首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 謹慎你ê心
謹慎你ê心
卷期：第967號 本次： 日期：1965/10 刊名：台灣教會公報 頁數：10
篇名：謹慎你ê心 [ KÍN-SĪN LÍ Ê SIM ]
作者：
  顯示 : 漢羅 全羅 並列  

謹慎你ê心

「你著盡力保守你ê心，因為伊是活命ê根源」(箴言4:23)。
謹慎你ê心！著知你一生ê成功，失敗，禍福攏是用你ê心來做轉移；你一切ê行做kap生活，攏是用你ê心做出發點；你5心思怎樣，你ê行做生活也是án-ni；心思卑賤污穢，若是ǹg望行做高尚，生活清潔，是絕對無法度ê事。
謹慎你ê心！M̄-thang容允m̄信ê念頭tī你ê心內，人所犯ê罪，攏是因為心內m̄信。咱ê始祖因為m̄信，就違背上帝ê命令，受咒詛，落tī患難中。現在撒旦iáu-kú是常常想方法beh 搖動咱ê信心，引誘咱心內生起僥疑，m̄信上帝ê話，僥疑上帝ê大權能kap伊ê應允。咱心內若有生起僥疑，無久會遭遇boē-thang挽救（挽救）ê大失敗，落tī罪惡kap患難ê中間。
謹慎你ê心！M̄-thang容允貪財ê念頭tī你ê心內。貪財ê念頭會hō͘你boē記得上帝，離開上帝;貪財ê念頭會 jia-蓋你ê目睭，hō͘你看boē明上帝ê旨意kap你家己ê前途ê危險。貪財ê念頭會hō͘你墮落，hō͘你犯罪，hō͘你行入災禍kap患難ê 陷坑內。「獨獨hiah ê想beh發財ê，就陷落迷惑kap羅網，以及濟濟戇戇有損害ê私慾，就是hō͘人沉落tī敗壞kap滅無ê。因為貪財是萬惡ê根源，有人戀慕伊，就受迷惑來離開道理，用濟濟艱苦家己刺鑿」(提摩太前書6:9，10)。
著謹慎你ê心！M̄-thang容允詭詐ê念頭tī你ê心內。咱ê上帝是信實，伊怨恨詭詐，虛假。基督徒無論甚麼時陣，攏著存誠實ê心。寧可因為án-ni來食虧受害，hō͘人藐視，m̄-thang用詭詐來得罪上帝。「白賊 ê嘴唇是耶和華所厭惡;行代誌誠實--ê，是I所歡喜」(箴言12:22)。若是行做誠實，是對tī伊實ê心所表現出來。心內若無誠實，就伊ê行做，講話猶原無誠實。因為án-ni，你著時刻謹慎，攏m̄-thang有詭詐ê念頭tī你ê心內。
謹慎你ê心！M̄-thang有怨妒ê念頭tī心內。無論甚麼時，看見別人得著利益;攏m̄-thang心內有無歡喜。Nā有，就是怨妒。人若有怨妒，事先受害ê 是家己，因為怨妒ê人，心內充滿艱苦kap boē平安，有時會去犯大ê罪，甚至親像該隱thâi伊ê小弟-亞伯。
謹慎你ê心！莫得tī你ê心內有報冤仇ê念頭。屬世界ê人，in m̄肯赦免人，若有冤仇，tī心內時時to想beh報冤仇。但是基督徒絕對m̄-thang án-ni做，因為上帝無歡喜，也m̄容允咱án-ni做;上帝是疼，所以愛咱屬伊ê人，無相拾怨。若是上帝beh ǹg咱報仇，就chī-chuī會活過一日？雖然咱攏是上帝ê對敵，上帝卻用伊ê 囝替咱死，救咱脫離罪惡kap死亡，又koh賞賜hō͘咱真濟屬靈ê福份。上帝疼咱chiah ê做伊對敵ê人，稱咱做伊ê 囝兒，伊愛咱著親像伊。所以無論別人怎樣歹款待你，你攏著赦免伊， m̄-thang有報冤仇ê念頭tī你ê心內，án-ni chiah thang堪得稱做上帝ê囝兒。
謹慎你ê心！莫得tī你ê心內有邪淫ê念頭。當這個歹ê念頭初初tī你ê心內生起ê時，著將伊除去，若無，會ná久ná長大，結果你ê身，心攏beh因為án-ni來受損害。姦淫ê 行為，事先攏是對tī in心內有清潔，心內成聖ê人，無有一個人會去犯姦淫ê罪。心內會阻礙你kap上帝ê交陪，失去上帝ê靈，咱ê心內beh加添痛苦。所以你時刻謹慎，beh得容允tī你ê心內有這款歹ê念頭tī你ê心內生起ê時，就隨時求上帝拯救。
謹慎你ê心！M̄-thang容允自私ê念頭tī你ê心內。「神就是疼。」伊真m̄-愛人自私，伊愛屬伊ê人疼人，ná 親像伊疼咱一樣。自私ê心kap疼人ê心是ná親像冰 kap火炭，boē做夥得ê。當你存自私ê念頭tī你ê心內ê時，同時tī你ê心內絕對boē koh有疼心存在。所以無論做甚麼事，攏m̄-thang kan-ta顧家己ê利益，攏著凡事顧到別人，替別人設想，hō͘別人因為你得一小寡 ê利益。如果為著幫贊別人ê緣故，家己必須受著甚麼勞苦或損失，你也莫得顧惜。主耶穌為疼咱5緣故，放sak天頂ê榮光，忍受百般ê痛苦kap 恥辱，最後竟然甘心hō͘人釘tī十字架頂。咱所服事ê主是一樣ê主，咱chiah ê做伊ê學生ê人應該著存伊這款ê心，學伊ê款式。
謹慎你ê心！M̄-thang容允tī你ê心內有求名聲ê念頭。一個基督徒若有求名聲ê念頭，就會離開上帝，行入崎嶇ê路，只有愛人歡喜，m̄順趁上帝ê命令，並且beh做真濟違背上帝命令ê事。貪財ê念頭對咱是有害，求名聲ê念頭害咱也無收貪財。每若遇著你beh求名聲ê 時，就著記得主耶穌ê警告講：「恁hō͘眾人o-ló ê有災禍ah!因為in ê祖款待假 ê先知也是án-ni」 (路加6:26)。
謹慎你ê心！M̄-thang容允驕傲ê念頭tī你ê心內。一個基督徒無論怎樣熱心，怎樣敬虔，怎樣疼主疼人，或是做真濟ê聖工，行真濟善事，只有若犯驕傲ê罪，即時就會受上帝ê棄sak，受人厭惡，對極-koân ê地步降落到極深ê坑中。驕傲是神最厭惡ê罪。「因為上帝tí-tek驕傲ê，施恩hō͘謙卑ê" (彼得前書5:5)。基督徒一下有甚麼ê長處，或是做甚麼好代誌，便會真容易生起驕傲ê念頭。真濟好ê信徒後來墮落到tī極可憐ê地步，就是因為受了驕傲ê所害。「敗壞ê事先，人ê心是驕傲，尊貴ê頭前是謙卑」(箴言18:12)。「因為見若自高ê beh hō͘伊卑微;家己卑微ê beh高升伊」 (路加14:11)。這重要ê教訓m̄-thang無注意。
謹慎你ê心！M̄-thang容允愛世間ê念頭tī你ê心內。這世間ê 名利，娛樂， 朋友，愛情，i-thāⁿ， oán-ho͘N2， 交際， 時常hō͘魔鬼裝做釣餌，來釣hiah ê屬神ê人。撒旦只有若會引誘信徒疼世間，就m̄免煩惱驚in m̄離開上帝，koh m̄免驚in boē陷落tī 罪中。每當你心內生起愛世間ê時，就著記念聖經內ê話講：「莫得聽這世間以及世間ê物。人若疼這世間，就父ê疼無tiàm tī伊。因為見若ti世間ê肉體ê私慾，kap目睭ê私慾，kap人生ê驕傲，m̄是對父，是對世間。Koh世間kap伊ê私慾teh過去;獨獨上帝ê旨意ê永遠tī-teh" (I約翰2:15-17)。

(完)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461