首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 出國97天
出國97天
卷期：第951號 本次： 日期：1965/2 刊名：台灣教會公報 頁數：6
篇名：出國97天 [ CHHUT KOK 97 THIAN ]
作者：
  顯示 : 漢羅 全羅 並列  

出國97天

這完全是出tī上帝ê恩典kap祝福，hō͘一個草地教會，尤其是極其小數中ê一個女牧師，有機會做台灣女界代表到德國Frankfurt去參加世界長老教會聯盟第19 屆總會，實在有講boē盡ê光榮，感謝kap感激。
諸位所敬疼ê讀者，我相信恁已經有讀過總會議長陳Huī-lâm牧師ê報告，以及tī Thian-kiâu報紙上看著幾若位先生ê報告chiah著。因為án-ni，我只有tī chia來寫淡薄我個人所經歷ê事件hō͘ 諸位讀者知kap做參考。Tī 1964年7月27下晡一點半，一行15人對台北坐C. A. T. 飛到香港。事先到帝國飯店去安排房間kap行李，然後各人自由行動。七月28日對早起到下晡，差不多全體做陣去pháu所beh去ê國家大使館，辨理Visa (入境證)。總是有ê有得著，有ê辦boē好勢，tī無法度kap極厭倦中tńg去旅館歇睏。隔日7月29日，分做兩隊，阮一行5 ê， 陳 Huī-lâm牧師，黃Chú-gī牧師，楊Thian-hô長老，呂Kek-lēng長老kap我，tī下晡4。30坐B. O. A. C. 先出發到黎巴嫩 ê Beirut，路中tī印度ê Delhi kap 伊朗ê Teheran 各停留40 分鐘， tī 7月30日上午 零時15 分到 Beirut，然後tī 機場ê 飛機室等到天光，辨理機票了後，就倩車到市內去遊覽。我tī 1961年10月對美國beh tńg來ê時，有訪問過Beirut 幾若日，所以有講boē出ê 感慨 kap興奮。後來坐10點A. M. ê R. J. A.去聖地耶路撒冷，koh-khah是感慨無量。大家先到 Y. M. C. A.去安排房間了後，4 位男代表 kap導遊者就去遊覽聖地濟濟出名ê所在。總是我一個犧牲整個ê下晡去替大家辨理換機票。因為我以前有去過耶路撒冷，而且時間也比大家khah久，所以這擺只有替大家服務，hō͘ in 4 位有機會thang去參觀一寡聖地ê事物。辨理飛機票了後，我只有去東方考古學研究院 kap Y. W. C. A.，去chhē阮ê教授(Biblical Seminary in New York) kap Y. W. C. A. ê總幹事kap朋友，因為我以前bat toà 過Y. W. C. A.，koh hit 間研究院是tī Y. W. C. A.隔壁。總是真可惜，所beh chhē ê人攏無tī-teh，真hō͘我感覺失望。今á日ê耶路撒冷比 3年前我去ê時加真濟ê 新建築物， 市郊ê路也開khah闊，koh有新ê 宿舍 kap 工廠。
七月31日8： A. M.，一行koh坐飛機到Beirut轉坐別chiah 飛機經由Athens (雅典)去羅馬。羅馬ê印象kap 3年前所看ê差不多，猶原是hiah-nih古舊。所不同 ê，就是路邊ê樹木kap花草，開得真正suí，果子也加幾若叢。因為我頂遍去ê時是秋天，這擺去是夏天。真感謝主，hō͘我有機會體驗著無相同ê羅馬氣節。阮一行猶原先到Y. M. C. A.去安排房間，然後我kap 黃Chú-gī牧師去替大家辨理機票。 hit暗到附近ê街路去行行，隔日hō͘ in 4 位去參加遊覽，我家己就去鄰近ê所在行，kap替大家買食物。Tī羅馬也是有舊地重遊， 感慨無量之感。
八月2日早起kap大家做陣去羅馬飛機場，送in 4 位去瑞士Geneva。後來家己tī 羅馬飛機場teh等飛機ê時，tī無意中tú-著過去tī美國ê時做陣過ê 菲律賓代表 kap 巴西 ê 代表。 In兩位攏是in本國ê 女宣全國會長。 異地重逢，實在有講boē出ê快樂。
阮到德國Frankfurt ê 機場已經是黃昏暗，無想著tī hia 會 tú-著鄭Jî-gio̍k牧師。伊本來是beh 迎接黃Chiong-hui院長，因為等無，去等著我。所以我真萬幸， tī生疏ê 異國中得著鄭牧師親切ê幫忙kap案內， chhoā我到所預定ê 旅館Palmenhof去。對台灣到羅馬是炎熱ê天氣，總是到德國就tú-著不常ê寒冷氣候，就趕緊換khah厚ê衫。對8月3號到13號，就tī Johaⁿ Wolfgang Goethe大學參加大會。 大會ê程序，是對早起8點30到暗時10點左右，非常重kap kiap ê program。總是中途也有短短ê休息時間thang去食茶餅，kap新舊朋友寒談。我因為受選做兩項委員，一個是婦女部 ê Standing committee (理事)，一個是Committee eon Objective (事工計畫委員)，另外參加女神學家座談會。Chiah ê攏是tī程序外ê時間，所以特別無閒。總而言之，本人對這擺大會ê 感想是新奇kap興奮，也是相當ê緊張，m̄-bat參加過hiah-nih有充實，認真ê神學-tek 大會。各國ê 代表差不多每場to在席， pông-thèng ê男女也是一樣真認真，koh 發言ê 情形也非常踴躍，這實在thang做咱ê參考。
大會後，對8月14 起，我就受載到德國南部ê Stein， Nunberg一所「工作過勞ê老母靈修會所」去參觀，是對德國7 ê婦女團體來合辦ê會所。內面ê 設備非常好勢，非常爽，環境是非常ê優美，到處to是滿開ê花，花園，房間內外to有各種，各色ê花，hō͘人感覺若親像tī樂園nih。 工作過勞ê老母thang免費， 抑是半價 tī chia靈修兩禮拜久，抑是三禮拜ê其間， hō͘ 身， 靈（身，靈）得著回復元氣kap充實，了後chiah tńg去。內面有幾若位教師teh指導kap做個人ê 問題顧問。
八月15號對Stein 到 Detmold， 沿路訪問並參觀著名ê大間禮拜堂抑是古蹟，有ê是第7， 8世紀ê教會kap鄉社。Tī Detmold是toà tī 新教ê 修女院 (Diakonissen Mutterhaus)，日時受案內到所定著ê城市，抑是鄉鎮教會去對鄰近教會來ê婦女團體，抑是男女會友，有時1，00 個以上，有時500個， 400個，向in 講道，或是演講， 並介紹台灣教會情形，特別女宣kap山地工作， 以及我ê 工作。因為in ê婦女團體有為著我出對台灣到德國ê 飛機票，所以非常關心ài來聽kap看我。Tī 德國4禮拜久，除去出席大會ê 11日以外，共tī三個主日講道，也受請kā嬰á（女嬰）洗禮，以及ǹg婦人會 kap青年會及其他ê 會演講17場，感覺德國人真好親近。Koh 德國ê 名勝古蹟也非常濟。特別新教修道院kap所辦ê社會事業，對任何方面ê貢獻to真正大。Tī 8月31日到倫敦， tī An牧師kap牧師娘 ê 迎接下， tī in 兜過一暝，隔早起 9月1日，kap An牧師去車頭送訪問團一行13人前往加拿大(我對8月13就kap in離別)。
Tī英國ê 其間，我得著女宣海外宣道會幹事miss Edward ê好意kap安排toà tī in ê厝，伊有設法hō͘我去劍橋大學訪問Hi牧師夫婦，也有去Selly Oak 參觀Carey Hall， kap去Coventry Cathedral，以及去Hampton Co͘rt Palace kap其他ê所在。也有參加女傳道就任式，婦人會， 為教會外青年活動ê所在等。英國所hō͘我ê印象，就是教會聚會ê人真少，實在有需要咱替in祈禱無soah。
九月10日，經由New York去加拿大Toronto，有明牧師娘 kap咱女宣道厝ê 幹事郭tì-huī女士到機場接我。然後去toà tī Ewart College，是宣教師訓練學校，並去明牧師in 兜hō͘ in請暗頓。Tī Toronto兩禮拜久，有去參加女宣理事會， 委員會， 部會 kap 加拿大總會ê總委會等， 並ǹg in ê 會請安。Koh禮拜日有去Knox教會kap聯合教會參加禮拜，也有去chhē Lia̍t 姑娘 kap Lū牧師夫婦(Rev. de Groot)。有見著Tông 姑娘 kap Lân 姑娘， in大家to非常數念台灣。九月23日應美國聯合教會婦女會ê邀請到New York去參加有關聯合國ê研究會。後來猶原受聘請去Kansas 市副聯合教會婦女會第10屆總會，攏總有1，500 個婦女，24 國代表對各教派來參加。期間是10月5日-9日。這個會ê主題是「評信徒傳徒，」 有分小組 ê討論，特別真關心「烏，白」ê 問題。
Tī New York ê短短期間，有去toà Biblical Seminary，得著Dr。 Elen Garber kap 周Siok-huī 女士ê招待，真感謝，也真ナツカシイ。該神學院比我以前tī-teh ê時有修改真濟，圖書室hùn大，新ê冊也加真濟，校長，教頭也換別人，總是有見著真濟舊教授kap朋友，大家真歡喜。
也有kap前台北Y. W. C. A.顧問Miss Julia White去參觀世界博覽會。 Koh tī禮拜日有去Fifth Avenue長老教會做禮拜，有tú-著真濟ê 舊友。
Bē去Kansas 市開會以前，我有去Pittsburgh參加女宣ê大會kap中會所合辦ê Ecumenical Seminar，然後去Cleaveland ǹg女宣 kap主日學演講， 並負擔主日禮拜ê一部分。Tī hia也見著真濟舊友，大家非常ê關心kap快樂。Tī Kansas 市開會後去Colorado 州 ê bo͘lder 訪問前台北Y. W. C. A. ê 創設者 Miss Lelia Hinkley， tī hia參加禮拜kap祈禱會，以及婦人會。也有去參觀Colorado大學kap中國留學生會，然後到San Francisco， toà Miss Logan (羅姑娘) ê厝，有tú-著高Chùn-bêng牧師，朱Khêng-sù牧師，張Suī-hiông牧師。tī 舊金山期間，有去參觀中國人學生中心，是為非基督徒 kap貧民所辦ê社會事業。羅姑娘ê小妹tī hia奉事，羅姑娘本身也tī hia teh 教聖經。Tī 9月23日到 Hawaii， Honolulu，有基督教會ê牧師娘 kap Y. W. C. A.總幹事到機場接我，後來chhoā我去參觀教會，博物館，以及去Waikiki海邊。 Tú-好是Hawaii ê Aloha week (アロハ週)，所以有看著各色，各種ê花車 kap 化妝， 樂隊， 車隊， 馬隊， 各島代表 ê 行列，感覺真有趣味。
九月25日(是日本ê 26日)到東京，因為是世運後，所以一切to極平靜。有去訪問 N. C. C. kap Tokyo Y. W. C. A. kap 幾若位日本朋友見面。Tī日本算是最後ê一站， 這擺kap 8年前所看ê 東京 to有不同 ê所在，8年前濟濟所在tú-tú teh 建設中。總是今á日ê 東京 to非常ê進步，不過因為先看過濟濟歐美國家ê景色了後ê關係，所以這擺對日本無有感覺特別ê 興趣。東京ê田色也無好，街市比外國無好看，一切ná親像灰色（灰色）。十月31日一路平安到台灣，結束97 天 ê 環遊世界。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461