Má-lâi-se-a ê Siau-sit
Lim Chiàu
1965.10.15 P.12、16

Kám-siā kok-uī ê ài-kò͘ kap tāi-tó, hō͘ goá sūn-lī lâi oân-sêng tī Gī-kang hùn-liān ê kang-chok tī Má-lâi-a poàⁿ nî, taⁿ 9 ge̍h bé pêng-an kàu jīm-toē, chioh choá-bīn kā tāi-ke seh-siā.
Kong-pò-siā chú-pit ài goá koh siá tām-po̍h lâi choè tap-siā.
1. Sim chèng só͘ goān（心正所願）, tī muí pái kî-tó liáu, chê siaⁿ kóng "Sim chèng só͘ goān," put-chí ū chó͘-kok Bân-lâm ê khì-bī, koh hō͘ lâng chi̍t kóng chiū liáu-thiat hit ê ì-sù.
2. "Kám-siā" sī choè seng-oa̍h chih-chiap thong-ēng-gú, boē tuì boé ê lâng kiò kám-siā, boé ê lâng iā kiò kám-siā. Muí chi̍t hāng sū, siang-hong to kóng kám-siā. uī-tio̍h án-ni, siā-hoē, ka-têng kám-kak sio-lō un-loán. Tuì ū kám-siā, chū-jiân jî-jiân chiū m̄ bat ū thiaⁿ tio̍h chhoh pháiⁿ-chhuì kap oan-ke. uī-tio̍h ài chim-chiok chit ê sū ê thiat-tí, goá chiū kàu thêng-chhia-tiûⁿ, tê-sek, kong-chiòng ê só͘-chāi. Kó-jiân ū kám-siā ê só͘-chāi chiū bô oan-ke kap pháiⁿ-chhuì (khoàⁿ I Thiap 5:15-18).
3. Ma-lâi-a kàu-hoē (kok kàu-phài) ǹg ha̍p-it saⁿ thê-hê, sêng-li̍p "Hia̍p-chìn-hoē"（馬來亞基督教協進會）ê goân-in: Chiū-sī tī Ji̍t-pún chiàm-niá Má-lâi-a ê sî, ū chiong Sèng-kong-hoē, oē-lí Kong-hoē, Tiúⁿ-ló-hoē téng, kok kàu phài ê goā-kok soan-kàu-su, lóng chi̍p-tiong tī chi̍t ê kaⁿ-ga̍k 3 nî goā kú, tuì chit ê khoân-kéng tī kaⁿ-ga̍k lāi tāi-seng ha̍p-it, tī sìn-gióng, tī seng-oa̍h, tī kî-tó chū-jiân jī-jiân ha̍p-it liáu. Muí ji̍t liān-sip ha̍p-it, chiū tāi-ke kî-tó siong-iok, Chú nā iông-ún, tī chhut ga̍k āu it-tēng choè-chiâⁿ ha̍p-it ê kang; chiū-sī hiān-chāi ê ha̍p-it ūn-tōng.
4. Sîn-ha̍k-īⁿ pit-gia̍p āu, tio̍h keng-kè 6 nî kú chiah àn-li̍p choè chiàⁿ bo̍k, sī oē-lí Kong-hoē ê thoân-thóng. Sîn-ha̍k-īⁿ pit-gia̍p āu, thâu nn̄g nî kiò-choè chhì-iōng, tuì tē 3 nî khí chiap-siū choè nî-hoē chèng-sek hoē-oân, tē 5 nî li̍p choè hù bo̍k（副牧）, keng-kè 6 nî chiah àn-li̍p choè chiàⁿ bo̍k（正牧）=bo̍k-su. In án-ni tēng (1) ài hō͘ siàu-liân lâng ha̍k-si̍p khiam-pi kap sūn-ho̍k. (2) Hō͘ in khah láu-liān kap keng-giām, goā-kok liû-ha̍k ê iā tio̍h chiàu chit ê lō͘. In kám-kak sī chin hó ê hoat-tō͘.
5. Ma-lâi-a kìm-chí kong-chhiong（公娼） tī khì-chhia, lú-siā, tê-tiàm, chhài-koán, lóng sī ēng ta-po͘ ê, só͘-í kiám-chió toā soè siaⁿ kap saⁿ-phah. Chiàu pò-kò, 10 pái ê 9 pái lóng sī uī-tio̍h ū khǹg lú-chú, chiah oē siⁿ-khí tāi-chì.
Ū choē-choē in-sò͘, tì-kàu hō͘ lú-chú kap hū-lú, bô hoe-hiat ê hoà-chong kap tiám ian-chi, uī ba̍k-bâi, lóng sī táⁿ-pān sò͘-sò͘. Siat-sú tī mńg-po͘ nā ū tiám ian-chi kap koh-iūⁿ ê hoà-chong ê, chiū-sī pháiⁿ-mi̍h, khoài ín-iú lâng, iā khoài siū chhú-thê, che sī chit hāng ê te̍k-sek. án-ni, lú-chú oē sit-gia̍p á boē? Lú-chú ta̍k ê ū chin hó ê kang-chok kap siu-ji̍p, to iā bô sit-gia̍p, hoán-tńg hō͘ siā-hoē ū an-lêng tia̍t-sū. Goá kám-kak chin hó.
6. Lán ê soan-kàu-su him-bō͘ Kong-pò jia̍t, Tâi-oân khì ê soan-kàu-su chiap-tio̍h kong-pò kap hù-khan, ū-sî 4 kî á nn̄g kî choè chi̍t pái kià, thiaⁿ kóng sī uī-tio̍h sàng-liāu chin kuì. Goá hoê Tâi āu, keng-kè chiap-hia̍p, chiah chai (1) ài ēng po̍h-po̍h ê choá, te̍k-pia̍t uī-tio̍h hái-goā ìn kuí hūn.
(2) Tio̍h choè sin-bûn lâi kià.
(3) Tio̍h ta̍k kî suî-sî kià.
Taⁿ Kong-pò-siā ǹg-bāng oē chiàu án-ni, hō͘ hái-goā ê soan-kàu-su bián thèng-hāu.
7. Pe̍h-oē-jī tī Má-lâi-a kàu-hoē sī chin hó ê pang-chān. Ū joā-choē lāu a-pô tuì pe̍h-oē-jī tit-tio̍h chin hó ê chō͘-chiū, Sèng-keng oē hiah-nih se̍k, tī kàu-hoē choè chin hó ê kang, chiū-sī tuì pe̍h-oē-jī. Hiān-chāi joā-choē bo̍k-su chin sī kó͘-chhui pe̍h-oē-jī, lâi pang-chān hiah ê m̄-bat jī ê hiaⁿ-chí. iā tuì Tâi-oân tēng "oa̍h-miā ê bí-niû" kap boé choē-choē pe̍h-oē-jī ê chheh, lâi poê-iúⁿ in ê lêng-sèng, tī in ê kàu-hoē oē thang khoàⁿ tio̍h "Bân-lâm pe̍h-oē-jī Sèng-si." Chin sī hō͘ lán siūⁿ boē kàu ê.