Iâ-so͘ lâi-le̍k koa

Chāi-sek-lí Má-lī-a (Má-thài 1:13-25)

1956.12 tē 816 hō p.25-26

(Toh Hêng-lī)

1. Tī kó͘-chá Iû-thài kok,

Siōng-tè sù toā hok;

Siúⁿ-sù chi̍t ê chāi-sek-lí,

Sìn-gióng phín-hēng bô thang pí.

2. I ê miâ Má-lī-a,

Sèng-keng thang tiau-cha;

I hō͘ Iok-sek siū phèng-tiāⁿ,

Toan-chèng lóng bô lām-sám kiâⁿ.

3. Sìn-gióng chhim, phín-hēng hó,

Lâng-lâng to o-ló;

I tuì Sèng Sîn lâi siū-thai,

Pē-bú chhin-lâng lóng m̄-chai.

4. Má-lī-a i pún-sin,

Chhim-chai che goân-in;

Iok-sek khoàⁿ i toā pak-tó͘,

Sim-koaⁿ hui-siông toā kan-khó͘.

5. Siūⁿ koè-lâi siūⁿ koè-khì,

Sim-koaⁿ chin sit-chì;

Gī-lâng siūⁿ-tio̍h che hun-in,

Koat-sim àm-chīⁿ beh hoè-chhin.

6. Bîn-bāng tiōng Chú chí-sī,

Hiòng i chiū kóng-khí;

Iok-sek, Iok-sek bo̍h siū-khì,

Che sī Siōng-tè ê chí-ì.

7. Só͘ phèng-tiāⁿ, lí bián kiaⁿ,

Chú kóng lí tio̍h thiaⁿ;

Má-lī-a ê hoâi-īn,

Choan-choan tuì tī siū Sèng Sîn.

8. Tio̍h ài chhoā ji̍p lí mn̂g,

Phín-hēng lóng chiâu-chn̂g;

èng-giām Kū-iok ê Sèng-keng,

Sian-ti só͘ kóng thang chèng-bêng.

9. Chāi-sek-lí beh siⁿ kiáⁿ,

Lí tio̍h ka hō miâ;

Hō I kiò-chò miâ Iâ-so͘,

Sè-kan lâng-lâng beh chheng-ho͘.

10. Bîn-bāng tiong ba̍k-chiu kim,

Iok-sek chiū koat-sim;

Suî-sî chhoā i lâi ji̍p mn̂g,

Kàu i siⁿ-kiáⁿ bô tâng-chhn̂g.

11. Tng hit sî toā tiau-cha,

Chiū chhoā Má-lī-a;

Ti̍t-ti̍t kiâⁿ kàu Pek-lī-hêng,

ài chō ke-kah thang hun-bêng.

12. In n̄g lâng chiū saⁿ-chhoā,

Kàu uī ài beh toà;

In-uī kheh-koán bô só͘-chāi,

Nn̄g lâng hioh tī bé-tiâu lāi.

13. Má-lī-a tī hit sî,

Tú-tio̍h seng-sán kî,

eⁿ-á chhut-sì tī bé-chô,

ēng pò͘ pau I chò kì-hō.

(Phian-chiá chù: Toh Sian-siⁿ chit phiⁿ koa chò liáu chin hó thiaⁿ, iáu ū chin tn̂g ê kó, ǹg-bāng ê[sic.] thang kè-sio̍k chhut).