1956 nî 3 goe̍h p.25
Tâi-oân Sèng Sîn
(Liāu Tit chok)

Bo̍k-su pìⁿ chò soan-kàu-su
Chāi-lâi ū chi̍t ê Kiô-á-thâu hun 7 téng ê tāi-lí thoân-tō, ū bái thó͘-tē kuí-cha̍p kah, soè-kî nā kàu, siông-siông bô kàu chîⁿ thang la̍p, tio̍h cháu khì bih. Hit ê lâng ta̍uh-ta̍uh ài lâi kā bo̍k-su chioh chîⁿ, nā chioh bô ê sî, lé-pài chē toà tâi-á-chêng chhoē khàng-khiah, bo̍k-su lo̍h tâi ê sî, tng chèng hoē-iú ê bīn-chêng hiān pok; hó-tit bo̍k-su-niû thang kap i tú-chuí, ū sî chek-pī kàu hō͘ i ma-ma khàu.
Bo̍k-su-niû koè-sin liáu, hut-jiân-kan koh ū pa̍t ê hoē-iú ê hui-siông ap-pek kàu; N̂g Bo̍k-su chiū siūⁿ-tio̍h sian-chhe ê hoan-hù! Sio̍k-gú kóng, "Sek sî-bū chiá uî chùn-kia̍t," (N̂g Bo̍k-su ê lâng-mià kiò-chò ‘Lêng-kia̍t' (能傑), "Ti chìn-thè-thè chiá-uî eng-hiông," iā "Tāi-tiong-hu lêng-khut lêng-sin," taⁿ tio̍h "Saⁿ-cha̍p-la̍k kè cháu uî sian." Chiū sî-chit, khì toà tī Kî-āu soaⁿ-piⁿ ê khang i-koán pài-tn̂g chò chū-iû thoân-tō. Che thang hián-bêng i sit-chāi sī chì-sêng (誌誠) bo̍k-su.
Hit sî Kū-siâⁿ kàu Hōng-soaⁿ ê tiong-kan lóng bô kàu-hoē. Che iā tú-tú chhin-chhiūⁿ Si̍t-chhoan Bo̍k-su the kà San-sek Tiong-chiòng ê hong-hoat: San-sek Kun-pêng Sian-seⁿ iáu-boē chhut-sin ê sî, khì chhéng-kàu Si-chhoan bo̍k-su kóng, "Sian-seⁿ! goá beh khì kap Kiù-sè-kun ha̍p-chok, m̄-chai tio̍h án-choáⁿ khah ē sêng-kong?" Sit-chhoan Bo̍k-su kóng, "Tio̍h khì bô kàu-hoē ê só͘-chāi thoân-tō, khah ê sêng-kong!"
N̂g Bo̍k-su hó hó͘-soaⁿ! āu chhoā ê Bo̍k-su-niû, sī toà tī Chiong-hoà Lîm Chhiah-bé Bo̍k-su hia ha̍k--si̍p--ê; chò kang oa̍h-tāng, chú-chia̍h sī keng-chè, chu-ióng, bí-bī. Koh siū-tio̍h Lân I-seng ê hêng-i kiù-sè, kap Muî Bo̍k-su ê thoân-tō chû-siān e kám-boà; chit nn̄g-uī to̍k-sin ê chheng-liân Soan-kàu-su sī beh toè Chú kàu tio̍h ê lâng!!!
Taⁿ N̂g Bo̍k-su kap koh sio̍k-hiân ê bo̍k-su-niû, nn̄g lâng tâng-sim hia̍p-le̍k toà tī lâm Tâi-oân káng-kháu, ná chhin-chhiūⁿ keng-êng chi̍t keng kheh-koán pài-tn̂g; ū sî chē lâng lé-pài, ū sî chió lâng chū-chip, iā ū sî-chūn kan-ta ka-tī chi̍t ke teh lé-pài. Chóng-sī N̂g Bo̍k-su chin gâu thun-lún! Bô hoē-iú, thoân kàu ū hoē-iú!! Bô kàu-hoē, siat kàu ū kàu-hoē!!!
Bo̍k-su, Bo̍k-su-niû thoân-tō í-goā, koh ióng-sêng chhin-peng kap chek-chū niû-chháu; ǹg-bāng sî kàu, "Chìn khó-í kong, thè khó-i siú!!!" Chin-chiàⁿ "Jîn iú siān-goān, thian pit chiông-chi." āu-lâi chêng ê Bo̍k-su-niû sêng-kong chi̍t tuì; lâm--ê chò bo̍k-su, lú--ê chò thoân-tō-niû kap lú tiúⁿ-ló. āu ê Bo̍k-su- niû iā sêng-kong chi̍t tuì, lâm-lú lóng chò chip-sū. "Iú chì sū kèng seng!!!"
N̂g Bo̍k-su nî-lāu pia̍t-sè, Thoân-tō-kio̍k chiū phài i ê toā kiáⁿ-sài khì kā i chhiâⁿ-boé.
Liáu-āu Kî-āu chò Tông-hoē! Chhiáⁿ Bo̍k-su!! Khí pài-tn̂g!!!
(Boē-oân).