1956 nî 10 goe̍h p.13-14
Sìn-gióng uí-jîn Su-pò͘-chin Bo̍k-su
(Khó͘ Chuí-lō͘)

Kám-siā Chú, hō͘ lán ū hó ê ki-hoē thang saⁿ-kap gián-kiù sìn-gióng uí-jîn-toān tiong ê uí-jîn Su-pò͘-chin Bo̍k-su. uī-tio̍h choá-bīn ê koan-hē, beh chin kán-tan lâi kóng. ǹg-bāng ē-tit-thang chò lán sìn-gióng siōng ê toā pang-chān.
1. I ê chhut-sì kap pē-bó.
I tī Chú-āu 1834 nî 6 goe̍h 19 ji̍t chhut-sì tī Eng-kok ài-sek-sū chiu (Esezugus) ê Kek-liû-tiān(Caerubethen) ê chi̍t ê sàn-hiong ka-têng. I ê lāu-pē chá chò To̍k-li̍p-phài ê bo̍k-su, āu-lâi chò Chìm-lé-hoē ê bo̍k-su. I ê ka-têng sī kèng-uì Siōng-tè, ū lêng-khì chhiong-moá ê sio̍k lêng ê ka-têng. I ê lāu-bó sī tiōng kî-tó kèng-khiân ê hū-jîn-lâng. Tuì I ê lāu-bó jia̍t-sim ê kî-tó, hō͘ I chiong-lâi chiâⁿ-chò chi̍t ê chin uí-tāi ê toā soat-kàu-ka. Chhin-chhiūⁿ Thè-mô͘-thài ê lau-bú Iú-nî-ki khiân-sêng ê kî-tó, āu-lâi hō͘ Thê-mô͘-thài chiâⁿ-chò chin uí-tāi ê chong-kàu-ka(I Thê 1:5-10).
2. I ji̍p sìn-gióng kap thoân-kàu ê tōng-ki.
I siàu-liân ê sî siông-siông kap lāu-pē khì keh-piah chng ê kàu-hoē chò lé-pài(hit sî lāu-pē sî-chit liáu). Ū chi̍t ji̍t, chin koâⁿ koh lo̍h seh, I ê lāu-bó tuì in kóng, Kin-á-ji̍t lín khì keh-piah ê Bí-í-bí-hoē ê pài-tn̂g lé-pài chin hó. In kàu uī chí-ū 13 ê lâng(hoē-iú) tī lāi-bīn hoé-lô͘ piⁿ teh hang-hoé. Lé-pài ê sî-kan kàu ê sî, bô khoàⁿ-kìⁿ bo̍k-su, chí-ū khoàⁿ-kìⁿ chi̍t uī sán-thiu ê tiúⁿ-ló chiūⁿ tâi-téng thè bo̍k-su chhú-lí lé-pài. I tha̍k Sèng-keng liáu, tuì hoē-chiòng kóng, Sèng-keng kóng, "Toē-ke̍k ê bān-bîn, lín lóng tio̍h gióng-bōng Goá, chiah oē tit-tio̍h kiù." Hit ê tiúⁿ-ló tuì chit ê siàu-liân ê Su-pò͘-chin kóng, Siàu-liân lâng ah! Lí tio̍h gióng-bōng Ki-tok. Chú Iâ-so͘ kóng, "Tio̍h gióng-bōng Goá , Goá uī-tio̍h lí lâu huih-koāⁿ, Goá uī lí tèng si̍p-jī-kè, Goá uī lí sí, lí tio̍h gióng-bōng Goá." Chit kù chin ū la̍t ê oē chha̍k siàu-liân-lâng Su-pò͘-chin ê sim. I siū chin toā ê kám-kek, siū sèng-lêng ê chhiong-moá, chiū choan-sim gióng-bōng Ki-tok, chhin-chhiūⁿ gī ê thài-iông ji̍p tī I ê sim, tit-tio̍h toā sèng-lī.Toā kám-siā Chú Iâ-so͘ ê toā chû-pi kap thiàⁿ-thàng, uī-tio̍h I lâu pó-hoeh lâi sí tī si̍p-jī-kè lâi sio̍k I ê choē. I chiū chek-sî koat-sim beh hiàn I ê it-seng lâi chò Chú ê kang.
3. I ê káng-tō
1) I 15 hoè ê sî chiū chiūⁿ-tâi kóng tō-lí.
2) I 17 hoè ê sî chiū hū-khí bo̍k-hoē ê choân chek-jīm ê kong-êng.
3) I thâu chi̍t pái bo̍k-hoē Ò-tāi chhī kàu-hoē(Warter Beach Church).
4) I 20 hoè ê sî(A.D. 1853) siū phèng chò Lûn-tun Sin-pa-khek kàu-hoē ê bo̍k-su (New Berk Church). Khì-chho͘ chit keng kàu-hoē ê hoē-iú 84 miâ, I tī hia bo̍k-hoē chi̍t nî goā ê keng-koè, hoē-iú ke chin-chē, muí chú-ji̍t lâi chò lé-pài ê thèng-chiòng ū 4500 miâ. Tuì án-ni I ê miâ-siaⁿ chin tháu.
5) A.D. 1856-1859 nî, I siông-siông chioh chin toā ê im-ga̍k-tn̂g chò lé-pài, thèng-chiòng chi̍t bān í-siōng.
6) A.D. 1860-1861 nî, uī-tio̍h I kiàn-tiok chi̍t keng chin toā ê lé-pài-tn̂g, chē-uī chi̍t bān lâng í-siōng.
7) I ū sî siū chhiáⁿ kàu Lûn-tun siâⁿ-goā toā chuí-chiⁿ-kiong ê toā lé-tn̂g káng-tō, thèng-chiòng 28654 miâ, ū khak-si̍t ê kì-lio̍k. I uī-tio̍h beh tī chit keng toā lé-tn̂g kóng tō-lí, tāi-seng khì chhì káng toā siaⁿ kóng, "Lí khoàⁿ Siōng-tè ê iûⁿ-ko beh tam-tng sè-kan lâng ê choē ê."Chāi káng-tn̂g lāi ū chi̍t ê chit-oân thiaⁿ-tio̍h chit kù oē siū toā kám-kek lâi sìn Chú.
4. I ê kang-chok kap pia̍t-sè.
I 38 nî kú thoân-tō ê seng-oa̍h, siá 3500 phiⁿ ê soat-kàu ê goân-kó. I ê káng-tō chin ū toā ê le̍k-liōng, siū kám-tōng hoé-kái ê lâng chin-chē. I iā chin gâu tù-chheh, ū tù 135 pún, kî-thaⁿ iā ū tù chin-chē toaⁿ-hêng-pún ê sió chheh, kap hoat-khan "Kiàm kap chhiú-kin" ê cha̍p-chì. I ū siat ko͘-jî-īⁿ, ióng-ló-īⁿ kap kî-thaⁿ chò chin-chē ê chû-siān sū-gia̍p. I ê it-seng uī pīⁿ-thiàⁿ tò͘-cheng. I tī Chú-āu 1892 nî 1 goe̍h 31 ji̍t hióng-siū 60 hoè , ji̍p tī Siōng-tè êng-kng ê pó-chō. Goān lán tāi-ke o̍h I sìn-gióng ê hó bô͘-iūⁿ, it-seng lâi tui-suî Chú Iâ-so͘ ê kha-pō͘ lâi êng-hián I ê sèng-miâ.