首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 西羅亞ê 池
西羅亞ê 池
卷期：第971號 本次： 日期：1965/12 刊名：台灣教會公報 頁數：12
篇名：西羅亞ê 池 [ SE-LÔ-A Ê TÎ ]
作者：編輯部 Phian-chip-pō͘͘
  顯示 : 漢羅 全羅 並列  

西羅亞ê 池
編輯室
1965.12.01 P.12-15、18

人物：
青瞑人。
過路人A， B， C， D， E。
法利賽人1， 2， 3。
青瞑人ê老父。
青瞑人ê老母。
其他群眾。
時間
耶穌在世中。
所在：
耶路撒冷城外，西羅亞 ê 池邊。
隔一條鬧熱ê路ê hit 旁，有真清 ê西羅亞池。 Tī 池邊有發一jiah一jiah ê蘆葦。對 chia看過去有耶路撒冷ê聖殿，hit個白色照著太陽會反射。是靜靜春天ê早起時。

幕開
青瞑人柺á tok-leh tok-leh, 對 正旁 登場。
青： O͘h! 到 lah， 到 lah，有鼻著真靜 ê水 hiàn， (柺á tuh-leh行2, 3 步)細膩leh， m̄-thang chhū-倒。
青瞑人用柺á 勻-á tuh-leh tuh-leh行-oá tî邊。過路人對倒旁趕緊起來。
過路 A：掠準是啥人leh， tō是平時tī聖殿ê門口teh求施捨ê乞食。Tiàm 這個池邊sô-來sô-去，若跋落去leh。
青： 多謝，真對不住，請chhoā我khah oá水邊leh,好m̄？
過路 B：是beh chhòng甚麼？目睭一下無看見，m̄敢teh想beh 自殺 leh？
青： 自殺...實在也bat想beh死，親像chiah-nih無自由，不如死死leh.。也bat 幾-nā 擺 án-ni想總是...
過路 C：也taⁿ決定beh死no͘h，也soà 想 beh叫阮kā你安排善後nih。
青： m̄是，m̄是，今-á-日 ê我是滿有ǹg望ê，請恁看我ê目睭leh。
過路 A： (Kap B， C，相看，笑笑講) 按怎，阮看leh。
過路 C： Hǹg， he目睭m̄知糊甚麼物？
過路 A：好，路糊糜 lah。
青：這是拿撒勒ê耶穌kā我糊 ê。 也耶穌叫我來西羅亞池洗，所以趕緊ài 洗洗leh。淺khah 緊 chhoā我oá-去水邊leh，拜託。
過路 A： Hǹg， hō͘耶穌kā你糊 ê ò͘。 M̄-kú耶穌kiám會醫治出世就無看見ê 青瞑人leh，穩當是teh 安 狗心no͘h！
過路 C：是lah，穩當是án-ni lah。耶穌是想講你這無法度thang看見，所以烏白kā你講。真正無法度。
青：請恁 m̄-thang án-ni講：我知耶穌m̄是hit款pián-仙-á， 自到-taⁿ 伊所做ê事攏無有hit款無影 chiah-ê.
過路 C： oà--ah，你ê目睭若會開，我甘願倒頭栽peh聖殿êgîm-á hō͘你看。
過路 B：無代無誌變這款把戲，你若無人氣，做乞食就m̄免想beh分有。
青： (身軀chhoah一下)。無要緊，我無boē記得耶穌所講ê話(腳 chhip-leh chhip-leh，soà àⁿ落去用4 腳 chhip oá去水邊)。
過路 A： Hà！soà teh 起khong。
過路 B：死神teh chhē 伊。
過路 C： Ah！ Ah！ 會 chhū落去水內。青瞑人hò͘水洗目睭。
過路 B：真出力teh洗。
過路 C： Hà，無法度。青瞑人雄雄 peh起來，出歡喜ê 聲。
青： Ah！有看見，有看見，目睭有看見(peh起來跳，走到tī中央，腳thí開，手kia̍h koân， 看天，其餘ê人攏goân-ngia̍h)。Hò͘！ chiah-nih suí，he就是天 ò͘ (指前後，左右) he就是草埔ò͘！ Hiah-nih suí ê 色， hit個高高ê所在就是山！有看見，有看見，(雄雄發見家己，看家己ê手)，這是甚麼！o͘h，是手(問過路人)，是m̄？這是指頭á， 1， 2， 3， 4......
有10 隻 (腳 kia̍h高)這是腳， án-ni一步一步thang行(手 hìⁿ-leh, hìⁿ-leh行來行去)。

※※

法利賽3人對 正旁起來，khiā teh 看 hit個青瞑人。
法 1： (雄雄行oá-去，對手掠--teh)。恬恬，你是啥人。今-á-日是安歇日，toà 這路裡tiô-來tiô-去，真無謹慎。
青： (hō͘人hoah一下，soà 歹勢歹勢，總是真歡喜)。先生，我因為真歡喜，歡喜到 boē顧得。
法 2：是teh 歡喜甚麼，tī安歇日án-ni做是犯律法ê。
法 3： 會妨害交通。
青：我m̄是teh tiô跳，是目睭得看見teh歡喜。
法 2： 烏白講：天光目睭就看見是應該ê， 犯律法就是犯罪，beh告tī議會ô͘。
青：我到頭-tú-á是青瞑人，也現今得著看見。
法 2：甚麼，講hit號無ê (對眾人)恁大家，這個kiám真正有青瞑？
過路 A： (踏一步進前)。是，到 tú-á 伊實在是青瞑。
過路 B：昨昏iáu坐tī聖殿ê門teh求乞。
法 3： 若講án-ni， ná親像bat看見。(對 青瞑人)也是thài會連鞭變有看見？
法 1：詳細講看覓。
青：有一個叫耶穌ê，伊將土糜糊tī我ê目睭，叫我來西羅亞ê 池去洗，所以我就án-ni做，也就得著看見。
法利賽人大家相看，恬恬。青瞑人m̄-kam m̄-kam khioh柺á起來，想beh 退場。
法 1： 慢且是，hit個耶穌tī tó位？
青：我m̄知。
法 2： 若無老實講：是對你不利ô͘。
法 3：你是kap耶穌結黨teh 騙人m̄！
青： 伊是大先知，先知人thái 會 騙人。
法 2： Hǹg，你有對耶穌得著錢好？
青：得著比金錢khah好ê。
法 2：得著甚麼？
青：啥事我親像罪人teh受審問？比金錢khah好ê就是開我 ê目睭。
法 3： hit個耶穌是無守律法 ê， hit款人m̄是先知。
青：耶穌kiám án-ni。 Kiám-chhái án-ni講是失禮，我看恁是真自高ê。耶穌的確m̄是hit款人。伊真仁慈，親像我這款乞食，人伊也用手攪土kā我糊。
法 2：你是對阮法利賽黨 beh反抗m̄？
青： m̄是，m̄是，是照所想án-ni講nā-tiāⁿ.
對 正旁已經有hè ê 青瞑人ê父母相牽手出來，攏是穿bái-bái.
父： O͘h！你thái 會 tī chia。
母： Cha-暝你是去tó位？也無tńg來厝裡， 恁爸爸 kap我通暝無睏煩惱你。
青： Ah，爸爸，媽媽，請恁歡喜，我ê目睭已經看見lah，出世到 taⁿ頭一擺看著恁ê面。無有比這個 khah歡喜ê.
父：甚麼，(看青瞑人ê面)。O͘h！你ê目睭得著開，這真奇妙！
母： (抱青瞑人)目睭得著開 (哮)。
法 1： (對父母) oé， oé， 恁 ài謹慎，今á日是安歇日。這個實在是恁 ê 囝 mah， kiám出世就青瞑 mah？
青瞑人ê父母看見是法利賽人，就趕緊對 in行禮。
父：是，是，是阮ê 囝。
母：真可憐，對出世就青瞑.
法 3： Kiám m̄是假做青瞑--ê。
青： iáu teh 疑-ngái mah。
父： Aih (對伊ê 囝)這，m̄知甚麼原因，對出世就雙目攏無開。也現在得著看見，這攏是上帝ê恩惠。
母： (對法利賽人tàm-頭)這攏是對 恁 ê祈禱所致蔭 ê.
青： 媽媽， m̄是lah， in kap我攏無甚麼干涉。實在是昨昏對我這身命感覺厭世，就昨暝 tī西羅亞池邊sô-來sô-來，到天光hit時陣，我聽見10 外人ê 腳步聲 tī teh來，也對 in所teh講ê話知影是耶穌kap伊ê 學生，因為我tī聖殿teh求乞 bat聽見耶穌ê話。Hit中間學生ê一個對耶穌講：「先生，這個 青瞑人，是對 chī-chuī犯罪所致， 抑是是對伊ê父母所犯ê罪？」hit個學生所講ê 「這個」就是我。
父：也耶穌按怎 kā 伊應？
青：耶穌án-ni kā伊講，「也m̄是這人，伊ê父母也無。獨獨是上帝ê榮光beh 對 這這人來顯明。」伊就將土糜糊 tī我ê目睭，叫我去西羅亞ê 池洗。聽著耶穌chiah ê話，對我ê心底就有一款ê力chhèng出來。
母： 對 án-ni你就照耶穌ê話去做好。
青：是，án-ni目睭就得著開。. 爸爸，媽媽，我是hō͘耶穌kā我開目睭ê。
法 3： hit個耶穌是罪人。
青：是罪人á m̄是，我m̄知，我只有知伊是sòng-鄉ê，哀傷ê，破病ê， 青瞑 ê，跛腳ê ê朋友。開我ê目睭是真好ê證據。
法 1：講甚麼，你想beh教示阮法利賽人mah？
青：教示人ê是恁，我是將實在ê事......
法 1： (親像teh háⁿ ê款) teh講甚麼話！
父：你khah 緊 kā in 說多謝， thang tńg來去。
青： Thái tō kā in 說多謝。 tńg來去。
法 3： 慢且是，ài koh問你一項事。耶穌是用按怎開你ê目睭？
青：已經kā 恁講幾-nā擺 lah。問到 hiah詳細，恁也是想beh做耶穌ê學生nih。
法 3：講甚麼，khah 失禮。親像你這款ê chiah是hit個草地木匠ê學生。阮是摩西ê學生。摩西是直接對上帝聽著命令ê.
青：耶穌確實是比恁，也比摩西koh-khah gâu。 Tī聖經也無記摩西bat醫好出世就青瞑 ê。親像這款神蹟，自有世間以來未bat聽著。 若耶穌m̄是上帝ê 囝，也boē-thang 開 青瞑人ê目睭。
法 1： (對其他ê法利賽人) chhap 這號痟人，teh-beh boē 赴禮拜lah，咱來去。
法 2：是，是，chhiân真久lah，來去(對 青瞑人) oé， 痟--ê。
青：我m̄是痟--ê。
法 2： 對阮看，你m̄是正經ê。
青： 若我看恁，也m̄是正經ê， koh 恁是臭耳 兼 青瞑 ê。
法 3：講甚麼無禮 ê話。
青： Kiám m̄是án-ni。 Khah講to聽無ê 耳，看也看無ê目睭......
法利賽人3，去，起來走oá 對 青瞑人ê手掠--teh.
法 3： Hǹg， 這款狡怪，謗瀆上帝ê榮光kap律法ê罪，阮beh告你tī公會。來！(對其餘ê法利賽)我beh 拖伊來去公會，請恁先去。
青：我是按怎 (受掠ê手滾開)。
法 1：因為你犯罪，所以阮beh告你tī公會。Koh無久，你就beh tī城外hō͘人用石頭tìm死。定定。
法 3： (koh再拖 青瞑人ê手)。來！
青： (Ná行，ǹg法利賽人)。恁 kiám有權 thang審判人ê是上帝。Hō͘上帝無得著榮光ê kiám m̄是恁？ 恁就是假好ê人。
法 1： 若 據在你講，soà一直講無禮 ê話。
法 2： 若有不平chiah來公會講。
法利賽人3，將oá來ê父母tùn走，chhoā 青瞑人對倒旁落去。
法 1： (對法利賽2)。實在真可惡。
法 2： Koh一個khah可惡ê是煽動 chiah ê愚民 ê草地木匠ê耶穌。
法 1：是，hit個若無khah 緊 kā 除掉， (看hiah ê tī hia teh躊躇ê父母)恁 chiah ê老人，家己ê 囝著kam-tok hō͘好。
父母：是，是，好。
法利賽人行去正旁， 群眾分開tī左右。
法 2： 恁大家，攪擾恁ho͘N3。
過路 A： Boē ò͘， boē ò͘。
法 1： 恁大家也是beh去聖殿ho͘N3？
過路人：是，是。
法 2： (對 法 1)。Taⁿ咱來去。
法利賽人，過路人，父母閃 tī 正旁，就對 倒旁法利賽3，走到雄-kài-kài出來khiā tī中央。
法 3：小囝 leh，走tó-去，小寡無teh注意，hit個假 青瞑 ê soà走去，真狡怪。
對 正旁 過路人D， E，行到。
法 3： oé， oé，請問leh。
過路 D： Hâⁿ！
法 3： 恁有看著一個乞食人無？
過路 E：乞食款ê人，hàⁿ！ tú-á tī hia (指行來ê所在) kap 4， 5 個人相 閃身，不敢tī hit中間。
法 3： Hǹg， 穩當是(對 正旁落去)。
過路 D： (看hit個落去ê後影)。這陣 ê猶太人攏mā是m̄-成 人。
過路 E： 除去祭司kap法利賽人，kap抽餉ê以外攏mā án-ni。
過路 D， E： Hà, hà (ná笑，對 倒旁落去)。
對 倒旁 青瞑人勻-á 出來，khiā tī西羅亞ê 池邊。
青： (靜靜teh看水面)。出世到 taⁿ頭一擺 看著 ê世界，實在是想像以上ê suí。總是所看著人ê面，thái hiah-nih 歹看。(停一下)。Ah！我iáu-未 對耶穌說多謝，來去chhē耶穌，對伊講我有照伊所講ê去做，就目睭果然得著看見。出世以來頭一擺看著天地自然ê suí。我歡喜到 boē顧得。總是看著人ê形狀chiah 歹看soà失望。Hiah ê teh sáng-勢 ê 法利賽人抑是經學士，做hō͘上帝無歡喜也掠做無要緊(不知不覺中已經跪 teh beh祈禱ê姿勢)。主耶穌，hiah ê人是teh想beh 害你。主耶穌，請對這霎 hō͘我做你ê奴僕，thang報萬分 ê 一份 ê 恩。 (Khiā起來)。是，趕緊來去kā伊拜託。我著做耶穌ê奴僕，thang 當面 kap法利賽人交戰。
青瞑人行對 正旁去，對後面有聲。
聲：請等候 leh。
青： (越頭)。是甚麼人。
聲：你kiám beh信上帝ê 囝。
青： Hiah奇怪，也無看著人。
青瞑人注意看左旁， ná親像看著人行2， 3進前。
青：你是chī-chuī？
聲： 拿撒勒 ê耶穌。
青： (跪落去)。O͘h！主耶穌。
聲：你kiám有信我是上帝ê 囝。
青：主ah！我信，你是上帝ê 囝，是主基督。
聲： 若信，著背十字架來tè我。
青：是，無論是監獄，抑是刑場......
舞台小寡暗，合唱ê 聲忽然起，合唱中幕關。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461