Beh cháiⁿ-iūⁿ khah-iâⁿ ín-iú
Ji̍t-pún San-sek Kun-pêng siá.
Si Khêng-hoa e̍k.
1965.05.15 P.12-13

Lâng tī it-seng tiong-kan lóng oē tú-tio̍h chin-choē ín-iú bê-he̍k. Chóng-sī boē ēng-tit kóng tú-tio̍h ín-iú chiū-sī bái, sī lâng hō͘ ín-iú khì chiah sī bái. Tú chhin-chhiūⁿ koân ê toā-chhiū, chiū khah oē tú-tio̍h toā hong chhe, nā chin-si̍t beh choè lâng ê lâng, chiū oē gâu tú-tio̍h ín-iú, put-kò nā oē-hiáu khò Siōng-tè, chiū oē thang sèng-kè chit khoán ê ín-iú.
Ū chi̍t pái, ū chi̍t ê m̄-sī sìn Siōng-tè ê thâu-ke, chhoā i chi̍t ê pài Siōng-tè ê lô͘-po̍k chhut-khì phah la̍h, nn̄g lâng kiâⁿ kàu lō͘-tiong teh tâm-lūn ê sî, thâu-ke kā chit ê lô͘-po̍k kóng, "Lí to sī sìn Iâ-so͘ ê lâng thài oē chi̍t nî thàng thiⁿ chhiâng-chāi kóng ū Mô͘-kuí ài kā lâng ín-iú, ài kóng Mô͘-kuí oē lâi chhì-thàm, sī án-choáⁿ thài oē hiah-nih bô chì-khì? Chhin-chhiūⁿ goá iā bô sìn Siōng-tè, iā bô sìn Iâ-so͘, m̄-kú iā m̄-bián kiaⁿ kuí-á lâi án-choáⁿ chhì-thàm." Hit ê lô͘-po̍k thiaⁿ liáu chiū kā i kóng, "Thâu-ke, m̄-kú án-ni neh, lán chit-má lâi-khì phah la̍h, chhin-chhiūⁿ kóng nā ēng soàⁿ ê chhèng-chí kā phah chiáu, phah tio̍h kuí-nā chiah, án-ni lán beh seng lâi kā lia̍h tó chi̍t chiah neh? sī beh seng kā lia̍h hit chiah phah tio̍h giān-giān boē pe ê, á-sī beh seng kā lia̍h hit chiah tio̍h khin-siong iáu oē kún-liòng hit chiah neh? Bián kóng mā beh seng kā lia̍h hit chiah tio̍h khin-siong iáu oē kún-liòng beh koh pe khì hit chiah, nā-sī hit chiah tio̍h tāng-siong í-keng giān-giān hit chiah chiū kā pàng lō͘-bé. Tú chhin-chhiūⁿ án-ni, thâu-ke lí iā bô sìn Siōng-tè, iā bô ài sìn Iâ-so͘, khoàⁿ sī án-choáⁿ choè, chū án-ni choè. Taⁿ án-ni, chhiáⁿ lí mài siū-khì, nā-sī hō͘ Mô͘-kuí lâi khoàⁿ, sī tú chhin-chhiūⁿ tio̍h tio̍h tāng-siong ê chiáu-á, nā kā pàng leh, mā í-keng boē kún-liòng, boē hō͘ cháu-khì, m̄-kú nā-sī goá sǹg sī chhin-chhiūⁿ tio̍h tio̍h khin-siong, sìⁿ-miā sǹg sī iáu-kú pó oē tiâu, só͘-í nā kā pàng-teh, it-tēng oē hō͘ cháu-khì, só͘-í chiū oē chiong tāng-siong ê thâu-ke lí kā pàng-teh, it-bī lâi beh chì-tī goá." Só͘-í kî-si̍t, nā-sī ka-kī kóng pêng-sò͘ lóng m̄-bat tú-tio̍h siáⁿ ín-iú, á-sī kóng pêng-sò͘ m̄-bat tú-tio̍h Mô͘-kuí ê chhì-thàm, hit khoán ê lâng boē thang kóng chiū-sī i ê phín-sèng jîn-keh sī chin ko-siōng, tian-tò sī sui-jiân tuí-tio̍h ín-iú guî-hiám, iáu-kú m̄-chai-iáⁿ guî-hiám, só͘-í chiah ná kiâⁿ ná chìn-ji̍p choē-ok ê hām-khiⁿ. Si̍t-chāi tio̍h chai, chit ê sè-kan sī boē ēng-tit siuⁿ khò-sè, nā-sī án-ni, beh cháiⁿ-iūⁿ thang lâi khah iâⁿ chit sè-kan ê ín-iú neh?
Tē 1: Choè iàu-kín ê, chiū-sī tio̍h ài chīn-liōng m̄-thang khì chiū-kūn guî-hiám ê ín-iú. Kó͘-chá ê kek-giân iā ū kóng, "Lâng m̄-thang kun-chú pit sīn kî to̍k," chiū-sī kun-chú lâng tī lâng bô khoàⁿ-kìⁿ ê sî tio̍h kín-sīn i ê só͘ kiâⁿ, ǹg-bāng bián-tit hō͘ ín-iú khah iâⁿ lâi hām-lo̍h choē-koà. Koh kóng, " Beh khì lia̍h kuí ê, tian-tò khì hō͘ kuí lia̍h-khì," ì-sù chiū-sī m̄-thang chiong pún-sin khì thâu-mn̂g chhì hé, sī tio̍h chīn-liōng lâi siám-pī khah hó. Kó͘-chá Ji̍t-pún ū chi̍t ê kiàm-su̍t ê bêng-jîn kiò-choè Thióng-goân Pok-thoân (Tzukahara Bokuden) ū chi̍t ê tô͘-tē, beh kiâⁿ kè ok-bé ê ka-chiah-āu, chin gâu siám-sin, thiàu chi̍t-ē chiū siám lī guî-hiám ê só͘-chāi, bián khì hō͘ bé that--tio̍h. Chóng-sī Bokuden pún-sin khiok lóng ài siám kàu hn̄g-hn̄g ê só͘-chāi, sin-khu phak kàu chin kē, bián-tit kiâⁿ kūn bé só͘ teh kè ê só͘-chāi. Khó-kiàn thang chai, kiâⁿ oá guî-hiám ê só͘-chāi tián chi̍t-ē hó kha-chhiú lâi siám-lī guî-hiám, chū-jiân sī khoàⁿ tio̍h chin pún-sū, chóng-sī ū sî tian-tò oē gō͘ toa sū. Nā-sī chin-chiàⁿ ū pún-sū koh lāi-hâng ê lâng, tian-tò sī bô ài pún-sin khì thâu-mn̂g chhì hé, só͘-í piáu-hiān tio̍h te̍k-pia̍t ū suí ê pō͘-sò͘. Lán ê Sèng-keng iā ū kóng, "Bo̍h-tit hō͘ goán ji̍p tī chhì, tio̍h kiù goán thoat-lī hit ê pháiⁿ ê." Thang chai choè lâng iû-goân sī chīn-liōng mài khì chhin-kūn guî-hiám ū ín-iú ê só͘-chāi.
Tē 2: Koh lâi iáu chi̍t hāng iàu-kín ê, chiū-sī tio̍h oá-khò Siōng-tè lâi soé-tû sim-lāi ê choē-ok ù-oè, tuì án-ni thang tit-tio̍h lāi-sim ê khuì-la̍t, bián tì-kàu hō͘ choē-ok ín-iú khah iâⁿ khì. Sèng-keng ū kóng, "Choē-ok ê chêng-io̍k hō͘ lán uī-tio̍h sí kiat ké-chí." Che tú chhin-chhiūⁿ la̍t-chí, nā tuì goā-bīn khoàⁿ choan-choan chhì, hō͘ lí boē bong boē the̍h--tit, iā bô hoat-tō͘ thang kā phah hō͘ phoà, chóng-sī nā kàu sêng-se̍k i oē ka-kī piak-phoà, lóng m̄-bián lán kā i tāng chhiú. Chhin-chhiūⁿ chit khoán lāi-bīn ê ín-iú oē ka-kī ín kuí ji̍p the̍h, kap choē-ok ka-kī chhoàn-thong, chiū m̄-bián kā táⁿ-kek iā oē ka-kī phoà. Chit khoán bái ê sim-koaⁿ, nā beh kā i koé-oāⁿ, tek-khak tio̍h tāi-seng chiong pún-sin só͘ hoān ê choē hoán-hoé, sìn-gióng Ki-tok lâi chiap-siū I ê chín-kiù, tû che í-goā pèng bô pa̍t hāng ê hoat-tō͘.
Tē 3: Koh chìn chi̍t pō͘, lâng m̄-nā tio̍h tuì siau-ke̍k ê hong-bīn lâi tî-hông ín-iú, chiū-sī tio̍h chìn chi̍t pō͘ chek-ke̍k lâi kiâⁿ hó ê tāi-chì. Nā-sī kan-ta siau-ke̍k-tek lâi tî-hông ín-iú, sui-jiân ū sêng-kong, iā sī bián khì hō͘ ín-iú khah iâⁿ khì jî-í. Chóng-sī nā-sī tit-tio̍h Siōng-tè sià-bián choē, hó-táⁿ lâi kiâⁿ hó, tuì án-ni chū-jiân oē thang tû pháiⁿ, koh oē thang khah iâⁿ bê-he̍k. Ū chi̍t kù oē kóng, teh chìn-kong ê tiong-kan, chū-jiân chiū ū tî-hông ê hó pō͘-sò͘ tī-teh, chiū-sī chit ê ì-sù. Sèng-keng nih iā ū án-ni kóng, m̄-thang hō͘ pháiⁿ khah iâⁿ khì, tio̍h ài khah iâⁿ pháiⁿ, chiū-sī chit ê ì-sù lah.
Tē 4: Nā koh chìn chi̍t pō͘ lâi kóng, beh khah iâⁿ ín-iú, chiū-sī tio̍h ài ū ióng-kám kap koat-toàn. "Mô͘-kuí ê bīn thâu chi̍t pái khoàⁿ tio̍h sī chin pháiⁿ khoàⁿ, chóng-sī khoàⁿ kè nn̄g pái, 3 pái ê tiong-kan chiū oē ná koàn-sì.
Só͘-í khah kóng to sī tio̍h kín-sīn kéng-séng, chhin-chhiūⁿ Chú Iâ-so͘ gū-tio̍h Mô͘-kuí ê tiⁿ-giân bi̍t-gú ê ín-iú, iáu-kú kì-jiân hoat-hiān tio̍h sī ín-iú, chiū toàn-jiân chek-pī Mô͘-kuí kóng, "Sat-tàn thè-kì goá ê āu-bīn." ín-iú sī oē iû chhián ji̍p chhim ê, sī oē chin khoài koàn-sì ê, khah kóng to sī tio̍h ióng-kám koat-toàn, li̍p-khek ki̍p-sî kū-choa̍t, khì-sak.