首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / Beh 怎樣造就人才
Beh 怎樣造就人才
卷期：第960號 本次： 日期：1965/6 刊名：台灣教會公報 頁數：33
篇名：Beh 怎樣造就人才 [ Beh cháiⁿ-iūⁿ chō-chō͘ Jîn-châi ]
作者：
  顯示 : 漢羅 全羅 並列  

Beh 怎樣造就人才

感謝上帝hō͘咱ê 腳會thang khiā tī 這個宣教百週年ê時代，tī 這時咱一面beh 回顧過去來感謝上帝ê 鴻恩kap濟濟先人流血kap汗ê大功勞，同時也是beh 瞻望tī光明ê將來，所以咱ê 標語chiah訂講：「過往開來。」
Taⁿ beh繼承咱濟濟先人ê 遺業，一面beh 開託咱ê將來ê時，hō͘咱頭一個會感覺著ê，就是需要人才kap人才ê造就。咱常常teh講：「凍結ê 資本」ê所謂資本，的確是teh講：tī咱教會物質中所有ê最大ê 資本kiám是「人。」Tī咱ê教會ê發展上發見人才，造就人才這項事的確boē-thang忽略，因為除去上帝ê恩典以外，人是beh hō͘咱ê教會發展ê最大ê因素。雖罔咱已經有將近一千間ê教會，以及濟濟其他ê社會事業，chiah ê若無養成真適當ê人才來設法是boē用得ê。特別tī這個第二世紀ê時代，人常常teh講：tio̍h 充實內容， tio̍h看重基督教教育ê時，hō͘咱jú感覺造就人才ê重要。「事在人為」（事在人為）經驗kā咱講：平平一項代誌，有人犯了問題百出，m̄-nā boē進步，反tńg 退步，總是有tú好ê人落去設法逐項攏順序，人真要緊，適當是koh-khah要緊，就是所謂「適才適所。」
Taⁿ tī咱總會有一個選送委員會， 這個會ê目的khah m̄是對內，是對外teh 選拔tú-好ê人thang送出去外國造就。近來「出國熱」（出國熱），是普遍tī咱全台灣，教會也無例外。 Tī chia咱ài來想ê，就是關係這個選送是有3方面ê關係。第一，是beh送出去ê教會，koh一面是beh出去ê人，總是iáu這面，是beh接納ê對方。
頭一項ài來想beh送人出去ê教會抑是公機關。一個人若beh出去，攏tio̍h經過伊所屬ê機關，抑是中會ê 推薦，過去所推薦來選送委員會ê人來看，當然我m̄敢講攏是án-ni， iáu-kú大部分hō͘人會感覺是khah 趁人情，無實在teh為著全體ê教會teh想。對這霎起，咱若ài咱ê教會得著真tú-好ê人才，咱的確tio̍h事先chhē真tú-好ê人才，實實在在beh為著教會ê人送出去。換話來講：咱已經到tī tio̍h ài有全盤ê計畫，就是整個ê教會工作ê計畫，tī 這個計畫，咱chiah來抄找tú-好ê人，然後送in去外國深造。因為差會若收著咱ê請求獎學金ê時，in的確beh問，這個人tńg來beh做甚麼？In的確m̄是beh出真hō͘人去觀光， in ê獎學金也是通過信徒用祈禱來獻，是beh hō͘上帝ê國會thang廣闊tī 這個地上。Tī 選送委員會咱有訂三個範疇。
(A) 範疇就是對機關，抑是中會所推薦來講：in 實在有需要某人出去學習某種ê學問，後來委員會也認定確實有這款必要，chiah替in chhē tú-好ê獎學金。這項咱tio̍h繼續加強來做，hō͘咱會thang實在來補滿咱ê教會ê欠缺， 這個工是真困難，總是也是無án-ni做boē用得。為著beh án-ni做，咱事先的確tio̍h有全盤 ê計畫，親像咱兩神學院最近有一個1年ê計畫，in現時是根據這個計畫teh準備人，teh chhē人。Tī chia順續也ài報咱知ê，就是委員會這pêng有一個決定，就是這個 (A)範疇有beh限制時間，因為屬tī 這個範疇ê人的確tio̍h ài 英文ê 考試， 這個考試是一年兩擺，也屬tī 這個範疇 ê人，只有兩年ê權利nā-tiāⁿ。 換話來講：經過4次ê 英文考試若無通過就失落hit個資格。(Nā tī 外國ê人只有一年ê 權利nā-tiāⁿ)。阮án-ni決定，是ài hō͘ 新進ê人有機會，若無án-ni，就有資格ê人一面考試boē通過，也一面不時beh保持hit個權利，就後來ê人真oh得設法，koh以後屬tī (A) 範疇ê人攏叫in做「候補者」等考試通過了後chiah會thang得著hit個實在ê資格。
(B) 範疇是事先有獎學金，後來kong-bō͘ hō͘人志願來考試chiah 錄取 ê， 這個以後會漸漸 khah濟。
(C) ê範疇是咱只有做「橋」 hō͘ in 過，就是in已經家己去討獎學金，後來tī 委員會kā in 過táu-kài nā-tiāⁿ。
Taⁿ論beh出國ê人，我是ǹg望人人攏有機會thang出國得著深造 ê機會，因為出國ê時，m̄-nā得著學問ê造就，就是會加添見識，得著活活ê學問。總是tio̍h ài反省ê，是咱tio̍h有真明確ê 目標來出國，的確m̄-thang為著出國ê出國。過去有一部分確實是án-ni，所以到路尾就為著目的無kéng手段，若有thang出去就好，有路thang行就好，甚至hit個路明知是無應該行ê時，也是beh行。
論beh接納ê對方(大半是咱有關差會)，咱真感謝in，歡喜將獎學金來送咱，總是in也是有條件ê， hit個條件m̄-nā kan-ta 英文考試ê 及格， in真ài咱有通盤ê計畫，無計畫，kan-ta hàm-hàm ê送人出國是boē受歡迎ê。 Tī chia也順續ài報咱知ê，就是差會近來有一款新ê 方針，就是in所beh hō͘咱ê獎學金無tú-tú tio̍h去美國，in真願意將獎學金hō͘咱，hō͘咱也thang tī美國以外，親像日本，抑是香港， 菲律賓等 ê 地區留學，甚至tī台灣也是好。所以咱m̄-thang想講留學就是只有只只美國nā-tiān，其他ê 地區也thang，所以問題是咱實在ê需要是甚麼？咱tio̍h計畫，發見hit個實在ê需要，也hit個需要m̄是kan-ta tī美國chiah會thang 達到hit個目的，有時去日本kiám-chhái koh-khah 合實際。所以以後咱ê教會tio̍h關心tī全體ê教會ê需要，差出實在適當ê人來送去tú-好ê所在，也hit個所在kiám-chhái是tī 東洋抑是歐洲。咱tio̍h除去留學，就是去美國這款ê錯誤ê觀念，也ǹg望出國ê人的確tio̍h事先有明明ê 目標，實在ài beh貢獻台灣ê教會榮光上帝，hō͘伊ê國tī第二世紀會thang koh-khah大發光彩tī咱這個島嶼。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461