首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 代表團母會訪問記（3）
代表團母會訪問記（3）
卷期：第950號 本次： 日期：1965/1 刊名：台灣教會公報 頁數：6
篇名：代表團母會訪問記（3） [ TĀI-PIÁU-THOÂN BÚ-HOĒ HÓNG-BŪN-KÌ(3) ]
作者：
  顯示 : 漢羅 全羅 並列  

代表團母會訪問記（3）
九月1日，tī Toronto 機場阮就隨時看著Bêng Iú-tek牧師kap 幾-nā位母會 ê 幹事teh聽候阮。親像tī倫敦阮ê心真感激。經過介紹了，就坐幹事先生ê 車到一位母會kā阮預備便便ê 新起好無joā久ê 宿舍。 這間宿舍是三層樓，會得thang 收容40 外人，是beh為著養成傳福音ê人，加拿大 女宣道會所起ê。早起頓7.45就會thang 備案好勢hō͘阮thang食早餐，中晝kap暗頓，阮thang家己設法。逐人有一間房，明白家己 ê房間，就tī 這間宿舍 (名做EWART COLLEGE) ê草場歙一張紀念像。後來受案內坐地下鐵(Subway)去參觀 Toronto大學，有醫學院，有神學院(Knox College) kap其他濟濟學院。也有拜訪母會總會事務所，kap中國人ê Y. M. C. A. (攏講廣東話ê，真早就有)。暗頓就是beh kā 陳 Huī-lâm牧師，就是領隊 餞別 (伊 tī 9月3日beh kap阮離開去Washingtong深造)。
九月2日，Bêng牧師kap牧師娘來chhoā阮去看世界真出名ê NIYAGARA FALL大水-chhiâng。 Kan-ta 車來回 ài坐6小時。今á日ê暗頓Bêng牧師kap牧師娘做作東請阮食暗頓。
九月3日頂晡，是團員自由ê時間，到 11點30 分阮就受案內到一位餐館，就是加拿大母會 ê歡迎公宴。阮13 個人客受請坐tī人客位，主人有47人，就是母會議長，總幹事，Bēng牧師，以及教界 ê領袖(有醫生，教授，女宣 ê指導者等，濟濟方面ê領導者)。議長有講歡迎詞，也陳 Huī-lâm牧師有講謝詞答謝 in chiah大ê歡迎。公宴了，羅 Bān-tit，Lū Kek-lēng， 楊 Thian-hô kap小弟，4 個醫生是著一位DR. NELLES SILVER THORNE博士案內去參觀 Toronto ê 小兒病院。這間小兒科ê病院是11 層 ê大樓，病床oá 1000。 檢查室，手術室是真完全ê 設備。 Chia 對囡仔 ê腦外科kap 小兒 ê心臟外科，是世界上有權威 ê所在。現時加拿大ê醫生攏是公務員，因為醫療是國營。國民若破病就受國家醫治。醫生做公務員tī 國立病院做工以外，也會用得開設家己ê 診所，hō͘特別ê病人chhē in所歡喜ê醫生。這位 Silverthorne博士koh請阮4 個人食茶點，koh 到伊ê 貴府看slide (幻燈)。真親切，hō͘阮印象真深。9月4日頂晡，阮12 個人有koh一擺 訪問母會事務所，m̄是真大間 ê辦公大樓，總是tī海外宣道 kap其他家己國內ê濟濟傳福音ê事工是做真濟。也有受in ê教會公報ê記者來採訪， ài知咱chia傳福音ê代誌。後來阮就受案內去看產業展覽會，就是牛，羊，馬， 狗 ê比賽，農產物 ê比賽，雞，鴨， 火雞，園藝花草ê展覽。每年開一擺鼓勵產業ê進步，也就tī hia食中晝。
九月5日頂晡有淡薄時間，就有人去博物館，也有人去美術館，也tī 11點受母會請茶點，了後就koh送阮到飛機場，就tī 機場koh一擺 kap Bêng牧師等，濟濟牧師握手相辭。Tī EWART COLLEGE 5暗kap 5 個早頓攏是母會招待，阮攏無la̍p錢。同日下晡3點就到美國首要 ê大都市New York，也tī 機場有歸正教會派人來chhoā阮到in事先kā阮預定ê 旅館。 這日是拜六暝，團員就分開做濟濟對，有人去伊ê親人ê所在，tī 旅館有9 個人nā-tiāⁿ。
九月6日是禮拜日，小弟kap Koa Bêng-tiám有去訪問 Brooklyn ê METHODIST病院，也koh 到一間RIVER SIDE ê教會做禮拜。這間拜堂會 thang坐3000人ê大拜堂，有鐘塔， ài坐電梯 12 層，後來著 koh用腳peh 4 層，看真濟ê大鐘，小鐘。設使tī 這個時陣鐘若tân，穩當小弟ê耳孔會變做臭耳。後來koh看COLUMBIA大學，行路離無joā遠，這是有小弟ê 旅社 Khó͘ Teng-liông 醫事ê 案內，因為伊 toà tī METHODIST 病院。後來阮3人有夠NEW YORK最鬧熱ê所在叫做BROADWAY看鬧熱ê ELECTRIC CITY kap 106 層 ê EMPIRE BUILDING， 對黃昏到日落，看日景kap夜景久久chiah tńg來旅館。
九月7日是美國ê勞動節， boē-thang 訪問歸正教會，就大家參詳去看世界博覽會，對早起到暗暗足足看一日久。
九月8日，阮12 個人就正式訪問歸正教會，有hō͘ in請午餐，也有談論台灣教會ê欠缺，也聽 in ê海外宣道會ê工作。這個差會ê海外宣道會 ê總幹事是DR. THOMAS， bat來赴咱ê總會幾-nā擺。現在ê 馬偕病院院長，有派6 個宣教師來台灣teh幫贊咱ê總會。
九月9日DR. THOMAS親身來女宣案內阮(用大台 ê 專車)。去參觀UNION PLAZA， 這間是一間特別ài介紹ê所在。因為起 tī聯合國辦公大樓 kap聯合國總會議場相隔壁，就對窗á看hiah ê大樓， 看到真明。UNION PLAZA內面有禮拜廳，就是ài beh hō͘世界各國ê聯合過代表來hia做禮拜，抑是請代表來hia 講演。 Hō͘ 外界 ê人khah 會明聯合國ê事工，也教會對聯合國 ài beh做ê事工，也thang叫這個 The Union Plaza做橋樑。Kok 教派間 ê 宗派，基督教聯合事務等thang做橋樑，簡單講是聯合基督教 ê力量，透過聯合國 ài將耶穌ê理想運行tī世界。Tī 訪問 ê時，有得著 Sóng Choân-sēng牧師來kā阮做通譯，設使小弟所寫chiah ê若有m̄-著，也ǹg望別個代表投稿訂正是小弟大拜託ê所在。Koh 到一位參觀一間拜堂名做Marble Collegiate Church， tī 1854年起 ê (已經110年lah)，論到電器ê pipe organ是這間thong美國做第一事先有。伊ê 外觀親像太平景ê款，ná親像火箭thah，大部分是用石起--ê，內部chiah用濟濟suí-suí ê 大理石，地板攏是紅ê 地氈。 歐美無地動，用石á是大理石來起 ê拜堂，有ê 已經是1000年以上，壁也無pit-sûn，每間出名 ê拜堂攏有美術 ê意義。有真大間ê，真出名ê，有神父，sin-lú teh管理ê，無椅條 thang 坐做崇拜，是kan-ta teh 收入場料， hō͘旅行ê人觀光。 法國 VERSAILLES王宮所用ê 大理石是比羅馬彼得寺院幾-nā pē大koh suí。 埕園也真suí，一切是豪華 ê極頭。現在也有開放hō͘人觀光，無人khiā tī王宮內。阮看了家己親像一個建築學 ê 大家，攏是teh看無人teh禮拜ê大拜堂，若是跪 tī有蠟條祭壇前來祈禱ê意思，這款ê厝thang 改設做祈禱ê厝。若是美國New York ê拜堂，我所去ê Reverside Church kap 這間 Marble Collegiate Church攏有椅條真濟，有定期 teh聚會，kap咱台灣ê攏相像。
Taⁿ 這兩所在受案內看了，tī下晡小弟kap Lô͘ Bān-tit長老，Lū Kek-lēng長老，Iûⁿ thian-hô長老4 個人koh一擺 hō͘ Dr. Thomas 案內去參觀 New York長老會 ê病院。這間是12 層，病床有1000外，也有訓練外科醫生ê 講座。就是對世界濟濟醫生來到 chia受訓練。看著 chia ê教會病院chiah大間，也Y. M. C. A. ê 建築亦是真大，有ê是13 層， 2000 外 ê眠床。大間 ê拜堂若koh kap病院，抑是Y. M. C. A.相比，實在是細細boē-thang 比。 án-ni， in做基督徒真對重社會服務，用tī社會ê錢是真濟。阮參觀病院了就kap Dr. Thomas相辭。
九月10日，團員攏無有團體行動，訪問團ê 任務也明白，就隨人家己自由。小弟就kap Koa Bêng-tiám受一個親人ê 案內，就坐船看Manhattan一週。
九月11日頂晡 5點，阮就離開旅館去機場beh去Washington。 Tī New York ê旅館，錢阮beh la̍p ê時，chiah知歸正教會設法了，kan-ta叫阮簽字就好。
án-ni，阮訪問傳教倫敦， Toronto， New York攏有受著 母會 差會 chiah-nih 盛大 ê歡迎，就是表示對咱總會真大ê敬意。咱ê 總會 著 緊寫批 kā in 說 多謝。 (真失禮， 這個話著 對 Tân Huī-lâm牧師來講)。
以上所寫ê，若有m̄-著 ê所在由小弟負責。真多謝。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461