ê 制訂m̄是beh 代替信經，也m̄是beh 代替使徒信經, 抑是Nî-se-a信經,若是咱長老會也會thang講m̄是beh 代替Se-bîn-su-tek信條;是kan-ta根據chiah ê, ài用khah簡明ê文字來對現代表明咱所信ê nā-tiāⁿ.將咱根據聖經所信ê福音，用現代ê文字，觀念等,來表現ê信仰告白,就是咱ê信條。是beh用信條來堅決表明咱所信ê,的確m̄是beh來改換咱所信根據聖經內ê福音信仰。
|
