1956 nî 12 goe̍h p.13-14
Chin ê khiam-pi
(Chan Siù-hōng)
Khiam-pi sī Ki-tok-tô͘ chin tiōng-iàu ê tek-hêng, in-uī Sèng-keng ū chē-chē só͘-chāi kà-sī lán tio̍h khiam-pi, chóng-sī bô bêng-liâu soat-bêng, tì-kàu ē gō͘-kái, piàn chò sū jî hui ê khiam-pi (似而非的謙卑) bô chió.
1. Tuì lâng chin gâu àⁿ-io khiam-pi ê thài-tō͘ lâi hō͘ lâng hoaⁿ-hí, lia̍h án-ni chò khiam-pi, che iā m̄-sī khiam-pi, sī chi̍t khoán ê lī-kí chú-gī nā-tiāⁿ. Chū-jiân m̄-thang lām-sám sáng-sè lâng, chóng-sī iā m̄-sī gâu lām-sám tuì lâng àⁿ-io chiah sī khiam-pi.
2. Ū ê lâng goā-māu chng chò chin khiam-pi ê thài-tō͘, lia̍h ka-kī chò bô kè-ta̍t ê lâng, nā-sī i ê lāi-sim tī Siōng-tè kap lâng ê bīn-chêng ū teh khoa-kháu i ê khiam-pi, iā teh kî-thāi in-uī i ū khiam-pi ē hō͘ Siōng-tè o-ló. Chit khoán ê khiam-pi sī choè ok-chit ê. Au-gû-tīn kóng, Chit khoán ê khiam-pi sī goā-māu ê khiam-pi, kî-si̍t sī kiau-ngō͘.
3.Tuì chū-kí ê lâng-le̍k kè-ta̍t kó͘-kè siuⁿ kē, tì-kàu i ē thang chò ê kang lâi the-sî bô chò. án-ni chhin-chhiūⁿ khaim-pi ê khoán-sit, kî-si̍t m̄-sī khiam-pi, sī jīm-sek put-chiok.
Taⁿ chin ê khiam-pi sī sím-mi̍h?
1. Tī Siōng-tè ê bīn-chêng jīm-sek ka-kī.
Bô lūn sím-mi̍h lâng tī chhòng-chō ú-tiū toā Chú-cháiⁿ Siōng-tè ê bīn-chêng lâi jīm-sek ka-kī, ē chai I sī chi̍t ê bî-sè loán-jio̍k bô kè-ta̍t ū choē ê lâng. Chhin-chhiūⁿ A-pek-la̍h-hán tuì Siōng-tè kóng, "Goá sī Hoé-hu thô͘-hún"(Chhòng 18:27). Á-sī Í-sài-a só͘ kóng, "Khoàⁿ ah, bān peh-sìⁿ lóng chhin-chhiūⁿ chuí-tháng ê chi̍t-tih-chuí, koh chhin-chhiūⁿ thian-phêng-téng ê tîn-ai"(Í-sài-a 40:15). Koh beh chhin-chhiūⁿ Pó-iô ê thó͘-khuì, "In-uī goá só͘ ì-ài ê hó goá bô khì kiâⁿ goá só͘ m̄-ài ê pháiⁿ hoán-tńg khì kiâⁿ......Khó͘ ah, goá ê chò lâng, chī-chuī beh kiù goá thoat-chhut chit ê tì-kàu sí ê thé ah?"(Lô-má 7:19 í-hā). Ta̍k lâng tī Siōng-tè ê bīn-chêng jīm-sek ka-kī chiū ê hoat-kiàn ka-kī ê bô la̍t, bî-sè, ū choē, chiah ē pá-ak tio̍h chin ê khiam-pi, nā bô, ta̍k lâng ê lāi-sim lóng ū kuí-hun ê kiau-ngō͘-sèng tī-teh.
2. Jīm-sek Siōng-tè ê in-sù.
Siōng-tè hō͘ lâng chhut-sì tī chit sè-kan, ta̍k lâng lóng ū bô saⁿ-tâng ê in-sù hō͘ lâng. Só͘-í lán tio̍h lâi jīm-sek Siōng-tè hō͘ lán ê in-sù. Chhin-chhiūⁿ Pó-lô khó͘-khǹg Lô-má ê sìn-tô͘ "In-uī goá tuì só͘ hō͘ goá ê in kā lín tiong-kan ta̍k lâng kóng lín só͘ siūⁿ lâi chhún-to̍k ka-kī, m̄-thang poâⁿ-koè tī eng-kai siūⁿ ê, só͘ siūⁿ tio̍h an-hūn lâi siūⁿ chiàu Siōng-tè só͘ siúⁿ-sù ta̍k lâng sìn ê hūn-liōng"(Lô-má 12:3). Chin ê khiam-pi sī "Só͘ siūⁿ chhún-to̍k ka-kī m̄-thang poâⁿ-koè tī eng-kai siūⁿ ê," chiū-sī bô ka-kī kó͘-kè siuⁿ koân. "Só͘ siūⁿ tio̍h an-hūn lâi siūⁿ," chiū-sī bô kó͘-kè siuⁿ kē. "Chiàu Siōng-tè só͘ siúⁿ-sù lán ta̍k lâng sìn ê hūn-liōng an-hūn lâi-siūⁿ," tī Siōng-tè ê bīn-chêng lâi sì-chiàⁿ jīm-sek Siōng-tè hō͘ lán ê in-sù sī kap khiam-pi bô mâu-tún, iā choa̍t-tuì bô m̄-tio̍h ê sū.
3. ài êng-kng Siōng-tè
Tuì Siōng-tè niá-siū in-sù ê lâng, tio̍h ài chiong Siōng-tè hō͘ I ê châi-lêng lâi hoat-hui lī-ek lâng chiah tio̍h. Nā siat-sú chiong Siōng-tè hō͘ I ê in-sù lâi chò chū-kí ê miâ-siaⁿ, tē-uī,lī-ek lâi chò, sī ko͘-hū Chú ê in. iā ē khoa-kháu I ê châi-tiāu chit khoán ê lâng m̄-sī khiam-pi ê lâng; chin ê khiam-pi ê lâng tuì Siōng-tè só͘ tit ê in-sù loā-nih toā iā bô beh tī lâng ê bīn-chêng lâi khoa-sī I ê châi-lêng, iā-m̄-sī kan-ta chò ka-kī ê lī-ek, iā ài lī-ek pa̍t lâng só͘ chò ê sū-gia̍p, m̄-sī beh êng-kng chū-kí, sī ài êng-kng kui Siōng-tè. Sèng-keng kì hó ê Sat-má-lī-a lâng kiù hit ê tú-tio̍h chhat ê lâng, Sèng-keng bô kì hó ê Sat-má-lī-a lâng ê miâ. Tuì chit ê kì-sū iā sī kà-sī lán lîn-bín lâng chò hó-sū, m̄-bián chhut-miâ lâi hō͘ lâng chai, hō͘ lâng o-ló. Tioh êng-kng kui ti Siōng-tè chiah sī chin ê khiam-pi.
