1956 nî 11 goe̍h p.17-18
Chho͘-tāi hun-siat kàu-hoē ê cheng-sîn (Hēng-toān 11:19-30)
(Loā Jîn-seng)

(1) uī-tio̍h hok-im sí iā m̄ kiaⁿ, ti̍t thoân.
Hēng-toān 11; 19, 20, "uī-tio̍h Sū-thê-hoán ê sū só͘-khí ê khó͘-lān lâi sì-soàⁿ ê lâng...kuí-nā lâng kàu An-thê-o, ia̍h tuì Hi-lī-nî lâng thoân Chú Iâ-so͘ ê hok-im."
Lí khosN3 hun-siat An-thê-o kàu-hoē ê khí-goân, m̄-sī tuì bó-hoē phài lâng kap hù chîⁿ lâi hō͘ in khai-thok. Sī tī sì-bīn chhó͘-ko tiong(四面楚歌中) hiah ê siū khún-tio̍k sì-soàⁿ, châi-sàn jîn-bóng, liû-lî sit-só͘, bô ke khó kui ê hiaⁿ-tī. Tī in ê poè-āu bô thoân-thé chhe-hoē, bô châi, sè, le̍k ê goā-oān. Tuì Iâ-lō͘-sat-léng cháu lâi kàu goā-kok, tuì lí-lūn, si̍t-chè lóng bô khó-lêng thang hun-siat á-sī khai-thok kàu-hoē.
(2) Pì-koat chāi tī tó-uī?
Hēng-toān 11:21, "Chú ê chhiú-kut kap in tī-teh." Chú ê sèng-chhiú kap in saⁿ-kap tâng-kang, ah, che sī hô-téng thang kiaⁿ ê sū-si̍t. Lí kì-tit Chú, I sī chiáng-ak seⁿ-sí oa̍h-miā ê Chú. I sī sím-phoàⁿ ê Chú, I sī ū koân thang sià-bián choē ê Chú, I sī ū koân thang i-pīⁿ ê Chú. It-chhè ê hō-hok thiⁿ-téng tē-ē ê koân lóng kau-hù tī I ê Chú. Chit ê Chú ê chhiú-kut kap in saⁿ-kap tī-the, che sī hô-téng khò-tit-chū ê khuì-la̍t ah? Hiān-chāi ê kàu-hoē sī, m̄-sī phah-m̄-kìⁿ Chú sèng chhiú ê lêng-le̍k tông-chāi nih?
(3) Kang-chok bo̍k-tek tuì.
Tâng chiuⁿ 21 chat, "Sìn lâi kui tī Chú ê, in ê siàu-gia̍h put-chí chē." Hit sî soan-iông hok-im ê bo̍k-tek sī iàu-kín ǹg bī-sìn-chiá chhoā lâng kui Chú. Hiān-chāi chē-chē lâng bē kì-tit chit ê bo̍k-tek, phian khì lah, chiū-sī tì-ì soan-iông kàu-phài, soà pìⁿ chò kàu-phài iûⁿ-kûn, koân-pèng ê cheng-toa̍t chiàn. Khó-sioh Chú chek-pī tong-sî ê Hoat-lī-sài lâng ê oē kin-á-ji̍t iā ènggiām, kóng, "Lín ké hó ê keng-ha̍k-sū kap Hoat-lī-sài lâng ū chai-ē ah! In-uī lín piàn kiâⁿ chuí-lō͘ lio̍k-lō͘, hō͘ chi̍t lâng ji̍p kàu; kì-jiân ji̍p, chiū hō͘ I chò tē-ge̍k ê lâng pí lín ka-poē. Lín chhiⁿ-mî ê chhoā-thâu --ê ū chai-ē ah!"
Hiān-chāi ê kàu-hoē m̄-sī iàu-kín lâng niá sé-lé kui tī Chú "tit-kiù"; sī iàu-kín lâng niá sé-lé "kui tī in ê phài." Só͘-í in kóng lín kiâⁿ sé-lé kui tī Pē, Kiáⁿ, Sèng Sîn chit khoán chiàⁿ-káng--ê iáu bô-chhái-kang.ḿ -mi̍h goán che sī Pí-tek ti̍t-hē àn-chhiú--ê, sím-mi̍h tio̍h tiàm sé-lé tî chìm--ê, sím-mi̍h tio̍h tū kiâⁿ-lâu chuí--ê chiah ū hāu, seⁿ-ki hoat-hio̍h, ēng liû-thoân gî-bûn lâi bú-bia̍t Iâ-so͘ ê pó-hoeh. Ū lâng iù-tī bô bêng soà sé 2, 3 pái sé-lé , lâi oāⁿ kuí-nā khoán kàu-phài, si̍t-chāi chin khó-liân. Lán ê kàu-hoē choa̍t-tuì m̄-thang án-ni, kai-chài koè-khì lán iā m̄-bat án-ni. án-ni chò ê kàu-hoē, Chú ún-tàng bô hoaⁿ-hí.
(4) Siū phài ê lâng chin thang hō͘ lán khim-poē.
Hit sî sī phài Pa-ná-pa khì léng-tō An-thê-o. Pa-ná-pa ê chò lâng. "In-uī I sī hó lâng, ū Sèng Sîn moá-moá, tuì án-ni chiū ke-thiⁿ chē-chē lâng kui tī Chú"(Hēng-toān 11:24).
Tâng 25,26 chat, siá "I khì Tāi-sò͘ chhoē Sò-lô; í-keng tit-tio̍h, chiū chhoā I kàu An-thê-o."
Tâng 26 chat, "In tī kàu-hoē tiong chū-chi̍p chi̍t nî kú kà-sī chē-chē lâng."
Í-siōng chit kuí kù hō͘ lán khoàⁿ chhut kang-lâng Pa-ná-pa ê chò lâng. Ū Sèng Sîn chhiong-moá, ū sìn-sim, sī hó lâng. Koh chi̍t bīn ū tō͘-liōng, gâu chhoē tâng-kang lâi hia̍p-chok. Pa-ná-pa chhoē chhut Pó-lô, che tī Ki-tok-kàu hok-im soan-iông ê le̍k-sú tiong, tek-khak sī chi̍t hāng chin toā ê hoat-kiàn. iā chin jím-khó͘ kam-goān tī hit khoán sin khai-thok ê kàu-hoē, tī hia kú-kú lâi hùn-liān ha̍k-seng, lán chit sî tuì cho͘ sìn-chiá chin khiàm hùn-liān. Chit 3 tiám si̍t-chāi sī lán chò kang-lâng só͘ tio̍h o̍h, te̍k-pia̍t sió-tī koh khah m̄ chiâⁿ-mi̍h.
(5) Bêng-chheng kî-si̍t(名稱其實) ê hêng-uî.
Soan-iông hok-im iàu-kín m̄-sī chāi tī chhuì, koh khah iàu-kín sī chāi tī kiâⁿ.
26 chat, "Koh ha̍k-seng chheng-chò Ki-tok-tô͘ sī tuì An-thê-o khí."
29, 30, "Tuì án-ni ha̍k-seng tiāⁿ-tio̍h ì-sù, ta̍k lâng chiàu I ê le̍k-iōng, kià khì kióng-kip tiàm Iû-thài ê hiaⁿ-tī, in chiū chiàu án-ni kiâⁿ......"
Hiaⁿ-ché, sè-kan m̄-sī chîⁿ tē-it iàu-kín, sī sìn-sim, thiàⁿ-sim tē-it. Lâng nā ū sìn Chú, thiàⁿ Chú; chîⁿ khǹg bē tiâu, khoàⁿ-tio̍h kàu-hoē, hiaⁿ-tī ū kan-khó͘, ū khiàm-kheh, ka-tī m̄-bián lâng kóng chiū the̍h chhut--lâi. M̄-sī kià-hù, m̄-sī hū-tam, sī tuì thiàⁿ kap kám-siā Chú ê hōng-hiàn. M̄-sī bó-hoē, pún-pō͘ kià chîⁿ lâi hō͘ in hun-siat, lâi hō͘ in sin khai-thok kàu-hoē, sī sin khai-thok ê sió kàu-hoē tian-tò kià chîⁿ hō͘ Bó-hoē Iâ-lō͘-sat-léng.
Í-siōng chit 5 tiám chiū-sī tong-chho͘ sin khai-thok ê kàu-hoē ê cheng-sîn lah!