1956 nî 4 goe̍h p.5
I-liâu thoân-tō ê koán-kiàn
(Siā Huī chok)

Chit kuí nî kàu-hoē tong-kio̍k ū chi̍t ê iàu-kín ê kiò-ho͘ P. K. U., i-liâu thoân-tō sī chit ê chó͘-chit ê tiong-kan ê chi̍t pō͘-hūn. P.K.U.sī chhin-chhiūⁿ chhiū-sin, I-liâu thoân-tō-piū sī chhin-chhiūⁿ chi̍t oe nā-tiāⁿ. Chit ki oe beh tit-tio̍h kiān-choân ê hoat-tián, tek-khak tio̍h ū kiān-choân ê chhiū-sin kiong-kip i ê ióng-hun ū kàu-gia̍h choè khuì-la̍t chiah oē thang hoat-hui i choè ki ê le̍k-liōng. Lán beh lūn i-liâu thoân-tō ê sî, sī khiā tī kiān-choân P. K. U. ê chó͘-chit téng lâi kóng. Goá siūⁿ i-liâu thoân-tō tio̍h ū ē-bīn 3 hāng ê iàu-sò͘ chiah oē sêng-kong.
1. Tio̍h ū tú-hó ê kang-chok jîn-oân.
Kang-chok jîn-oân siōng iàu-kín ê chiū-sī i-seng. I-seng sī chhin-chhiūⁿ iá-kiû ê tâu-chhiú, tē-it éng-hióng i-liâu-thoân choân-thé ê sêng-chek. Taⁿ i-seng tio̍h ū sìn-gióng, thiàⁿ lâng, kam-goān hi-seng, m̄ kiaⁿ lô-khó͘, koh tio̍h ū hó ê kī-su̍t. Chiong-hoà i-koán tī koè-khì ū chhòng-sêng hui-siông ê sêng-chek tī Tâi-oân i-liâu thoân-tō ê le̍k-sú-chiūⁿ, m̄-nā án-ni, hiān-sî iā sī tī put-toān ê chìn-pō͘ hoat-tián tiong. I-koán beh koh sin kiàn-tioh ê tāi-chì sī chiâⁿ-choè thong Lâm-pō͘ kàu-hoē só͘ koan-sim ê chi̍t hāng. Chit ê hui-hông ê sêng-chek lán lóng chai sī tuì Lân I-seng nn̄g tāi (pē-kiáⁿ) ēng sio-siāng ê sìn-gióng, thiàⁿ-thàng, hi-seng, í-ki̍p hó ê kī-su̍t lâi kiat chiâⁿ ê. Lán i-liâu thoân-tō tek-khak tio̍h ū chit khoán ê kī-su̍t jîn-châi chiah oē thang sêng-kong.
2. Tio̍h ū hó ê kang-chok tē-tiám.
I-seng beh khai-gia̍p hit ê tē-tiám chin iàu-kín; sio-siāng án-ni, i-liâu thoân-tō tio̍h kéng tú-hó ê tē-tiám. Chū-bîn sàn-chhiah bô tú-hó ê i-seng, koh chin khiàm-ēng hok-im ê sō͘-chāi. Só͘ teh kóng iân-hái tē-khu si̍t-chāi ū sek-ha̍p chiah e tiâu-kiāⁿ. Put-kò kap thoân-tō-tuī choè î-tōng-sèng ê i-liâu khah hó á-sī tī tiāⁿ-tio̍h ê só͘-chāi soán-te̍k kuí uī lâi kang-chok khah hó, che sī thang chhim-chhim siūⁿ ê būn-tê. Ná beh choè soan-thoân-sèng ê, chiū î-tōng-sèng khah ha̍h; nā-sī si̍t-chit-tek khah ū lī-ek toē-hng, goá siūⁿ kò͘-tēng ê chín-só͘ khah ha̍h. In-uī lán m̄-sī Iâ-so͘, boē thang tī chi̍t, nn̄g ji̍t tiong-kan i-tī tîm-tāng ê chèng-thâu. Si̍t-chāi tāng ê chèng-thâu tio̍h ēng khah kú ê sî-kan kap sim-sîn chiah oē-tit-thang hó; só͘-í kò͘-tēng ê chín-só͘ chiah oē thang i-tī chit khoán ê lâng.
3. Tio̍h ū tú-hó ê keng-chè.
I-liâu kang-chok pí lán só͘ siūⁿ pa̍t hāng ê kang-chok koh-khah tio̍h ēng chîⁿ. Goá choè-kīn ū teh tam-tng tām-po̍h ê i-liâu thoân-tō kang-chok, iā ná choè ná kám-kak só͘ khiàm-ēng ê chîⁿ lóng chhiau-kè ū-soàn. Hō͘ goá hoê-sióng koè-khì Boán Bo̍k-su ū kóng chi̍t kù "Chîⁿ sī tē 2 ê choân-lêng ê," si̍t-chāi ū chi̍t bīn ê chin-lí. Beh hō͘ i-liâu kang-chok oē sūn-sū, chit ê poè-āu tek-khak tio̍h ū kiān-choân ê keng-chè lâi-goân. In-uī chit ê kang-chok ná ke-thiⁿ, keng-chè ê koing-kip iā tio̍h ná cheng-ka.
Chóng-kóng I-liâu thoân-tō-pō͘ sī lán ê chó͘-chit tiong ê pah-thé tiong ê chi̍t thé. Kiān-choân ê P. K.U. chó͘-chit chiah oē hō͘ chit ê sū-gia̍p ū-hó ê khai-sí, chìn-pō͘, í-ki̍p hoat-tián.
[Phian-chiá chù: Pún-phiⁿ pit-chiá sī liû Bí tńg-lâi bô joā-kú ê i-ha̍k phok-sū kiam Lâm-tâu kàu-hoē ê bo̍k-su.]