Kian-kò͘ sìn-sim ê koa
(Ko-lô-se 2:6, 7)
1955.08 tē 800 hō p.28
(Paul Gerhardt chok, Chiu Thian-lâi e̍k)
1. Chú ah, Lí ê jîn-ài bô pí!
Goá beh cháiⁿ-iūⁿ lâi chheng-chàn Lí?
Sui chhut toā siaⁿ, o-ló, gîm-si,
iā sī oh-tit hêng-iông, kóng-khí;
Thiaⁿ-kìⁿ thian-kun só͘ chhiùⁿ ê si,
Si̍t-chāi hó-thiaⁿ, sīm-jiân chhut-kî!
2. En̂g-hoâ, hù-kuì, miâ-siaⁿ, toē-uī,
Kiû Chú chān goá, bián siū liân-luī;
Goá chhuì só͘ kóng, goá sim só͘ siūⁿ,
Goá ài o̍h Chú ê sèng bô͘-iūⁿ;
Chí-ū him-bō͘ Chú ê jîn-ài,
Eńg-oán chhiong-moá tī goá sim-lāi!
3. Ah, ah! Kiù-chú un-huī ê kng!
Si̍t-chāi kî-īⁿ, koh chin chiâu-chn̂g;
Kia̍h-ba̍k khoàⁿ Chú, êng-kng ê bīn,
Goá ê sim-sîn, chiū oāⁿ choè sin;
Bô koh siong-pi, bô koh hoân-ló,
Kiaⁿ-hiâⁿ, giâu-gî, iā lóng siau-bô.
4. Sui ū kan-lân, khó͘-thàng ê sî,
Ā-sī ià-siān, iu-būn, sit-chì;
In-uī Kiù-chú, jîn-ài pang-chān,
Goá chiū tit-tio̍h khuì-la̍t pêng-an:
Siàu-liām goá Chú, jîn-ài bô pí!
Thian-tông hok-khì, chin-chiàⁿ hoaⁿ-hí.
（A-men!）
Hū-kì: Nā ài gîm chit siú si ê lâng, chhiáⁿ khoàⁿ Ji̍t-pún ê Chàn-bí-koa tē 321 siú ê tiāu.
