首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 對馬來西亞ê請安kap報告
對馬來西亞ê請安kap報告
卷期：第958號 本次： 日期：1965/5 刊名：台灣教會公報 頁數：6
篇名：對馬來西亞ê請安kap報告 [ Tuì Ma-lâi-se-a ê chhéng-an-kap pò-kò ]
作者：
  顯示 : 漢羅 全羅 並列  

對馬來西亞ê請安kap報告

感謝主ê帶領kap 兄姐 ê代禱，hō͘阮tī chia ê工作順利，teh學習。
阮受交代tī 馬來亞來學習，對 3：27日離開，已經月外日，做義工訓練ê工; ǹg望無辜負頂面ê交託kap in ê期待。
Taⁿ將所觀感做報告:--
1. 馬來亞近赤道太熱，看著皮膚有大烏小烏，就知熱ê程度。佳哉到處有大森林 kap下晡ê落雨來調節氣溫，暗時太涼冷，草木青翠，蘭花滿埕，雖然熱，iáu是感謝。
2. M̄-bat thang 驚：風颱kap地震m̄-bat來這個地區， in m̄-bat這是甚麼？也boē曉得thang 驚。所以in起厝太簡單，用真小ê材料，koh用細支柱腳來添厝，hō͘伊離地3，4 尺 koân，做cha̍h 風kap 秋凊ê路用。假使這兩位 兄妹若來馬來亞相探，不但厝會飛去空中旅行，所倚靠ê樹乳園會全滅，(因為這樹真脆)，siah-khòng也會平地。
3. 神明看鬧熱：滿街路是牛teh行遊，(攏無縛索仔)，車 kap人著溫柔請in走;因為是印度神;若有牛糞toà tò去糊嬰仔 ê身軀kap頭額chiah是好用。萬一車若撞倒牛，走無lī， chiah是有性命ê危險。
4. 農業無發達。一切ê 農作物，是thèng伊自然長大，青菜是粗 koh 澀， 芎蕉kap大-pô͘-bú pîⁿ大，果子專靠外國。
三分之二以上是原始林，設使入境kap移民若歡迎，台灣農經隊著聽候thang出發。輕工業也boē發達。Tī chia ê 華人是做生理kap做頭家。在地人是靠天食飯，食了chiah做。上帝ê疼太大。
5.禮拜日是固定ê 休業日：街市店門盡關，無做生理，不止幫贊咱ê禮拜kap主日學，kap青年ê活動。
6.學校先生，若經過檢定後，薪俸由政府發，安心做工，免驚無人聘。
7. 牧會ê成功kap困難。Tī chia ê牧師著bat 4， 5款話 (芙蓉方中南牧師bat 8， 9款話) beh應付招呼，造就chiah濟款ê人，確實m̄是容易。
雖然牧師攏有汽車(chia叫風車)若是著負責2， 3 間教會(抑是佈道所)，一位相離20外英里，iáu-kú是經濟。因為欠工人，欠經濟，我每週kap in去2， 3位做工，竟感覺汽車ê需要，koh節省時間kap所費，iáu是好ê辦法。(車8分新， tī chia 2，000箍無貴)。
Tī芙蓉人口7萬，每週禮拜4百外人，家庭聚會60外，青年大人ê熱情，真是感激。
8. 公約：-- Tī 這個地區若有一宗派去設教會，別宗派著khiā tī共同戰線 kap 援助ê地位，soà通知所屬ê信徒參加tī hia ê教會，hit教會也著接納in做會員; hō͘信徒非常方便。我來tī chia， in攏接納咱kap in相kap舉行聖禮典。天下一家何等喜樂。
9. 衛理公會設衛理站。(Methodist centre)有3位。
1) 1958 tī Port Diskson (波德申) 靠海邊，買20 英畝 ê 地。 為教會團體，為家庭，為青年ê三大目標， 起一棟大拜堂廳(分活動3格)，容允400 外人，有食飯廳，運動場，有起男女宿舍兩棟， 容250人。(每日一名收一箍)。有兩棟各6床，灶腳， 浴間，一日收10 箍。 Koh一棟房間6間， 設備齊備，各房 3床，收 4 箍。總開35 萬， T. K. C.負責兩萬外。現在起一座露天會場，會容400人做早暗外面禮拜ê路用，kap 遊藝會，真是適合。Koh 起一間祈禱厝，hō͘入ê人隨時會跪落祈禱，讀聖經，新設計ê， tī 4:29號舉行奉獻典禮。
2) Tī PENANG有一位會容允80人，這所在是風景區，氣候涼冷koh安靜，hō͘ khah小ê聚會thang用。
3) Tī 福隆港（福隆港）是tī山頂4，700 英呎高，氣溫50外度， thang容 25名，設備週至。供給傳教師kap小ê團體。著穿毛衣。 Hō͘咱知in看重tī替修kap 養銳氣。
10.參加吉隆坡， 芙蓉區青年團契訓練大會， tī 4月26-29 開tī Pho-tek-sin。 到時領隊chê-chéng，頭尾青年家己主持， 管理分組敏捷，討論熱切，委員領導有方，早暗tī 露天場，(有5層半圓形)。無有中途退席， 抑是欠席。 問題太濟，解答簡捷。最後ê 晚會， 各區ê 節目真是精彩，就中印度舞文雅koh有藝術。最後抱決心來散會。
中間有方牧師月外日ê 籌備太週至。 男女青年，信仰 kap生活猶是近tī赤道 ê熱，thang歡喜。
11.現在ê 幾項問題：--
1)讀英文學堂ê青年，in用英語比父母會khah慣勢，致到無愛tī家己ê教會禮拜，無愛加入青年團契ê活動，這是一個問題。
雖然參加英文禮拜，對信徒ê責任放鬆，也是問題。 Tī家庭ê宗教生活，kap父母ê 接接亦是一個問題。(自尊心優越感)。
2)主日學，為著語言ê複雜，佳哉中國文字iáu是統一。現在分科，有英文，Kóng-hú話， 客話， 福建話， 華語 (國語)，其他濟濟。為著beh培養kap造就tī語言也是一個問題。
12. 衛理公會當前不但教會teh大推進， in看重tī 財政獨立。有3年計畫：--
1)頭3年ê 目標， khǹg tī 20 萬， taⁿ已經到。
2)現在1965-1968進入第二站，穩當會突破，án-ni in 幾年就準備會thang完全獨立。
Tī chia ê百姓，m̄是欠經濟，若有熱心，錢m̄是問題，穩當成功。
恭敬請安。
5月6日tī 馬來亞寫
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461